Argentina ta contento cu nan ta yega!
ORANJESTAD (AAN): E situacion pa Venezolanonan ta birando peor! Awor a sali na cla, cu cada 20 minuut un Venezolano ta yega pa biba na Buenos Aires. Esey ta loke un oficial di Embahada di Argentina a laga sa.
Argentina ta ricibiendo hopi Venezolano, miles di nan cu ta traha den diferente sector y sociedad di e pais cu ta nan anfitrion nobo. El a splica cu e legislacion di Inmigracion di Argentina no ta frena, y mas bien ta stimula yegada di e ciudadanonan.
Venezolanonan a bin ta sinti nan mes hopi comodo na Argentina. Ey nan ta traha, ta adapta na e costumbernan, y ta hende hopi balora. E ta un coriente inmigratorio hopi aprecia, cu ta hayando bon cobertura di prensa, nan ta hende cu ta empresario, gusta trabao y haci esfuerzo.
E situacion economico y social asina dramatico manera di Venezuela, ta genera e tendencia cu ta pone Argentina un destino ideal pa e poblacion cu ta emigrando.
Argentina tin un rol principal den derechonan humano, y esaki tin di haber cu nan historia politico recien. Recien mes DIARIO a mustra un relato con un famia a muda di Maracaibo te Argentina, coriendo den nan Chevrolet Spark chikito, y a dura casi 30 dia pa yega.
