Home Hudicial Castigo pisa pa grupo cu a haci asalto arma na joyeria

Castigo pisa pa grupo cu a haci asalto arma na joyeria

572
0
SHARE
- Advertisement -

Pa e mayoria e castigo tabata igual na loke Fiscal a exigi

ORANJESTAD (AAN): Diaranzon merdia, Corte den Promer Instancia a dicta sentencia den e caso penal cu Ministerio Publico a cuminsa contra un grupo di persona cu a haci asalto arma na diferente joyeria.

Ta sospecha e grupo ta envolvi den un asalto arma na Little Europe riba 26 Augustus 2016. Tin indicacion fuerte cu e grupo aki, ta relaciona cu e caso di asalto arma na La Estrella.

Ta trata aki di cuater Venezolano y un Arubiano. E Venezolanonan ta T.V.G., R.D.G., F.G., y R.M.D. E Arubiano ta K.T. Ta asina cu ademas di e asalto arma na Little Europe, K.T. tambe ta worde acusa di tabata envolvi den e asalto arma na Gemstones riba 30 November 2016.

CASTIGONAN EXIGI PA FISCAL:

Tratamento di e caso aki a tuma lugar luna pasa y Fiscal a expresa na Hues cu e ta haya cu e grupo aki ta culpable di e asalto arma na Little Europe. El a exigi 4 aña di prison pa e sospechosonan R.C., F.G. y R.D.

Fiscal ta haya cu e sospechoso T.V.G. ta esun cu a regla pa R.C., F.G. y R.D. bin Aruba pa yuda cu e asalto arma. Fiscal a exigi 4 aña y 6 luna di prison pa T.V.G.

E Arubiano K.T., Fiscal ta haya cu e ta culpable di tanto di e asalto arma na Little Europe como esun na Gemstones. Fiscal tambe ta haya cu K.T. tabata esun cu a prepara tur cos pa e asalto arma. Fiscal a exigi 9 aña di prison p’e.

SENTENCIA

Ayera merdia Hues a bisa cu e ta haya cu no a keda suficiente prueba cu e Arubiano K.T. ta envolvi den e asalto arma na Gemstones dia 30 November 2016 y ta declar’e liber pa e acusacion ey.

Pa e resto di acusacion esta e asalto arma na Little Europe si Hues ta haya K.T. culpable y tambe e grupo R.C., F.G., R.D. y T.V.G.

Hues a condena totalmente e asalto arma cu a sacodi henter comunidad. El a condena K.T. na 5 aña di prison. Esaki pasobra e otro acusacion no a keda proba. Hues a confirma e exigencia di Fiscal pa tur e otro acusadonan. El a condena R.C., F.G., R.D. na 4 aña di prison y T.V.G. na 4 aña y 6 luna di prison.

Manera ta conoci, e acusadonan tin 2 siman pa apela e sentencia. Tempo lo mustra si e caso aki ta bay Corte Superior of no.

- Advertisement -

DUNA COMENTARIO

Please enter your comment!
Please enter your name here