Home Comentario Consumidornan ta hopi preocupa cu aumento di costo di bida

Consumidornan ta hopi preocupa cu aumento di costo di bida

34
0
SHARE
- Advertisement -

Ya caba Aruba ta mucho caro

ORANJESTAD (AAN) — Bisa 1 di Juli proximo a bira pa hopi di nos ciudadanonan mescos cu na añanan 80 cu na Venezuela e ciudadania tabata papia di “Viernes negro”, tempo cu nan Bolivar a wordo devalua, y prijs di tur cos a dispara halto halto.

Na Aruba e moneda, nos florin oficialmente no a devalua pero cada dia ta bal menos y cu 100 florin no por cumpra casi nada mas. Pues, Juli lo ta e “luna preto” pa nos pueblo, segun opinion publico.

Y ta logico cu no por evita cierto expresionnan, manera esaki, for di nos conciudadanonan, cu ta e principal consumidornan di nos pais. Turistanan ta bin y ta bay, pero nos hendenan tey semper pa sostene e economia di nos pais.

Tin “rumor” ta core rond cu tarifa y awa y coriente ta bay aumenta y cu esaki lo no ta mas leu cu Juli mes. No tin claridad ainda tocante e asunto di transaccionnan bancario, y e pueblo ta sigui confundi.

Mientras tanto no tin aumento di salario, vooral pa esnan cu ta gana un tiki mas cu un minimum loon. Tin trahadornan tin mas cu 20 aña ganado entre 1800 cu 2500 florin sin wak un debchi preto di aumento, pero ketobay den e transcurso di tempo costo di bida ta aumenta sin stop.

E 2.5% di aumento riba e BBO y plus cu tin caba (awor cu BPPP acerca) ta haci un diferencia grandi riba presupuesto di consumidor. No ta cuestion di “hala faha mara” cu ta un palabra cu a bira comun cerca nos mandatarionan ultimo dianan, ta cuestion cu no tin espacio mas pa “hala faha mara”…!

Supermercadonan a cuminza ter e consumidornan caba. Un consumidor a conta na nos redaccion cu Diasabra a bay busca un paki steak cu ta un tiki mas moli y pa su sorpresa 3 pidi banda di otro tabata carga e prijs di 23 florin caba! Di 19 cu el a mira e mesun paki ey dos dia prome. Y 19 ta caro caba!!!

E consumidor no sa si acaso productonan di Venezuela tabata tey caba (den e supermercado concerni), pero fruta y berdura a bira carisimo, y no na e lugar ey so, el a bay wak otro camindanan y mesun cos! Si tur cos ta aumenta di prijs: awa, coriente, ta Dios so sa si telefon tambe, cuminda en general, pan acerca, ta minister, parlamentarionan, ehecutivonan halto y comerciantenan so lo por come (y bon) na Aruba. Resto di e poblacion ta bay pasa hamber, e famianan tur y vooral esnan cu no ta haya ni un tiki compensacion for di ningun caminda, ta bay pasa den duro!

Pueblo no kier sa mas di ken e fout ta, si ta di e gobierno cu a sinta prome cu esun di awor, pueblo so sa cu semper ta e homber chikito esun cu ta carga cu e erornan di gobierno y no ta di awor ta for di tempo cu Aruba a haya su Status Aparte! Un gobierno ta bin y gasta di mas esun cu sigui ta tuma medidanan impopular, cu e mesun ministernan cu ta tuma nan “ta lamenta” pero cu lamentacion pueblo no ta come y asina e ta! Pueblo ta semper esun cu ta paga pa picado!

 

 

- Advertisement -

DUNA COMENTARIO

Please enter your comment!
Please enter your name here