Home Gobierno A base di un maneho nobo lo optimaliza e servicio di DIMAS

A base di un maneho nobo lo optimaliza e servicio di DIMAS

157
0
SHARE
- Advertisement -

Minister di Husticia mr. Andin Bikker:

ORANJESTAD (AAN) — Minister di Husticia, mr. Andin Bikker a hiba palabra den conferencia di prensa di Gobierno, dialuna mainta, den cual a duna di conoce cu a base di un maneho nobo, lo optimaliza e servicio di e Departamento di Integracion y Admision (DIMAS).

Manera ta conoci e Departamento aki ta cay bao di Minister di Husticia. E mandatario a indica cu desde cu el a asumi su funcion como Minister a inventariza e preocupacion cu ta bin di comunidad, pa loke ta concerni e servicio na DIMAS.

E mandatario a indica cu tin ciudadanonan cu ta observa cu tin hopi formalismo. Cu formalismo, el a splica, kiermen cu personanan cu ta aplica pa haya un permiso di firma liber y cu tin añanan na Aruba y ta bayendo pa permiso number 9, 10, 11 nan ta haya contesta cu nan no ta bin na remarca pa firma liber pero nan ta haya un permiso 11, por ehemplo.

Esey ta haci cu nan no tin, por ehemplo, AZV y mester apela na esaki. Tambe tin personanan cu ta confronta cu e hecho cu nan passport a caduca mientras cu nan ta bayendo pa permiso 8 cu 9 y como cu e passport no ta valido e permiso ta wordo integralmente nenga.

E mandatario a indica cu nan ta biniendo cu maneho specifico pa ambos caso, y si DIMAS ripara cu un persona a aplica pa firma liber y e no ta bin na remarca, pero si ta pa un permiso prolonga e ora ey ta dune esaki y no tin nodi di apela pa haya e permiso aki.

E dignatario a señala cu esun cu tin e poder pa duna un permiso di firma liber y ta ripara cu e persona no ta bin na remarca y mester di un permiso mas pa e yena e espacio pa e temporada cu ta wordo exigi, y e ora ey ta haya un permiso prolonga te ora e bin na remarca.

Un persona cu su passport a caduca, ta haya un espacio di un par di siman pa pidi e prolongacion y entre tanto haya su permiso prolonga pa e no keda sin AZV, etc.

Na di dos lugar, e mandatario a ripara cu hopi firma cu ta brinda economia di servicio, ta pasa den hopi obstaculo pa haya personanan cu specialismo cu no tin localmente, of no tin suficiente na Aruba, tambe DIMAS ta agilizando esaki pasobra, por ehemplo, tin Repsol cu ta haciendo trabaonan sumamente importante pa nos economia, wak si Dios mediante nos haya materia prima, e mandatario no kier pa e desaroyo aki wordo obstaculiza innecesariamente.

Tambe door di hopi apelacion Minister di Husticia, recientemente, a bishita Bezwaaradvies Commissie cual tin miles di caso di apelacion, basicamente debi na negacionnan di parti di DIMAS, y cu ta asina hopi cu practicamente e Comision di Apelacion no por atende cu nan tur.

Pa soluciona esaki e dignatario tin pensa di pone un team di Hurista, pa agiliza e proceso conhuntamente cu DIMAS, pa atende cu e miles di apelacion aki cu a obstaculiza hopi e trabao di Bezwaaradvies Commissie.

Minister mr. Bikker a indica cu Aruba ta basa hopi riba economia tradicional, y e maneho di admision tambe ta basa riba e economia aki. No obstante, Gabinete Wever-Croes a dicidi di bin cu innovacion y bay den e mundo cibernetico pa crea pilarnan economico nobo pa nos pais, y pa haci esaki mester di Kennis Economie. Esaki kiermen cu mester di personanan cu tin un nivel di estudio specializa, cu ta duna les na Universidad, y cu aworaki ta na Hulanda y tambe na Merca incrementando e economia di internet.

E economia aki poco, poco Aruba tambe ta bayendo den e direccion aki y Gabinete Wever Croes kier, a base di innovacion bay den e direccion aki. Pa logra esaki tambe mester ahusta e maneho di admision, na e experto aki cu kier bin Aruba no topa cu diferente obstaculo cu nan ta prefera di bay otro caminda.

Gobierno kier acelera e proceso pa por stimula e experticia cu localmente no ta disponible, pa e profesionalnan aki bin reinforza nos economia, y inverti den nos pais y duna nos hendenan un mihor entrada y nivel pa e tipo di trabao cu nan por aplica pe.

 

- Advertisement -

DUNA COMENTARIO

Please enter your comment!
Please enter your name here