Home Cultura Diadomingo awor tin Concierto Dominical Donny Lacle

Diadomingo awor tin Concierto Dominical Donny Lacle

28
0
SHARE
- Advertisement -

ORANJESTAD (AAN): Comision organizador di Concierto Dominical Donny Laclé ta invita tur su fiel bishitantenan y Aruba en general pa e siguiente concierto cu lo tuma luga diadomingo awor dia 24 di juni, di 11or di mainta te 1or di merdia. Esaki lo tuma luga den “Café Musical” den sala di Biblioteca Nacional den Madurostraat. Un biaha mas e comision organizador a logra hinca un bunita programa den otro.

E concierto ta habri cu presentacion di studiantenan di school di Musica Rufo Wever. Bou guia di Hester Matthijsse, Johnny Croes, Rob Rijnbout y Ryan Maduro nan lo ofrece nos un variacion di musica riba piano, fio, cuarta, guitara y percusion.

Pa Justin Peña e diadomingo aki lo ta un dia special. El a pidi pa presenta den e concierto pa di e manera aki e por yama danki na tur esnan cu door di nan donacion den e caha di glas a yud’e pa e por a sigui su lesnan na school di musica. Anto pa aki algun siman e por subi avion pa sigui su estudio di guitara na ArtEz Hogeschool na Zwolle, Hulanda.

Despues ta sigui un grupo cu a yega di presenta cerca nos algun biaha caba. Mariachi Lirios del Campo, bou guia di Vicente Tromp, tin 6 integrante kendenan lo toca guitara, vihuela, bajo, simfonia di mano, percusion y naturalmente canta.

Ronadalla, “Universo di Aruba”, consistiendo di 12 cantante y alavez guitarista ta cera nos concierto. Bou guia di Frank Croes nan lo brinda nos musica romantico, cu acento riba nos musica crioyo. Kier meen bisti bo sapato comodo pa bo por balia.

Pues un y tur ta keda cordialmente invita pa asisti na e concierto diadomingo awor. Comparti e invitacion aki cu bo famia y bo amigonan.

Entrada ta gratis, pero a cambio e organizadornan ta spera di ricibi un donacion den e Caha di Glas cu den pausa ta pasa rond. Fundacion Donny Laclé, cu ta maneha e donacionnan na fin di november lo haci diferente hoben cu hopi talento musical hopi contento cu un yudansa financiero cu ta duna nan e oportunidad pa desaroya nan talento musical optimalmente.

Nos ta topa diadomingo!!

- Advertisement -

DUNA COMENTARIO

Please enter your comment!
Please enter your name here