Home Parlamento “CAFT no ta interesa si Minister ta baila bon pero si pa...

“CAFT no ta interesa si Minister ta baila bon pero si pa e por conta bon”

61
0
SHARE
- Advertisement -

Parlamentario Arthur Dowers

ORANJESTAD   (AAN):  Segun Parlamentario Dowers, no ta ningun sorpresa e carta di ‘waarschuwing’ cu Minister di Finansa y gabinete Wever Croes a haya siman pasa for di CAFT, caminda ta duna gobierno un siman di tempo pa aclaria aspectonan den e presupuesto 2018 y na mes momento presenta un splicacion responsabel pa aumento barbaro den gasto adicional pa aumento di personal tuma den servicio.

Parlamentario di fraccion di AVP, sr Arthur Dowers a mustra cu e desaroyo aki tabata si spera sigur ora cu e Minister di Finansa, Xiomara Ruiz Maduro den pasado, ta esun cu a pidi pa Hulanda interveni na Aruba pa medio di CFT pero awor tin problema cu funcionamento di e comision di supervision financiero cu ta controlando su trabou.

“Minister di Finansa no solamente den pasado a bula bay Hulanda y hunto cu e Prome Minister Evelyne Wever Croes, a traha un rapport pa convence gobierno di Hulanda pakico nan tin cu  mete den asunto financiero di nos pais, suplicando pa CFT bin Aruba.

Nota curioso di e rapport cu nan ta hiba tabata e titular di ‘Feestvierend ten onder gaan,’ cu ta tipifica awendia e maneho di e minister aki,  kende na luga di tuma tur su tempo pa hinca un prespuesto adecuado den otro, a prefera di baila  den carnaval tanto aki na Aruba como na Corsou.

Awor por scucha semanalmente  y tin periodonan cu ta diariamente, Minister Ruiz Maduro sclama riba kico e tin cu haci, con e tin cu haci esakinan y pa colmo sin nocion algun di kico e tin cu haci.

Pa añanan largo a papia di mega debe, a papia di presupuestonan irrealistico di gabinete Mike Eman I y II pero awor ta CAFT ta manda bisa Minister Ruiz Maduro cu su presupuesto ta realmente irrealistico y cu e tin cu cambi esaki sino di otro forma gabinete di Reino lo interveni aki na Aruba.

Siman pasa por a scucha Minister di Finansa duna un declaracion cu gobierno a tuma solamente hendenan pa atende cu e problema social di nos pais pero lubidando cu su colega minister  integrida Oduber, ta  tumando hende den servicio tur caminda cu por.

Practicamente tur candidato di partido POR a wordo tuma den servicio na un departamento of otro, caminda a manda hendenan cas cu suspension su pago di salario, tumando otronan den servicio cu tambe ta haya un salario kisas mas halto cu esunnan cu a bay.

E problema no ta cu CAFT, e problema no ta cu gobierno di Reino pero e problema di Minister di Finansa ta cu su propio ministernan, sigur un tal Otmar cu ta tumando hende tur caminda, cu ta un gobierno riba su mes y ningun hende tin algo di bise.

CAFT a manda un mensahe cla pa gabinete Wever Croes na momento cu nan a manda e concepto di presupuesto 2018 bisando cu tin aumento di personal iresponsabel y awor algun luna despues e situacion a bira asina serio cu e comision di supervision a dicidi di menasa gabinete Wever Croes c’un ‘aanwijzing’ si e no atende cu e gastonan di aumento di personal y otro asuntonan cu no ta mucho cla.

Minister di Finansa den un reaccion reciente a mustra cu su persona no por yuda cu e ta baila bon pero en realidad CAFT awor den forma energico ta mustra Minister y su gobierno cu baila bon no ta conta den presupuesto 2018 pero cifranan realistico y adecuando, cu ta refleha seriedad y responsabilidad ta mas importante bailamento den paradanan di carnaval y Minister tin algun dia prome cu Hulanda para e jump up aki di gabinete Wever Croes sin mas,” Parlamentario Arthur Dowers a mustra.

 

 

 

- Advertisement -

DUNA COMENTARIO

Please enter your comment!
Please enter your name here