Home Gobierno Conseho di Minister a aproba pa institui un Comision di Mediacion

Conseho di Minister a aproba pa institui un Comision di Mediacion

57
0
SHARE
- Advertisement -

Pa casonan di diferencia di opinion cu Gobierno:

ORANJESTAD (AAN) — Minister mr. Andin Bikker, titular di Husticia, a informa den conferencia semanal di prensa cu Diabierna el a haya aprobacion di Conseho di Minister, pa institui un comision di mediacion, en caso di diferencia di opinion cu Gobierno.

E dignatario a splica cu hopi biaha nos ciudadanonan tin diferencia di opinion cu Gobierno, riba diferente tema, pero nan mes ta recuri na busca consehero of abogado, pero hopi biaha nan no tin e recursonan financiero pa yega na esaki.

E mandatario a duna di conoce cu ora nan ta analiza e casonan por constata cu hopi biaha ta trata di formalismo loke ta crea e diferencia di opinion entre e ciudadanonan y gobierno.

Minister Bikker a indica cu el a sinta studia e dimension aki y a ripara cu den diferente pais, incluyendo Hulanda, nan tin proyectonan piloto unda nan a institui mediadornan, cu ta analiza e casonan na un manera, no necesariamente huridico, pero ta wak e diferencianan di opinion pa resolve esakinan.

Minister Bikker ta haya hopi straño cu un persona cu ta contribui cu gobierno pagando impuesto y ta haya su mes obliga di busca abogado pa bringa gobierno. E gevoel aki e ta haya straño y cu no ta duna satisfaccion.

E ta haya cu si e ciudadano tin un derecho y razon pa haya esaki, e no tin nodi di recuri na procede y tin biaha ta tarda añanan, pa e haya su derecho.

Un di e casonan concreto ta esun di permisologia na DIMAS. Aki el a bin ripara cu tin mas 5000 bayendo pa 6000 caso di obhecion pa motibo di formalismo.

Por ehemplo un hende cu ta bayendo di su permiso nuebe pa e diez pero esaki ta wordo nenga pasobra e no por presenta un passport valido. Of cu a aplica pa firma liber pero tabata falta tres luna pa yega na su diez añanan inscribi na Censo y a wordo nenga y a keda un aña sin nan permiso y sin AZV, y esaki pa formalismo.

Nan a bay na “Bezwaaradviescommissie”, y minister tambe a bishita e instancia aki siman pasa, y a ripara cu nan tin miles di caso di retraso, netamente pasobra e personanan concerni ta presenta un caso di obhecion, su tur nan derecho, pasobra nan a haya negacion  y lamentablemente nan ta keda lunanan y hasta un aña of mas, y den hopi caso nan tin derecho riba un permiso, pero  a base di formalismo nan no a yega na dje.

E comision di mediacion cu Conseho di Minister a aproba, entre otro ta bay dirigi su mes na evalua e miles di casonan aki y kizas na un manera no huridico pero pensando riba un solucion, mescos cu ta pasando na Hulanda y rond mundo, pa duna e ciudadano su derecho sin nodi gasta miles di florin pa procede añanan tras di otro. E dignatario a subraya cu gobierno no kier pa e personanan dal nan cabes riba muraya, pero si nan tin un derecho pa esaki wordo reconoci sin cu tin cu recuri constantemente na Corte ni na “Bezwaaradviescommissie” y asina e instancia aki haya mas espacio pa casonan cu enberdad mester di su atencion.

- Advertisement -

DUNA COMENTARIO

Please enter your comment!
Please enter your name here