Home Comentario Comerciantenan chikito pasando den situacion inhumano pa saca fruta na waf di...

Comerciantenan chikito pasando den situacion inhumano pa saca fruta na waf di Barcadera

237
0
SHARE
- Advertisement -

ORANJESTAD   (AAN): Ta un trato inhumano loke e comerciantenan chikito ta pasando aden pa por logra trece fruta y Berdura Aruba for di Venezuela. Berdad e frontera a habri. Desde cu gobierno a anuncia cu entrante dia 7 di Juni por trece barco cu fruta, berdura y pisca, te cu awe ta dos barco so a yega.

E prome barco “Los VV” a yega Aruba dia 8 di Juni. Djey henter siman ni holo di barco for di Venezuela. E di dos barco cu a yega Aruba for di Venezuela ta El Gocho. Esaki a yega diabierna dia 15 di Juni. E barco aki mester a drenta diahuebs pero biniendo Aruba a haya problema pasobra e pega den un banki di santo na costa di Venezuela.

A logra saca e barco for di su problema y diahuebs marduga a sali for di Venezuela y yega Aruba diabierna mainta trempan. A cuminsa descarga e barco.

Diferente comerciante chikito a yega para pafo na waf di Barcadera cu nan trucknan 7o di mainta. Eynan nan pesadiya a cuminsa. Ora cu nan a kere cu nan lo drenta pa cuminsa saca fruta, nan a keda pafo te cu merdia. Djey banda di 1or pasa a avisa nan cu nan por cuminsa drenta. Para na porta di waf di Barcadera a bolbe sali notifica nan cu ainda no tin nada cla pa nan.

Mientrastanto e 90% di carga di fruta y berdura di El Gocho tabata poni riba pier. Solo cayente tabata keinta y causa daño na tur e mercancia aki cu mester a yega Aruba e dia anterior y cu mientrastanto e dia siguiente ainda mester a keda riba waf den e solo cayente. No por a duna un motibo valido of avisa e comerciantenan kiko tabata pasando realmente.

Banda di 4’or nos reporteronan a yega na waf di Barcadera y mesora cumisa haci un reportahe riba e situacion inhumano cu tabata pasando. A topa cu e comerciantenan cu a vocifera nan mes. Loke ta pasando tabata mas bien un abuso. Parce na Venezuela ainda tin barco cu ta kedando cla cu nan papeleo pa asina legalmente sali cu fruta y berdura.

Mientrastanto ora cu e di dos barco a yega Aruba, mester a pasa den masha problema pa su mercancia wordo declara liber. Banana berde a keda den solo te bira geel. Ora cu a mira prensa presente den diez minuut a cuminsa yama e trucknan pa cuminsa carga. E momento ey 4or a bati caba y aunke a logra permtii cuater truck drenta cada biaha, ya tabata poco laat pa sali bay reparti e fruta y berdura cu mester ta for di merdia den e diferente negoshinan manera supermercado y fruteria.

Ademas mester remarca cu despues di cierto orario e comerciante mester paga 25 florin mirando cu a bira laat. E no tabata nan culpa tampoco. Tambe ta keha cu mester paga pa subi waf etc pero no tin ni un baño pa nan por a usa mientras nan tabata tin como ocho ora wardando pafo den solo pasobra no kier a duna ok pa carga loke e barco El Gocho a trece.

Ta spera cu e proceso aki por cana mas rapido den un proximo biaha y evita cu e fruta y berdura ta pasa den un situacion asina den solo prome cu e yega na e sitio di benta. Nan ta reconoce cu ainda tin cierto problema pa barconan sali for di Venezuela pero no mester ta tanto dolor di cabez pa ora nan yega pasa den un caminda di cruz y inhumano pa saca e fruta y berdura.

Despues cu tur hende a kere cu cos a normaliza, te awor ta dos barco so a drenta cu fruta y berdura. Papiando cu e comerciantenan, nan a splica cu e prijsnan no a cambia. Si esey a sosode mes ta un cambio masha chikito mes cu no ta afecta e mercado of e poder di compra di ningun hende.

- Advertisement -

DUNA COMENTARIO

Please enter your comment!
Please enter your name here