Home Comentario Censura di Canal 90 ta un violacion flagrante di nos derecho humano

Censura di Canal 90 ta un violacion flagrante di nos derecho humano

70
0
SHARE
- Advertisement -

Segun ciudadano Astrid Vries

ORANJESTAD (AAN): Ciudadano Astrid Vries a expresa su opinion riba e decision pa prohibi un programa na radio pa bay den aire pa dos dia.

“Como ciudadano lo mi tin gana di expresa mi pensamento di e ultimo acontencimento relaciona cu censura di parti di Gabinete Wever-Croes. E gobierno actual a tuma e decision di censura e programa di canal 90 cu tabata permiti pueblo expresa su opinion liber over tur tema regardando interesnan general. E temanan ta varia di preocupacionan simpel te na opinionan expresando malcontento over decisionan tuma door di e gobierno actual.”

Na promer lugar como ciudadano mi ta haya cu tur hende tin derecho di expresa nan opinion. Mi no ta kere si cu lo mester yega asina leu di expresa of menaza cu morto. Cada ken ta responsabel pa e contenido di nan expresion y lo mester di wanta e consecuencianan pa cu esaki. Den e caso recien a expresa di atenta contra bida di promer minister, algo cu no mester yega asina leu pasobra no ta sano yega na tal fase.

Expresando esei mi kier ripiti cu cada ken mester ta responsabel pa loke nan ta bisa of expresa. Loke si no ta corecto ta e forma con e promer minister ta handle e caso aki. Ademas e ta importante pa remarca e dobbel moral di parti promer minister Wever-Croes. Dobbel moral di con? Ta e persona aki como lider di partido MEP y como lider di fraccion den parlamento tabata apoya su simpatizadornan abiertamente ora cu nan tabata carga caha di morto di tur parlamentario durante manifestacion. Niun dia so e no a sali publicamente distancia su mes di actonan asina aki.

Tambe e tantisimo biahanan cu simpatisadornan di MEP a menaza ex promer minister Eman cu morto via radio y medianan sociaal. Kizas e ora ey si e tabata hari y a lubida con serio e tipo di cosnan aki por ta. Su accion di censura full un programa ta mas bien pa trata na baha e “steam” cu tin contra gobierno actual pa e decenas di medida cu ta na caminda.

E ta sona como sifuera niun mandatario di e gobierno actual no kier pa ningun ciudadano expresa nan opinion pa e cosnan malo cu ta sosodiendo den ultimo lunanan. E ta normal cu emocionan por acumula y lo expresa negativo contra e gobierno pasobra cada dia ta mustra cu e ser humano no ta central mas!

Como ciudadano mi ta bay mas leu ainda y ta expresa cu Gabinete Wever-Croes ta duna señalnan di ta un dictadura! Sin conta e hecho cu e ta deliberadamente violando nos constitucion y derecho riba un opinion liber. Pueblo mester realisa cu si un gobierno constantemente ta forsa of trata na prohibi y obstaculisa ciudadanonan di expresa nan opinion nos ta bayendo den un “way of no return”. Nificando cu si bo sigui permiti Gabinete Wever-Croes di viola nos constitucion y derechonan di e ser humano, nunca mas bo lo por stop e!!

- Advertisement -

DUNA COMENTARIO

Please enter your comment!
Please enter your name here