Home General Aruba tin su propio vision riba con ta lanta mucha

Aruba tin su propio vision riba con ta lanta mucha

150
0
SHARE
- Advertisement -

ORANJESTAD (AAN): Desde April 2014 a instala un Taskforce Derecho di mucha cu ta consisti di un representante di tur isla den Reino y Hulanda. Den e plan di trabao di e Taskforce a deliña algun aspecto cu lo a atende di un forma colectivo.

Un di e aspectonan cu sigur kier promove den bienestar di e muchanan, ta e lantamento di mucha riba un forma positivo. Pa e motibo aki, a palabra cu cada isla cu lo desaroya un vision pedagogico pa nan isla. Aruba na su turno a scoge pa desde April 2016 traha cu un comision, cu tin como tarea pa bin cu un vision pedagogico y un plan di accion pa Aruba. E comision aki ta consisti di 5 diferente organisacion, Departamento di Asunto Social, Fundacion Pa Nos Muchanan, Stg. Wit Gele Kruis Aruba, Fundacion Respeta Mi y Tienda di Educacion.  

E organizacionnan aki ta traha diariamente cu mayornan y tin como tarea pa sostene mayornan cu nan pregunta y problemanan riba tereno di lantamento di mucha. Pa formula e vision pedagogico, e comision a haci uzo di diferente fuente di informacion, manera literatura, entrevista cu hobennan, encuesta cu mayornan y profesionalnan, cifra di diferente instancia y experiencia diario.

Finalmente a formula e seis punto basico den lantamento di mucha. Pa medio di e seis puntonan basico aki nan kier conscientiza e comunidad di Aruba den e proximo 2 aña tocante e importancia di pone nos muchanan central, e importancia di e derecho di nos muchanan y di e papel importante cu mayor y educadornan y henter nos comunidad tin den e lantamento di nos muchanan na Aruba.

E 6 punto basico ta: 1. lanta yiu den un ambiente sigur y cu amor, 2. sosten positivo, 3. expectativa realistico, 4. disciplina positivo, 5. cuida bo mes bon, 6. busca sosten y ayudo.

A base di e 6 punto basico aki a formula un vision pedagogico pa Aruba. E vision pedagogico ta: Na Aruba un mayor ta percura pa nan yiu por crece den un ambiente pedagogico optimal, den un famia afectivo y stabiel y den un bario cu ta tene cuenta cu mucha.

Pa medio di educacion positivo (sostene, stimula y guia) mayor ta guia nan yiu mas miho posibel den nan desaroyo pa bira adulto. Hopi importante ta cu e mucha ta sinti siguridad emocional, ta desaroya su habilidadnan social y personal, ta haya chens pa siña balor y norma y hunga un rol activo den un comunidad multicultural.

 

Den e simannan cu ta bin Aruba lo wak un video promocional di e seis puntonan basico. Estudio haci a demostra cu: Preveni ta mas barata y efectivo cu cura!

 

- Advertisement -

DUNA COMENTARIO

Please enter your comment!
Please enter your name here