ORANJESTAD (AAN): Diadomingo awor, 10 di juni, pa 4’or di atardi den Cas di Cultura, alumnonan di school di Musica Rufo Wever, bao di guia di e docentenan, lo brinda amantenan di bon musica nan concierto di fin di aña escolar.
DIARIO a compronde cu nan lo presenta un programa varia den estilo y combinacion di instrumentonan pa cera e aña escolar 2017/2018.
Nan lo interpreta cancionnan crioyo, regional y tambe internacional. E alumnonan lo demostra nan abilidad riba diferente instrumento, entre otro instrumentonan Orff, piano, baho, guitara, cuarta, drums, percusion, fio, trompet y tambe canto.
Lo presenta den gruponan chikito, grandi y tambe como solista. Carchi ta obtenibel cerca administracion di school di Musica Rufo Wever na Cas di Cultura piso ariba y na porta dia di e concierto.
