Home Parlamento AVP a duna mesun recomendacionan cu CAFT pa prespuesto 2018

AVP a duna mesun recomendacionan cu CAFT pa prespuesto 2018

89
0
SHARE
- Advertisement -

Parlamentario Richard Arends: Sinembargo Gobierno no a duna oido

ORANJESTAD   (AAN): Miembro di fraccion di AVP, Richard Arends, a atende desaroyonan di siman pasa relaciona cu presupuesto 2018 riba cual CAFT a duna su conseho riba dje. Parlamentario Arends a splica cu segun de ley di supervision financiero, CAFT ta duna nan su conseho prome cu e presupuesto wordo entrega na Parlamento y tambe despues ora cu e  presupuesto wordo trata y aproba den Parlamento.

“Nos tur por corda cu entre e dos momentonan ey di presupuesto 2018  tabatin cinco nota di cambio entrega pa gobierno caminda a aumenta gastonan di gobierno, principalmente gasto di personal y gasto di operacion di oficina den un forma excesivo y CAFT ta confirma esaki tambe den su conseho na Gobierno,” Sr. Arends a bisa.

Segun Parlamentario Richard Arends, e puntonan cu CAFT a trece dilanti, ta exactamente e puntonan cu fraccion di AVP y su persona a trece dilanti  durante tratamento di presupuesto como tambe tratamento di e cambio di ley di aumento di BBO y BAZV.

Na momento cu nos a analisa e presupuesto, nos a tuma nota cu reservanan di ATA ta wordo conta dos biaha, pasobra ta reservanan di 2017 cu ta forma parti caba di calculacion di e sector colectivo pa aña 2017 y gobierno a calcula nan atrobe na 2018. Minister no a contesta e preguntanan aki cu nos a haci por escrito.

Tambe e ‘meevallers’ unda cu mi a presenta un mocion caminda ta urgi gobierno pa aloca e totalidad di tur meevallers  pa reduccion di deficit y reduccion di debe. Durante tratamento di presupuesto, minister a indica cu 50% di ‘meevallers’ so lo wordo aloca pa reduccion di dificit y debe. “Esaki ta encera cu Gobierno ta tene cuenta cu gastonan adicional  pa 2018 cu ainda no a wordo presupuesto y no ta conoci ainda.”

Parlamentario Richard Arends a sigui mustra cu ta mesun caso cu entradanan di Refineria di Aruba esakinan a wordo kita for di presupuesto 2017 y aloca esakinan den presupuesto 2018. “Esaki ta confirma un biaha mas cu e deficit di 2017 a wordo crea primordialmente di un manera artificial pa asina tin mas espacio financiero pa financia e maneho nobo,” Sr. Arends a conclui.

Presupuesto 2018 ta conta cu un aumento di 125 miyon florin na gasto, si compara esaki cu realisacion di 2017. Gobierno ta premira entrada di riba 130 miyon florin cu en parti ta  e ‘coalitieheffing’ y e otro parti ta entradanan incidental di companianan estatal. “Presupuesto 2018 no ta cumpli cu e norma nobo di 3% acorda pa aña 2018,” Sr. Arends a splica. E norma di 3% pa 2018 ta un desviacion di e ley di e supervision financiero temporario y CAFT ta conclui cu gobierno mester presenta un presupuesto supletorio 2018.

“Nos ta opta pa hiba un politica di nivel y no un politica di insultonan personal,” e parlamentario a splika. “Esaki a wordo demostra na momento cu nos puntonan di critica y recomendacion tabata e mesun nan cu CAFT a trece dilanti.” Parlamentario Richard Arends ta invita tur hende pa bishita e Facebook Page di Fraccion di AVP unda cu nan tin dos nota cu nos a traha  pa loke ta e cuadro financiero 2018-2021, caminda den un forma hopi simpel y a base di datonan publico, nos ta purba splica nos ponencianan  den un forma substancia y  funda.

 

 

 

- Advertisement -

DUNA COMENTARIO

Please enter your comment!
Please enter your name here