Home General Aruba Birdlife Conservation ta sigui defende naturaleza di Aruba

Aruba Birdlife Conservation ta sigui defende naturaleza di Aruba

213
0
SHARE
- Advertisement -

Nan a caba di atende nan caso Huridico number 9

ORANJESTAD (AAN): E sentencia di 30 di mei 2018 den e caso cu Aruba Birdlife Conservation a nombra como e caso “Rescue Warbler Street”, cu ta un parti di e Bubali Wetlands, tabata e di 9 (si e di 9) caso hudicial, cu ABC a entama den su enfuerso continuo pa stop destruccion di Aruba su naturalesa y Bubali Wetlands mu yen particular.

E sentencia den e prome caso di ABC ta data for di 7 di juni 7, 2016. Di e 9 casonan, ABC a gana no menos cu 7 di e casonan. ABC ta en espera di un veredicto mas den e luna di juni y e di diez caso lo cuminsa na juni tambe.

Ta importante pa tira un bista den e historia di ABC pa por compronde mihor unda ABC y Aruba su naturalesa ta para awe, y e di con a yega na tanto caso huridico.

Na 2011, Aruba Birdlife Conservation a lansa su prome campaña pa logra proteccion di Aruba su Shoco.  Na 2012 e Shoco di Aruba a worde proclama como un simbolo nacional di Aruba.

Na 2012 ABC a haci un proposicion na Parlamento di Aruba pa declara proteccion di 16 area natural di Aruba, y pa ponenan bow maneho di Parke Nacional Arikok.  Na February 2013, e proposicion aki a worde propone den un forma di un mocion den Parlamento y tur e 21 miembronan di parlamento a vota unanimamente na fabor di proteccion di e 16 areanan aki (cu actualmente pa motibonan tecnico ta worde yama e  “19 area”).

Na 2014, ABC a propone na Gobierno di Aruba pa declara e Prikichi como e parha nacional di Aruba y a cuminsa un campaña al caso.  Na 2017, e Prikichi a worde declara como Parha Nacional di Aruba.

Na November 2016 Aruba Birdlife Conservation a publica e buki “Bird Wildlife of Aruba”.  E buki ta consisti di 432 pagina y ta contene entre otro un lista di parha di Aruba (Bird Checklist of Aruba) cu 254 sorto di parha cu nan nomber scientifico, y alavez nan nomber na ingles, papiamento, hulandes y spaño.  ABC ta actualisa e lista regularmente y na Maart 18, 2018 e version mas recien a sali den publicacion cu ta contene 266 sorto di parha registra pa Aruba.

Na September 2016 ABC a cominsa un campaña nacional, un peticion, pa colecta firma pa stop e constante destruccion di areanan natural importante den naturalesa di Aruba incluyendo e Bubali Wetlands, y tambe e menaza di mas construccion di hotel y condominium, cu entre otro construccion di un hotel den e mangelnan na Pos Chiquito na altura di Isla di Oro.  Mas di 11.000 firma a ser collecta y na November 2016 a entrega e peticion na Prome Ministro di Aruba, Presidente di Parlamento di Aruba y na e Gobernador di Aruba.

Na Maart di 2017 Prinses Beatrix a biaha pa Aruba y compaña cu un ceremonia a declara Spaans Lagoen como parti di Parke Nacional Arikok y alaves pa duna Aruba Birdlife Conservation sosten cu nan retonan pa haya e otro areanan di naturalesa proteha conforme e deseonan di Parlamento di Aruba.  Te dia di awe,  Spaans Lagoen ta e unico area, di e 16 areanan natural importante, cu a worde declara como parti di Parke Nacional di Aruba.  A pesar di cu Gobierno na varios occasion a confirma cu areanan menciona lo worde poni bow maneho di Aruba su parke nacional, te ainda esey no a tuma lugar ainda.

Mientras e proceso aki tabata andando, a bira aparente pa ABC cu e Minister anterior di Infrastructura tabata concede parcela di tereno na desaroyadornan di hotel y condominium den area di e Bubali Wetlands di Aruba, locual no tabata segun e acuerdo cu Aruba su planicifacion di espacio (R.O.P.), y tampoko cu e decision tuma den parlamento pa protehe e 16 areanan natural.

Ta pa e motibonan aki cu a causa cu Aruba Birdlife Conservation a entama su prome caso hudicial na 2016. Y na caminda ABC ta bin ta ripara cu un cantidad di parcela na tabata concede den e area proteha di Bubali. Aruba Birdlife Conservation a tuma e posicion a base di un punto di principio pa sigui entama casonan contra cada situacion causa door di Gobierno cu lo contribui na destruccion di e area natural di Bubali. Esaki a culmina cu actualmente a bin na no menos cu 9 caso huridico.  Na Juni 2018, caso den corte number 10 ta na caminda y un biaha mas cu e tema di proteccion di e Bubali Wetlands conforme e R.O.P. y deseonan di Parlamento di Aruba.  E caso aki ta concerni e propiedad entre The Mill y The House of Cheng, cu segun e R.O.P ta un area protehi.

Aruba Birdlife Conservation ta haci su best pa purba sali na vanguardia di e 16 areanan di naturalesa y te awe por a entama tur e casonan aki.  Te cu dia di awe ABC a sali gana den shete (7) di e nuebe (9) casonan cu ABC mes a inicia of a tuma parti den dje.

Imaginabo cuanto gasto ta involvi pa ehecuta e cantidad di casonan den corte y ta di spera cu lo sigui mas caso den corte. Entrenan tambe un caso pa rescata e area di mangelnan na Pos Chiquito, di destruccion, cu construccion di un otro hotel den area di mangel na Isla di Oro. Un proyecto cu tur NGO di naturalesa ta full en contra.

Un yamada ta bay pa tur cu kier yuda Aruba Birdlife Conservation sigui cu su trabao di preveni mas destruccion di e 16 areanan natural hopi importante di Aruba, door di contribui cu un donacion.

Bo por haci bo donacion directo na Fundacion Aruba Birdlife Conservation, riba cuenta di Banco di Aruba Bank No. 2402860190.  P’esei di antemano masha danki.

Ademas, Superfood a concede Aruba Birdlife Conservation e oportunidad pa collecta fondo durante un luna di tempo.  Esei tambe ta dunabo e oportunidad di pasa un rato na Superfood y haci bo contribucion einan mes.

Aruba Birdlife Conservation ta haci uso di e oportunidad aki pa duna danki na e boluntarionan y collaboradornan pa nan sosten di semper.  Bo tambe por yuda trece un cambio positive pa e naturalesa di Aruba.

 

- Advertisement -

DUNA COMENTARIO

Please enter your comment!
Please enter your name here