Home General AVP ta insisti cu gañamento, medida, persecusion y censura no ta loke...

AVP ta insisti cu gañamento, medida, persecusion y censura no ta loke Aruba kier!

47
0
SHARE
- Advertisement -

ORANJESTAD (AAN): Algun di e criterionan principal di un bon gobierno, ta cu e ta papia berdad cu pueblo. E ta informa y dialoga cu pueblo. E ta un gobierno cu ta traha pa tur hende y no ta trata un parti di pueblo bon y e otro malo. E ta un gobierno cu ta traha na fabor di pueblo, cu ta tuma decisionnan cu ta beneficia e pueblo y ta yuda e pueblo bay dilanti. Un bon gobierno ta scucha pueblo, henter e pueblo, no solamente su propio famia y amigonan. Un bon gobierno ta scucha pueblo tambe ora ta trata di cosnan menos agradabel of ora tin critica. Critica ta essencial pa tur gobierno cu pueblo a pone.

Segun fraccion di AVP, si aplica e criterionan di un bon gobierno na e gobierno cu Aruba tin awor aki, bo ta yega na e siguiente conclusionnan: GAÑA ENBEZ DI PAPIA BERDAD

E lidernan di e tres partidonan den gobierno di Aruba den poko tempo a worde caraterisa pa e gañamento sin fin. For di den oposicion a bisa cu nan tin plan y solucion pa tur asunto, pero den gobierno a resulta cu nan no tin net net nada pens’a ni prepara. Den oposicion y den campaña e tres partidonan MEP, POR y RED a priminti pueblo un cantidad grandi di cos, pero den gobierno nan no por ni ta cumpli cu nada di loke nan a priminti. Awor hasta nan ta nenga y gaña cu nunca nan a priminti.

E gobierno di MEP POR y RED ta tuma decisionnan grandi sin informa pueblo. Hasta ora nan informa, nan ta gaña. E gañamento aki a laga nan votadornan disgusta y e otro votadornan a haya confirmacion cu nan no ta di confia!

Enbez di traha pa tur hende y no pa un parti so, e tres partidonan MEP, POR y RED, ta trata nan famia y amigonan den forma super special. Casa, rumannan, primo, tanta y amigonan ta worde nombr’a den posicionnan halto den gobierno. Pero si bo no ta di famia y amigo of cu Bo tin un otro opinion of partido politico, Bo ta worde persigui! Desde cu MEP, POR y RED a sinta mas cu 300 hende a perde trabao den gobierno. Proyectonan di companianan priva a worde boicotea, peticion na gobierno di hende cu no a vota pa MEP, POR y RED ta worde want’a y peticionnan di amigo y famianan ta haya preferencia. Reglanan di nos pais cu mester conta pa un y tur, ta worde aplica segun boluntad y mal beis di e minister. Atrobe bou di un gobierno di MEP, ciudadanonan mester bay huez pa busca nan derecho!

E partidonan RED, POR y MEP a bisa cu nan tin solucion pa tur asunto den nos pais. Nan a bisa cu nan lo goberna SIN MEDIDA. Apenas 6 luna den gobierno, despues di a gaña pueblo cu nan tin plannan y solucion, despues cu nan a priminti un sin fin di cos, MEP, POR y RED ta tuma e MEDIDAN di mas pisa den historia di nos pais. No ta djies e BBO nan a redobla cu ta bay pone tur producto y servicio subi. Ariba esaki ta bini e aumento di accijns riba gasolin, e BBO di 6% riba tur pago via banco, e BBO di 6% riba tur seguro, e BBO di 6 % riba carchi di telefon, aumento di BBO di 6% riba e dos schakelnan di benta di gasolin, aumento di prijs di pan y tur cuminda y bebida, aumento di airporttax cu 40%. Ariba esey ta kita 100 Florin di reparatietoeslag di 12 mil pensionado cu AVP a pone! Anto awor ta sali na cla cu tur e medidanan aki NO ta pa paga niun debe, pero nan ta pa MEP POR y RED haya placa pa gasta na nan “friends and family” y pa nombra nan amigonan so den gobierno.

Un bon gobierno lo respeta opinion di tur hende y di tur organizacion. Pasobra ta asina nos pais ta. Ta e libertad di expresion aki ta haci nos liber y fuerte como pais. Pero hasta esaki e gobierno di POR RED y MEP ta elimina. Nan so kier dicidi tur cos. Nan so kier domina tur cos. Y nan NO ta tolera niun otro opinion. Menos aun critica. Pesey MEP RED Y POR ta purba sera boca di tur hende y tur medio di prensa cu ta informa pueblo y expresa critica. Esaki NO ta loke nos pueblo kier. Y ta na pueblo mes pa STOP MEP RED y POR prome cu nan caba di daña nos pais!

- Advertisement -

DUNA COMENTARIO

Please enter your comment!
Please enter your name here