Home Hudicial Agentenan di Polis cu a bati homber seriamente dilanti Hues

Agentenan di Polis cu a bati homber seriamente dilanti Hues

239
0
SHARE
- Advertisement -

Ambos ta suspendi actualmente

ORANJESTAD  (AAN)  – Ayera mainta e agentenan di Polis, Y. y W. a presenta dilanti Hues pa tratamento di e caso penal cu Ministerio Publico a cuminsa contra nan. Ambos ta wordo sospecha cu aña pasa 26 Februari nan a maltrata e homber O.A. severamente caminda e victima a sufri diferente fractura na su cara y hasta un ripchi. Te ainda e victima a keda afecta.

Tratamento di e caso tabata hopi interesante. DIARIO den e articulo aki ta concentra riba tratamento di e caso y den un otro articulo ta publica e exigencia di Fiscal.

VICTIMA MALTRATA FORMAL

E acusacion cu Fiscal a presenta ta cu Y. y W. riba 26 Februari 2017 a maltrata e homber O.A. formal caminda a fractura su cashi di wowo, nanishi, kaak, kibra algun djente, fractura ripchi cu a bora un pulmon. Fiscal ta haya cu e sospechosonan Y. y W. a abusa di nan poder.

POLIS A MALTRATA

Hues a puntra W. kico e ta pensa di e acusacion contra dje. El a bisa cu e no ta sali for di cas cu intension pa maltrata ningun hende. E ta kere cu e dia ey, door di cansancio di carnaval, el a actua di mas. E ta arepenti di loke el a haci. El a bisa cu nan a bay pa un asistencia caminda tabata sospecha cu O.A. tabata arma. Segun W., O.A. a wordo geboei y ora a pone riba suela wardando riba e patruya pa hiba sospechoso, e tabata tira skop pa loco den su direccion. Na dado momento O.A. a dal’e na su pia y e ora ey W. a perde balansa y a dal’e dos mokete den cabez. El a bisa Hues cu dos biaha so el a dal O.A. El a bisa cu ta papia rond cu el a skop, pero segun W., e no a haci’e.

Hues a puntra Y. pa bisa kico e ta pensa. Y. a bisa Hues cu el a wordo manda door di central na un cas na Paradijs y pa bay cu cautela pasobra e homber lo ta arma y ta menaza di maltrata un dama. Segun Y. el a drenta e cas y a saca arma y ordena e homber pa hisa su mannan y a detene. E momento W. a yega y el a splica W. y nan a bay cu O.A. pafor en espera di e patruya di detenidonan.  Segun Y., el a bay papia cu e señora pa sa kico a pasa y e tabata scucha desorden y a mira cu O.A. tabata resisti tirando skop. El a bisa e otro coleganan pa klem su pianan y pone riba bariga. El a bolbe bay papia cu e señora y a bis’e pa e bay haci denuncia na Recherche. Segun Y., O.A. a keda resisti y el a wak O.A. dal W. un skop y atrobe el a bay pa papia cu O.A. pa e trankiliza. E momento ey O.A. kier a dal’e skop y el a dal’e mokete den cara. E ta considera O.A. tabata resisti. Hues a puntra pakico no a hala un banda. Segun Y. e momento ey, e no a pensa esey. El a bisa Hues cu e sa cu el a actua robez pero door di dal, O.A. pero despues di esey, O.A. no a resisti mas.

FISCAL NO KERE AGENTENAN

Fiscal a remarca cu ta dificil pa kere cu ta solamente tres mokete e agentenan a dal e victima O.A. El a mustra cu e victima a kibra su cashi di wowo, nanishi, ripchi, djiente y hasta un pulmon a bora. Tin declaracion di otro agentenan y otro personanan cu ta mustra cu Y. a dal O.A. skopnan. Y. ta para riba cu e no a skop. El a bisa cu dos biaha el a hala O.A. su cabez cu su pia pasobra O.A. a bay serca di dje y no tabata sa si O.A. kier morde. Hues a mustra cu Y. a declara na Polis cu e tin problema cu su rudia drechi y no por dal skop duro.

Tanto abogado mr. Carlo di Y. como abogado mr. Thijsen di W. a haci preguntanan na nan cliente pa mustra con hopi nan tabata traha, dobble shift, durante e dianan di carnaval. Esaki a causa cu nan tabata hopi cansa y stress.

MALTRATO SEVERO

Hues a mustra cu tin declaracion di dos dokter cu ta mustra cu e maltratonan tabata severo. Hasta a perfora e victima su pulmon. Segun e victima O.A., e ta master diver y door di e maltrato e no por dive mas. Hues a mustra cu segun declaracion di testigonan cu a bay mira, un agente di Polis tabatin pia riba cabez di O.A. A mira con un agente a dal O.A. mas o menos 5 mokete duro.

Dos otro agente cu tambe tabata eynan tambe a declara cu a mira Y. y W. maltrata O.A. Un a mira cu O.A. tabata haya varios skop na cabez. E agente a mira W. tira skop den direccion di curpa di O.A. E agente a bisa cu el a mira cu riba instruccion di Y., e otro agente a pone pia riba cabez di O.A. El a mira e victima O.A. dal W. skop y despues W. tabata dal’e varios mokete. Tambe el a mira Y. bisti handschoen y dal O.A. masha duro mes. E agente a bisa cu e agentenan no mester a dal O.A. cu tabata geboei. Un otro agente a bisa cu el a mira Y. dal O.A. dos skop den cara.

Abogado mr. Carlo a señala cu e victima O.A. mes a declara cu el a huma marihuana. Tambe el a bisa cu durante cu e tabata wordo transporta, el a haya slanan di esnan cu a transport’e. Tambe na warda di Polis e lo a ricibi sla. E no sa ta ken a dal’e. Despues Ambulance a wordo yama pa busk’e. Tambe mr. Carlo a mustra cu un agente di Polis a declara cu e sospechoso O.A. tabata usa hopi forza y ta mustra cu e no tabata solamente bou influencia di alcohol sino algo mas.

E abogado a drumi den sala di Corte pa mustra Hues con Polis ta pone rudia na cabez di un sospechoso. E agente Y. a haci’e pa mustra cu ora pone e rudia, e sospechoso no por move su cabez. Esey ta contradeci loke otro Polis lo a declara cu e sospechoso lo tabata move su cabez.

Hues a remarca cu segun esnan cu a transporta O.A., nan no por a yega na e sospechoso y e tabata hopi maltrata. Durante transportacion O.A. tabata hopi trankil y ningun momento a usa violencia riba dje. E tabata keha di dolor.

TUR DOS AGENTE SUSPENDI

Hues a mustra cu Y. a keda 13 dia sera y despues laga liber pa sigui curso di agresion. Te ainda e ta suspendi. Segun abogado mr. Carlo, den caso ambtenaar tin un retiro condicional cu un tempo di prueba. Segun Fiscal, KPA a pidi pa retiro pero ta wardando riba decision di minister.

  1. a keda 13 dia sera. Den pasado 2011 tambe tabatin  un caso di maltrato contra dje. E tempo ey e mester a sigui e curso di agresion. Awor a bolbe bay haci’e. W. a bisa Hues cu e curso ta hopi bon y e ta sugeri cu e curso aki ta bon pa tur aña agentenan di Polis sigui. Asina un aggente di Polis sa con mester atende cu situacionnan cu presenta y no ta perde cabez. Ta asina cu W. tambe ta suspendi y posiblemente lo haya retiro condicional cu tempo di prueba.
- Advertisement -

DUNA COMENTARIO

Please enter your comment!
Please enter your name here