Diabierna tin caso tristo di pareha sospecha di a mata dos mucha

    200
    0
    SHARE
    - Advertisement -

    Caso di Rishandroh y Eugene…

    ORANJESTAD (AAN): Diabierna mainta e homber Gaby M. y e muher R.F., sospechosonan di e lamentable caso di matamento di e muchanan Rishandroh y Eugene, lo mester a presenta den Corte pa tratamento di e caso penal contra nan.

    Na Maart 2018, tur dos sospechoso mester a presenta dilanti Hues pero solamente R.F. a presenta. G.M. no kier a sali for di KIA pa bay Corte. E dia ey e caso tabata pro forma.

    Den sala di Corte tabata un grupo di persona cu flanelnan “Stop abuso di mucha”. E tata biologico di e mucha a presenta den sala di Corte cu e flanel bisti mientras cu ariba tabatin un cantidad di hende tambe. E sospechoso dama R.F. tambe a bin cu un flanel asina bisti.

    CASO POSPONI PA MAYAN:

    Fiscal a informa Hues cu e motibo cu e caso a bin dilanti pro forma ta pasobra cu ainda e procesverbaal no ta cla. Riba conseho di psychiater mester laga psycologo traha raport di e dos sospechosonan tambe. Ya caba nan a worde scucha y awor ta cuestion di warda e raport. Fiscal a bisa tambe cu a pidi raport di Reclasering.

    Tambe a pidi un experto traduci e raport di autopsia di e dos muchanan. Fiscal a propone pa tratamento di e caso tuma lugar dia 15 Juni 2018, esta mayan mainta. Hues despues di a scucha e abogadonan, a pospone e caso pa mayan 15 di Juni 2018.

    SOSPECHO DI A MATA E DOS MUCHANAN:

    Na Maart 2018, Fiscal a acusa e pareha, e homber G.M. y e muher R.F., cu den e periodo di 21 November pa 24 November 2017, a dal e mucha Rishandroh Anastacia diferente biaha cu forza na cabez cu consecuencia cu el a fayece.

    G.M. y R.F. tambe ta worde acusa cu entre 1 Augustus 2014 y 20 November 2017, cada biaha a dal Rishandroh diferente biaha cu forza cu a causa cu e mucha a kibra wesonan.

    Tambe Fiscal ta acusa e pareha cu entre 1 September 2017 y 31 October 2017 a dal Eugene na cabez y door di esey el a dal su cabez contra conchi di toilette cu consecuencia cu el a fayece.

    Fiscal ta acusa nan tambe cu entre 1 Augustus 2014 y 1 September 2017 a dal Eugene diferente biaha te cu e mucha a kibra ribchi. Fiscal ta considera esaki maltrato severo.

    G.M. tambe ta worde acusa cu entre 1 Augustus 2014 y 24 November 2017 a maltrata su partner R.F. diferente biaha cu mokete y palo di basora.

    Tambe G.M. ta worde acusa di a dera e mucha Eugene pa sconde e fayecemento.

    R.F. ta worde acusa cu entre 1 Augustus 2014 y 24 November 2017, a laga e muchanan Rishandroh y Eugene den estado desampara.

    Mayan mainta tratamento di e caso lo ta y DIARIO lo informa lectornan di tur loke sosode den sala di Corte di Husticia di Aruba.

     

    - Advertisement -

    DUNA COMENTARIO

    Please enter your comment!
    Please enter your name here