Home Hudicial Diescinco aña di prison exigi pa homber cu a tira otro mata...

Diescinco aña di prison exigi pa homber cu a tira otro mata na Santa Cruz

181
0
SHARE
- Advertisement -

ORANJESTAD (AAN): Diabierna mainta e homber Igmar “Tilico” L. (29) a scucha Fiscal exigi 15 aña di prison p’e. Fiscal ta haya Tilico culpable di a tira Edward “Ponsy” Thiel mata riba 23 Februari 2018 y tambe a tira riba e ruman di Edward, Dito. Den e articulo aki DIARIO ta publica e exigencia di Fiscal y e defensa di abogado mr. Illes, mientras cu den un otro articulo ta publica tur loke a sosode den sala di Corte di Husticia di Aruba.

    EXIGENCIA DI FISCAL:

Fiscal a Hues cu dia 23 Februari 2018, Edward Thiel a muri door di un tiro cu a bora su curazon. Tilico a los diferente tiro y un tiro a gara victima. Investigacion di Polis a mustra cu riba un distancia di 4 meter, e sospechoso Tilico a tira Edward.

Na opinion di Fiscal, esaki ta mustra un asesinato. E pregunta ta si esaki ta premedita of no. Fiscal ta haya cu for declaracion di tur testigonan, tabatin un discussion entre Tilico y Edward. Despues Edward a pusha Tilico y Tilico a pusha bek. Ningun hende a mira cu Edward lo a dal Tilico mokete na cabez manera Tilico ta bisa. Tilico a bay paden y sali cu un arma y cuminsa tira.

    ASESINA OF MATA?

Na opinion di Fiscal, esaki ta un indicacion fuerte cu ta premedita. Fiscal a bisa cu Tilico ta bisa cu el a tira ora Edward a cana bay riba dje. Otro testigonan a bisa cu Tilico a sali y cuminsa tira. Tin otro testigonan ta bisa cu ora Edward a cana bay riba Tilico, el a tira.

Fiscal ta haya cu aki por papia di a mata y no asesina pasobra no ta premedita. No por papia aki di defensa propio tampoco. El a bisa cu Tilico ta papia di tabata panico.

Tambe Fiscal ta haya proba, intento di mata di e ruman Dito. Fiscal a bisa cu segun Dito, Tilico a los tironan riba dje pero el a hala Tilico su man. Tilico mes a declara na Polis cu el a purba tira Dito pero no a logra.

    CASTIGO:

Fiscal a bisa cu mata un hende ta e delito di mas serio cu por sosode. Awor e famia mester biba sin nan ser keri. Fiscal no ta mira ningun motibo pakico Tilico a bay coy arma y tira mata y purba mata e ruman di e victima. El a bisa cu e ta tene cuenta cu e carchi di castigo di Tilico cu tin dos sentencia pa posecion di arma di candela. Fiscal ta haya cu diferente biaha a bati riba Tilico su dede pa arma pero toch e no ta stop. Awor el a bay asina leu di tira mata.

Fiscal a exigi 15 aña di prison, kitando e tempo cu Tilico ta sera den KIA. El a pidi Hues pa aproba e demanda di Dito di 1200 florin. Tambe pa aproba e gastonan di entiero di mas o menos 9 mil florin. E otro demandanan ta bira fastioso. Fiscal ta kere cu e famia lo mester haci un caso civil.

    ABOGADO:

Mr. Illes a bisa Hues cu for di investigacion no por papia di premedita. E ta comparti punto di bista di Fiscal esta cu no ta premedita sino cu Tilico a mata. Na opinion di e abogado, for di declaracion di algun testigo por puntra si Tilico tabatin e suficiente tempo pa pensa riba loke el a haci. Cosnan a pasa asina liher tras di otro cu e no tabatin tempo pa pensa. E abogado ta kere cu aki ta un caso di mata y intento di mata. E no ta haya e castigo exagera mirando e dos delitonan. E abogado a sigui bisa cu e ta comparti punto di bista di Fiscal tambe pa cu e demanda di daño di gasto di entiero.

E abogado mr. Illes a bisa Hues cu e no ta haya cu no por bay dicidi riba cria di e yiu homber di e difunto y daño inmaterial. Pa loke ta e ruman, Dito, e abogado ta haya cu no tin prueba cu el a haya menos salario manera e ta bisa. El a splica cu pa ley doño di trabou lo mester a paga 100 porciento pa 6 siman y solamente 2 siman e ta paga 80 %. Esey ta nifica cu ta solamente 175 florin, Dito por demanda.

Hues a bisa cu e ta bay studia e caso y 13 Juli 2018 tin sentencia.

- Advertisement -

DUNA COMENTARIO

Please enter your comment!
Please enter your name here