Home Gobierno Aruba, Corsou, Hulanda y Sint Maarten trahando hunto pa un miho cuido...

Aruba, Corsou, Hulanda y Sint Maarten trahando hunto pa un miho cuido medico

19
0
SHARE
- Advertisement -

ORANJESTAD   (AAN):  Cuido medico mester ta completamente optimalisa na momento cu e paisnan caribense den reino Hulandes haya su mes confronta cu un evento catastrofico manera horcan Irma. Esaki ta importante pa por yuda e victimanan mas lihe posibel, cu cuido medico di calidad, sin perhudica e cuido medico na pashentnan existente, cu suficiente medicina den stock y cu personal cu ta wordo entrena regularmente.

Pa por logra esakinan, Aruba, Corsou, Hulanda y Sint Maarten ta bai traha mas estrecho cu otro. Bou di presidencia di Sint Maarten, e ministerio di Salubridad Publico, Bienestar y Deporte, lo bai trece padilanti e areanan cu mas ta bai rekeri esfuerso. Esaki ta un di e palabracionnan haci entre e 4 mandatarionan den Reino na Willemstad Corsou kendenan ta Minister Dangui Oduber (Aruba), Camelia-Römer (Corsou), Staatssecretaris Sr. Blokhuis (Hulanda) y Minister Lee (Sint Maarten).

E mandatarionan tawata presente na un “vierlandenconferentie” pa yuda sostene otro pa mehoraracion di e calidad di cuido medico. Tambe a haci palabracionnan tocante programanan di prevencion, colaboracion entre hospitalnan, medicamentonan, cursonan pa profesionalnan y intercambio di informacion. Di e manera aki e paisnan ta forma cooperacion mutuo ariba e areanan di biba saludabel, deporte y movecion.

Aruba, Corsou, Hulanda y Sint Maarten ta bai traha fuertemente ariba campañanan di conscientisacion pa entre otro reduci humamento, problemanan di obesidad y abuso di alcohol. Esaki ta rekeri atencion specifico pa por mira kico ta funciona bon na cada un di e 4 paisnan menciona den Reino. Por ehempel, na Hulanda nan ta huma mas cu na e paisnan caribense den reino. Un otro ehempel ta cu e hende muhenan caribense ta huma y bebe menos cu e hende hombernan pero ta sufri mas di obesidad y ta haci falta di movecion.

E paisnan lo bai sondia hunto pa un miho plan di cuido di mucha y hobennan cu ta den necesidad. Lo bai pone extra atencion pa combati abuso di mucho y preveni embarazo hubenil. Cu prioridad lo bai mira na mehora e cuido di salud mental di muchanan y hobennan, cuido social y emocional, adiccion y como tambe mehora e cuido di muchanan y hobennan cu limitacion. Aruba y Corsou ta e prome paisnan den Reino cu lo bai cuminsa cu esakinan.

- Advertisement -

DUNA COMENTARIO

Please enter your comment!
Please enter your name here