Home Hudicial Diabierna sentencia lo cay pa homber haya cu 4 arma, 140 bala...

Diabierna sentencia lo cay pa homber haya cu 4 arma, 140 bala y cantidad di droga

153
0
SHARE
????????????????????????????????????
- Advertisement -

Fiscal a exigi 4 aña di prison

ORANJESTAD (AAN): Diabierna mainta Hues di Corte den Promer Instancia lo dicta sentencia pa e homber G.D.F., pa kende Fiscal a exigi 4 aña di prison. Fiscal ta haya G.D.F. culpable di posesion di cuater arma y 140 bala. Tambe e tabatin un cantidad di marihuana.

PERSECUSION:

Na Mei 2018 tratamento di e caso a tuma lugar caminda Hues a mustra cu for di Hulanda, autoridad Hulandes a pidi pa haci investigacion na cas di G.D.F. A confisca 24.750 Dollar y mas cu 5 mil Florin. E ruman homber di G.D.F. ta deteni na Hulanda pa un caso penal.

Hues a bisa cu e cantidad di marihuana 25,7 gram na mata y mas cu 1.2 kilo bloki hash. Tambe a haya likido pero despues a resulta no ta droga.

4 ARMA Y CANTIDAD DI BALA

A haya Revolver Cal. 32 cu 6 bala. Glock cu 12 bala, revolver Cal. 38, Braunning Pistool cu cantidad di balanan. Tur armanan ta funciona bon. A haya cellular cu diferente potretnan di e armanan aki. G.D.F. a bisa cu e marihuana ta di dje. E hash tabata di su ruman. E tabata sa di un arma so y no e otronan. Hues a bisa cu a haya potret di hash riba su cellular. Segun G.D.F. ta potretnan cu el a saca pero no ta e blokinan cu a haya. Segun G.D.F. , su ruman cu a bay Hulanda a laga e droga den su camber. E no sa unda a haya e hash. G.D.F. a bisa cu a saca potret di armanan den camber di su ruman homber.

El a splica cu su ruman homber a laga e armanan den su camber sin cu e sa. E sa di un cu el a mira su ruman laga den lachi di un cashi. E ruman a haci esey pasobra lo mester a haci den su camber limpi.

G.D.F. a bisa cu e tabata cuida e cas di e señora y su ruman homber kendenan ta biba den exterior. E señora tambe a cay sera. El a bisa cu 10 mil Dollar tabata destina pa construccion na e cas. E resto di placa e yiu homber di su ruman homber a trece for di Hulanda. E Florinnan segun G.D.F. ta di dje cu el a spaar.

Hues a remarca cu loke G.D.F. a declara na Polis ta diferente di loke ta declara awor. Su mama y su señora ta bibando na e cas ainda.

FISCAL A EXIGI 4 AÑA DI PRISON

Fiscal a bisa cu e ta haya legalmente proba cu sospechoso ta culpable di posecion di arma y droganan. Haya cu G.D.F. ta busca manera ta tira culpa riba su ruman homber. A confront’e cu diferente combersacionnan caminda e tabata purba gaña cu ta su ruman pero a lo largo e mester a admiti cu e tabata papia.

Pa cu castigo, tene cuenta cu promer biaha cay sera. E kier duna impresion cu e no sa di nada y tira culpa riba su ruman homber. Fiscal a menciona cu por bien ta cu e armanan lo ta worde usa pa haci asalto. Un di e armanan a purba kita e number di serie. Exigi 4 aña di prison.

Fiscal a splica cu e 3 Autonan, scooternan y placanan cu a worde confisca, a cuminsa un investigacion financiero y no por tuma un decision riba esakinan.

DEFENSA

Abogado mr. Lejuez a bisa Hues cu e ta haya exigencia di Fiscal fuera proposional. G.D.F. no tabata sa mes cu tabatin asina hopi arma y balanan. Aki no ta trata di un caso caminda e sospechoso lo ta anda cu armanan y cu a haya nan den lachi den cashi. Tres di e armanan tabata scondi. Normal pa situacionnan asina mester duna castigo abao. Awor Fiscal ta pretende cu lo por ta cu lo tabata busca bende di e armanan y lo por a fia otronan pa haci asalto. Fiscal mester prueba esakinan y no bin specula cosnan sin prueba. G.D.F. tabata sa solamente un arma cu tabata den un lachi di cashi.

Pa loke ta e droga, G.D.F. a bisa cu e marihuana ta di dje y no sa di e hash. Awor Fiscal ta bin specula cosnan cu no ta cuadra cu e acusacion. G.D. F. a bisa cu e ta usa marihuana. Pesey e abogado ta haya cu e castigo mester ta hopi mas abou cu loke Fiscal a exigi. Mustra cu e placanan confisca no ta procedente di fuente criminal. E Florinnan ta loke nan a spaar y e Dollarnan ta di e ruman homber na Hulanda cu a manda pa traha riba e cas y pa mantencion di e cas y nan mes y e mama. Pidi Hues pa ordena debolbe e 3 autonan y 2 scooter.

Hues a sera tratamento di e caso y a bisa cu e ta bay studia e caso y a palabra cu mayan lo tin sentencia. DIARIO lo informa lectornan di kico e decision di Corte ta.

 

- Advertisement -

DUNA COMENTARIO

Please enter your comment!
Please enter your name here