Home Hudicial Awe e Agente di Polis cu a dal mucha mata cu auto...

Awe e Agente di Polis cu a dal mucha mata cu auto dilanti Hues

905
0
SHARE
- Advertisement -

ORANJESTAD (AAN): Diaranzon mainta, despues di tres aña, porfin Ministerio Publico ta cuminsa un caso penal contra un agente di Polis, kende ta worde sospecha di tabata core auto bou influencia di alcohol y a dal un mucha mata.

Despues cu e mayornan a dicidi di cuminsa un caso, Hof a dicidi cu Ministerio Publico mester cuminsa un caso penal contra e agente di Polis femenino di inicial J.V. kende ta worde sospecha di a dal Zinnia Croes cu auto cu a causa su morto.

E acusacion contra J.V. ta cu riba 13 di Maart 2015, e tabata coriendo auto bao influencia di alcohol, glasnan getint y cu velocidad. Door di esaki e no por a reacciona na tempo den Spaans Lagoenweg y a dal e mucha Zinnia Croes cu consecuencia cu e mucha a fayece.

Aparentemente door cu J.V. tabata bao influencia, e no tabatin atencion cu e mucha a cruza caminda su dilanti. E no por a kita y tampoco brake na ora.

PAKICO A TARDA?

Matutino DIARIO por a compronde cu e caso aki a haya hopi atencion den comunidad. Tabatin procedimentonan pero tabata parce cu sea mando policial of Ministerio Publico no kier a persigui e agente di Polis.

Esaki tabata un sla hopi duro pa famia y amistadnan cu no ta mira cu ta haci husticia.

HOF A ORDENA PA BIN CU CASO:

Na dado momento, mirando e tardamento, e mayornan di e victima Zinnia Croes, a dicidi di cuminsa un caso, a base articulo 15 di “Wetboek van Strafvordering”. Esaki ta un procedimento poni den ley cu ta derecho di un y tur ora ta sinti cu husticia no ta worde haci.

Tres Hues cu ta forma Hof a bay evalua e caso. Hof despues di a analisa henter e caso a dicidi cu mester haci husticia. Hof a ordena Ministerio Publico pa persigui e agente di Polis.

CASO PENAL:

Finalmente, mas cu tres aña despues di e lamentable accidente, Ministerio Publico ta cuminsa e caso penal contra e agente di Polis. Esaki no ta un caso facil. Mayornan y familiarnan porfin lo por ta satisfecho, cu despues di un lucha, ta haci husticia pa morto di nan yiu stima.

Lo ta interesante pa scucha con Ministerio Publico lo bay atende cu e caso aki. Hues lo kier sa pakico a tarda asina hopi cu e caso aki. Comunidad ta ancioso pa scucha kico lo ta e exigencia di Fiscal den e caso aki.

DIARIO lo cubri e caso y lo informa lectornan di tur loke sosode den Corte.   E potret ta mustra con e Hyundai Tucson di e Polis a keda.

- Advertisement -

DUNA COMENTARIO

Please enter your comment!
Please enter your name here