Home Gobierno Dia 3 di Juli lo reuni cu Secretario di Estado Knops pa...

Dia 3 di Juli lo reuni cu Secretario di Estado Knops pa trata ley cu el a hinca den ‘frigidaire’

27
0
SHARE
- Advertisement -

Parlamentario Rocco Tjon

ORANJESTAD (AAN): Durante conferencia di prensa di Partido MEP, lider di fraccion, Sr. Rocco Tjon a splica e proceso ultimo durante IPKO (Interparlementair Koninkrijksoverleg) e delegacion di Aruba, hunto cu delegacion di St. Maarten, Corsow y Hulanda a entrega un carta na Sr. Raymond Knops, kende ta Secretario di Estado di Hulanda, na unda a urgi e mandatario pa prome cu 18 di Juni pa entrega por escrito e plan con e ta bay percura pa prome cu November, entrega e ley pa loke ta trata  ‘Geschillenregeling’, cu ya caba a wordo entrega y tin un conseho riba esaki di Raad van State na Hulanda, pa e presenta esaki na Tweede Kamer, pa asina durante IPKO na Januari, por trata esaki.

E carta aki a wordo manda, mirando hecho, cu nan tabatin un videoconference, na unda nan a prepara pa IPKO, specialmente ‘Geschillenregeling’, e Secretario di Estado a haci un expresion na unda el a bisa cu esaki no tin prioridad y lo bay den ‘frigidaire’. Pa motibo di e expresion aki, delegacionnan di e parlamentonan a bay di acuerdo pa cada parlamento haci preguntanan por escrito na nan mandatario, pa asina haya sa ki pasonan e Secretario di Estado lo bay tuma.

A base di e carta aki, e Secretario di Estado a manda un contesta, na unda no solamente e tono no a cay na agrado di e parlamentonan, pero e contenido. E carta a indica cu e lo entrega prome cu fin di aña, un ley, e no ta referi na ‘e’ ley, cu a wordo entrega, ta djis referi na un ley. Y e hecho cu parlamentonan mester percura pa wanta nan mes bezig cu otro prioridadnan, manera nan situacion financiero.

E parlamentario a bisa cu nan a entrega un carta hopi specifico na Knops y otro mandatarionan Hulandes, den nomber di e delegacionnan pa haya sa di e mandatario, exactamente ki pasonan e ta bay tuma.  A base di e carta aki, nan a ricibi un carta riba 18 di Juni, practicamente e mesun carta cu Knops a manda caba, na unda el a bolbe bisa cu e lo entrega ‘un’ ley y no ta referi na ‘e’ ley, y esey tabata un parti hopi specifico cu e parlamentarionan a acentua den e carta cu a wordo manda.

Tjon a enfatiza cu e contenido di e carta ta inaceptable, y cu pa un  motibo of otro e Secretario di Estado no kier entrega esaki na Tweede Kamer, esaki ta completamente inaceptable!

El a indica cu riba 3 di Juli nan lo reuni cu Secretario Knops, kende ta bay ta na Aruba, pa por lo menos 20 minut, na unda nan lo splica cu e carta ta inaceptable y e por duna un contesta di berdad riba carta cu Sr. Pechtold y Sr. Gansfort a manda den nomber di tur parlamento.

Tjon ta kere cu a bira ora pa nos tur den Reino mustra madurez politico y manera el a bisa durante su discurso den apertura di IPKO, e cos di mas importante ta pa trata otro cu respet y igualdad.

- Advertisement -

DUNA COMENTARIO

Please enter your comment!
Please enter your name here