Home Hudicial Diesdos aña di prison exigi pa sospechoso di a tira riba dos...

Diesdos aña di prison exigi pa sospechoso di a tira riba dos homber

411
0
SHARE
- Advertisement -

Aunke e sospechoso ta para riba cu e no a tira

ORANJESTAD (AAN): E homber A.F. a scucha Fiscal exigi 12 aña di prison pa a tira riba e hombernan A. y K. na Madiki.

E caso ta parce un reglamento di cuenta entre gang. E otro sospechoso cu tabata hunto cu A.F., J.H. ya a wordo condena na 8 aña di prison. El a wordo haya culpable di a bay tira riba e cas y tabata riba un scooter.

E acusacionnan cu Fiscal a presenta den sala di Corte ta cu e ta acusa A.F. cu riba 14 di Februari 2017 den careda di 2’or di marduga a tira riba e hombernan A. y K. Fiscal ta considera esaki un intento di asesinato. Tambe e ta acusa A.F. di tabatin un arma di candela ilegal.

Na Maart 2018 e sentencia contra J.H. a cay. Fiscal a exigi 10 aña di prison, kitando e tempo cu J.H. ta sera den KIA. Hues a bisa cu e ta haya legalmente proba cu J.H. riba 14 Februari 2017, ta culpable di intento asesinato y posecion di arma. Hues a condena J.H. na 8 aña di prison kitando e tempo cu e ta sera caba den KIA.

   TA DEN GANG OF NO?

Na Februari 2018 durante tratamento di e caso cu despues a keda posponi, Hues a bisa cu A.F. ta forma parti di gang di Madiki. A.F. a bisa Hues cu antes, mas o menos na 2000, e tabata forma parti di gang pero awor no mas. El a bisa Hues cu nan ta simplemente amigonan cu ta sinta hunto. Hues a remarca cu esaki ta straño pasobra constantemente tin tiramento entre e dos gang di Madiki. A.F. a bisa Hues cu ta berdad cu tin dos gang pero e no ta pertenece na ningun gang.

   TIRAMENTO:

Hues a bisa cu A.F. lo a tira riba cas di e dama H.A. y e homber K. A.F. a remarca cu no ta berdad y cu e tabata hunto cu e otro sospechoso J.H. y cu ta un tal Venezolano “Pinocchio” lo a tira. Hues a mustra cu 13 Februari 2017 e homber B.A. lo a tira riba dje y riba otronan cu tabata para dilanti un bar. A.F. a bisa cu ta berdad. Segun A.F., ta nan tin problema cun’e pero e no. E no tin problema y no tin rabia. El a bisa Hues cu su intension ta pa bay biba na Hulanda. A.F. a bisa cu K. a bay papia cun’e despues cu B.A. a tira y a bisa cu e no kier tin problema cun’e y cu ta B.A. a tira.

    MENSAHENAN RIBA WHATSAPP:

Hues a mustra cu segun e raport di Polis, A.F. lo tabata manda mensahe cu e Venezolano Pinocchio y cu A.F. a bisa cu e tabata rabia cu nan a tira riba dje. El a bisa su siguiente dia 14 Februari 2017, cu el a tira riba e cas di A.

E sospechoso A.F. ta para riba cu e no a manda e mensahe ey. A base di esaki, Hues a pospone e caso pa laga Recherche bolbe mira e mensahenan. Diabierna tratamento di e caso a sigui y mester informa cu e tratamento a dura te den oranan di atardi. Esaki debi na e casonan promer cu a tuma hopi mas tempo cu a calcula.

Fiscal ta haya cu si tin pruebanan suficiente cu ta mustra cu A.F. a tira. Fiscal a exigi 12 aña di prison, kitando e tempo cu A.F. ta sera den KIA. Despues di a scucha defensa di abogado mr. Carlo, Hues a sera tratamento di e caso y a bisa cu dia 22 di Juni lo tin sentencia.

 

- Advertisement -

DUNA COMENTARIO

Please enter your comment!
Please enter your name here