Home Ciencia y Tecnologia Awor tin cu enfrenta e crisis di desperdicio na Parkietenbos na un...

Awor tin cu enfrenta e crisis di desperdicio na Parkietenbos na un manera responsabel y sostenible

14
0
SHARE
- Advertisement -

Despues di mas cu 60 aña

ORANJESTAD (AAN): Den añanan 1950 nos Parkietenbos a worde coba y a fungi como e unico landfill na Aruba pa decadanan. Awe mas cu 60 aña despues, ainda nos ta deposita tur tipo di desperdicio na Parkietenbos cu ta cubri un area actual di 16 hectare cu a sobrepasa su capacidad maximo y cu awo ta yegando un haltura di 50 meter.

Mas cu 60 aña pasa durante e periodo cu Aruba a conoce un crecimento grandi den economia, a coba un buraco hundo di casi 30 meter na Parkietenbos cu te dia di awe ta worde uza pa deshaci di desperdicio. Durante periodo di 1992 pa 1994 a laga traha un “dijk” pa contene e desperdicio di Parkietenbos den un area mas specifico, di 12 hectare.

No obstante, e dump Parkietenbos a keda crece y e situacion a empeora cu candelanan frequente cu tabata produci huma toxico y dañino afectando henter e vecindario y e isla completo.

Na aña 2001 a bin cu un plan di emergencia pa combati cu e candelanan aki y un area addicional di 4 hectare a worde introduci como parti di Parkietenbos na aña 2004, cu un maximo capacidad di 5 aña. Awe despues di casi un decada ainda nos ta tirando desperdicio na Parkietenbos y awo nos tin cu enfrenta e crisis grandi di desperdicio cu solucionnan concreto pa un maneho di desperdicio mas responsabel y sostenibel pa Parkietenbos.

Na Aruba nos ta produci entre 130 pa 150 kiloton di desperdicio solido pa aña cu ta worde deposita sin worde separa of procesa na Parkietenbos. Na aña 2005 Gobierno di Aruba a introduci un plan pa construi un planta di Bouldin & Lawson na Parkietenbos cu lo por a contribui pa reduci e desperdicio cu ta worde tira na Parkietenbos cu casi 90% for di cual a produci un material cu yama “fluff”di e desperdicio procesa.

E planta di Bouldin & Lawson a inaugura na aña 2009 y desde comienso no a funciona debidamente. Despues cu diferente investigacion a constata cu e “fluff” tabata contamina, a pone un stop na e operacion di e planta aki na aña 2011. Nos ta na aña 2018 y te ainda e planta na Parkietenbos ta sera y te ainda Gobierno di Aruba no a bin cu un otro solucion pa combati e crisis di desperdicio na Parkietenbos.

Serlimar S G si ta boga pa un cambio na e bienestar di nos comunidad pa caba cu e crisis actual di desperdicio, cu nos tin cu enfrenta despues di a neglisha esaki pa mas cu 60 aña. Pa es motibo Serlimar S G a haci dos peticion publico pa informacion “Request for Information (RFI) pa:

RFI 1 – Solid Waste Treatment Facility

RFI 2 – Landfill Remediation and Sanitary Landfill

Serlimar S G ta actualmente den e proceso di RFI 1 caminda a ricibi informacion di companianan local y lo continua cu e proceso pa ricibi prosupuestonan relaciona cu desaroyonan di RFI 1, pa pone e planta na Parkietenbos back den operacion cu e meta pa reduci e desperdicio cu ta worde deposita riba Parkietenbos y pa asina continua cu RFI 2 cu e meta pa remedia nos Parkietenbos.

Pa alivia e situacion critico na Parkietenbos, Serlimar S G a urgi pa bin cu un solucion temporario caminda a firma un acuerdo oficial cu EcoGas na comienso di Juni di 2018. EcoGas lo cuminsa procesa y paketa tur desperdicio residencial cu ta worde colecta pa Serlimar S G durante un periodo di 6 luna. Tur desperdicio ta worde procesa y ta worde paketa den “envirobales” cu lo worde dera structuralmente na Sero Teishi cu ta bou maneho pa Serlimar S G. Sero Teishi ta un area special di calichi cu por contene “envirobales” sin causa peliger na e medio ambiente. Serlimar S G a opta pa traha conhuntamente cu EcoGas pa asina haci uzo di nan planta cu ta separa desperdicio contamina y toxico, specialmente metal, cu ta haci cu e resto di desperdicio cu ta worde paketa den “envirobales” no ta contamina. Serlimar S G tin e maneho completo di Sero Teishi y ta informa comunidad cu e acuerdo cu EcoGas no ta un solucion permanente cu lo soluciona e crisis di desperdicio na Parkietenbos, pero e ta un solucion temporario pa alivia e situacion critico na Parkietenbos. Sero Teishi pues no ta destina pa bira e di dos Parkietenbos na Aruba y ta worde maneha estrictamente door di Serlimar S G.

Serlimar S G ta na altura di tur e desaroyonan cu mester tuma luga pa trata e crisis di desperdicio na Parkietenbos y ta trahando duro pa bin cu solucionan na un forma corecto y responsabel. Pa mas informacion tocante e topico di Parkietenbos of Sero Teishi por tuma contacto cu Serlimar S G na 5245080 of manda un mensahe riba Facebook Messenger.

- Advertisement -

DUNA COMENTARIO

Please enter your comment!
Please enter your name here