Home Hudicial Awe ta sigui cu caso di tiramento

Awe ta sigui cu caso di tiramento

71
0
SHARE
????????????????????????????????????
- Advertisement -

ORANJESTAD  (AAN)  – E caso penal cu Ministerio Publico a cuminsa contra e sospechoso A.F., cu a wordo posponi na Februari 2018, ta sigui awe. Na Februari 2018 Hues a dicidi di pospone e caso pasobra na opinion di e sospechoso, loke Hues ta lesa cu ta A.F. lo a manda como mensahe riba whatsapp no ta asina.

Segun A.F., ta e Venezolano “Pinocho” a mand’e e mensahenan. Ademas di esey, abogado di A.F., mr. Carlo, a cuestiona e hecho cu net e parti cu ta mustra kende ta esun cu lo a tira, Polis a laga afor den e traduccion di combersacionnan.

TIRAMENTO

E acusacionnan cu Fiscal a presenta contra A.F. ta cu riba 14 di Februari 2017 den careda di 2’or di marduga, A.F. a tira riba e hombernan A. y K. Fiscal ta considera esaki un intento di asesinato. Tambe e ta acusa A.F. di tabatin un arma di candela ilegal.

TA DEN GANG OF NO?

Hues a bisa cu A.F. ta forma parti di gang di Madiki. A.F. a bisa Hues cu antes, mas o menos na 2000, e tabata forma parti di gang pero awor no mas. El a bisa Hues cu nan ta simplemente amigonan cu ta sinta hunto. Hues a remarca cu esaki ta straño pasobra constantemente tin tiramento entre e dos gang di Madiki. A.F. a bisa Hues cu ta berdad cu tin dos gang pero e no ta pertenece na ningun gang.

TIRAMENTO

Hues a bisa cu A.F. lo a tira riba cas di e dama H.A. y e homber K. A.F. a remarca cu no ta berdad y cu e tabata hunto cu e otro sospechoso J.H. y cu ta un tal Venezolano “Pinocho” lo a tira. Hues a mustra cu 13 Februari 2017 e homber B.A. lo a tira riba dje y riba otronan cu tabata para dilanti un bar. A.F. a bisa cu ta berdad. Segun A.F. ta nan tin problema cun’e pero e no. E no tin problema y no tin rabia. El a bisa Hues cu su intension ta pa bay biba na Hulanda. A.F. a bisa cu K. a bay papia cun’e despues cu B.A. a tira y a bisa cu e no kier tin problema cun’e y cu ta B.A. a tira.

MENSAHENAN RIBA WHATSAPP

Hues a mustra cu segun e raport di Polis, A.F. lo tabata manda mensahe cu e Venezolano Pinocho y cu A.F. a bisa cu e tabata rabia cu nan a tira riba dje. El a bisa su siguiente dia 14 Februari 2017, cu el a tira riba e cas di A.

E sospechoso A.F. ta para riba cu e no a manda e mensahe ey. Abogado mr. Carlo a pidi Hues pa lesa esaki for di e procesverbaal y na Papiamento. Hues a bay lesa esaki y abogado mr. Carlo a remarca cu net e text tocante esun cu lo a tira, no ta para den e procesverbaal. E abogado a bisa cu Hues a lesa loke e Recherche a conclui.

HUES KIER CLARIDAD

A.F. a bisa Hues cu ta e Venezolano “Pinocho” a mand’e e mensahe despues di a scucha nan combersacion tocante tiramento.

Hues a bisa cu e ta haya cu lo ta mihor pa describi tur combersacion pasobra loke ta para no ta cuadra cu loke A.F. ta splicando. Hues a pospone e caso pa asina Polis bay check combersacionnan y traha un procesverbaal. A keda palabra cu awe ta sigui cu tratamento di e caso.

DIARIO lo informa lectornan tur loke a sosode den sala di Corte di Husticia.

 

- Advertisement -

DUNA COMENTARIO

Please enter your comment!
Please enter your name here