Home Gobierno AVP a purba ranca un otro miyon for di pueblo

AVP a purba ranca un otro miyon for di pueblo

167
0
SHARE
- Advertisement -

Minister Evelyn Wever-Croes:

ORANJESTAD (AAN): Diabierna atardi, partido AVP a inicia un caso den corte contra Gobierno di Aruba despues cu nan a worde notifica cu nan no por uza un edificio of departamento di Gobierno pa metanan politico. Ta trata aki di e edificio di MFA na Noord. AVP a propaganda nan evento pa algun dia bisando cu nan ta sigui cu nan reunionnan politico den pueblo pa informa pueblo di e situacion economico di Aruba.

AVP a exigi Gobierno pa nan uza MFA Noord pa nan actividad politico. Di lo contrario, nan kier pa Gobierno paga nan un boet di 1 miyon Florin. Esaki kiermeen cu AVP kier ranca 1 miyon Florin di pueblo despues di a pone e pueblo aki den un debe grandi y laga nos finanzas publico na werki.

Como e mandatario encarga cu MFA’nan, Prome Minister Evelyn Wever-Croes a duna di conoce cu apenas dos dia pasa el a tuma nota cu AVP a pidi permiso pa uza e edificio di MFA pa nan actividad politico mientras cu e regla ta cu no ta permiti pa haci actividad politico den edificionan di Gobierno. Mesora Prome Minister a laga investiga esaki y a resulta cu e hefe di MFA Noord a firma un contract cu Partido AVP sin informa AVP cu den maneho di Gobierno no por uza un departamento of edificio di Gobierno pa actividad politico.

Sinembargo, segun Prome Minister, Partido AVP y señor Eman si sa miho como cu un aña pasa Gabinete Mike Eman a nenga peticion di Partido MEP pa uza un propiedad di Gobierno pa tene un actividad politico.

Prome Minister a bisa cu e contract no ta bisa niun caminda cu no mag di uza e propiedad aki pa un actividad politico. Esaki ta pone cu huridicamente Partido AVP tin derecho di uza e propiedad aki apesar cu no ta e cos corecto pa haci. Por lo tanto, Gobierno di Aruba a dicidi pa no continua cu e caso mirando cu Partido AVP no a worde notifica cu e no por uza MFA pa actividad politico. Esun cu a comete e eror, lo worde teni responsabel, cu ta esun na cabes di MFA.

Gobierno di Aruba, ta apoya tur esnan cu ta duna informacion na pueblo pero no den edificio of departamento di Gobierno. Den e carta entrega na Partido AVP, Gobierno di Aruba a pone bon cla cu esaki ta e ultimo excepcion cu lo worde haci riba e regla aki. Partido Raiz a huur e edificio di MFA pa un anochi informativo mientras AVP tabata na mando ainda. Partido RED a uza edificio di MFA pa nan celebracion di 15 aña. Y awor AVP a huur e pa un actividad politico.

“Gabinete Wever-Croes a drenta Gobierno pa trece ordo y respet. Mi no por coregi erornan di pasado, pero si mi por coregi for di awo bay padilanti. Gobierno di Aruba lo haci un ultimo excepcion. Partido AVP por tene nan actividad politico na MFA Noord. Pero esaki lo ta e ultimo biaha”, Prome Minister Evelyn Wever-Croes a enfatisa.

Gobierno tumando e decision aki, a scapa Aruba 1 miyon Florin tambe cu Partido AVP a pidi Gobierno paga na boet si en caso Gobierno no laga nan uza e edificio diamarsa awo mientras cu AVP a paga un suma chikito di 140 Florin pa e uzo di MFA Noord.

- Advertisement -

DUNA COMENTARIO

Please enter your comment!
Please enter your name here