Home Hudicial Dos aña y 6 luna di prison pa homber haya cu 4...

Dos aña y 6 luna di prison pa homber haya cu 4 arma, cantidad di bala y 1.2 kilo di hash

142
0
SHARE
????????????????????????????????????
- Advertisement -

E exigencia di Fiscal di 4 aña a baha

ORANJESTAD (AAN): Diabierna mainta Hues a dicta sentencia contra e homber G.d F., kende a worde haya culpable di tabatin 4 arma di candela, 114 bala y 1,2 kilo di hash. Ademas a confisca un cantidad di placanan, auto y otro propiedadnan.

FISCAL A EXIGI 4 AÑA DI PRISON:

Algun siman pasa tratamento di e caso a tuma lugar caminda Fiscal a bisa cu e ta haya legalmente proba cu sospechoso ta culpable di posecion di arma y droganan. Haya cu G.d.F. ta busca manera ta tira culpa riba su ruman homber. A confront’e cu diferente combersacionnan caminda e tabata purba gaña cu ta su ruman pero a lo largo e mester a admiti cu e tabata papia.

Pa cu castigo, tene cuenta cu promer biaha cay sera. E kier duna impresion cu e no sa di nada y tira culpa riba su ruman homber. Fiscal a menciona cu por bien ta cu e armanan lo ta worde usa pa haci asalto. Un di e armanan a purba kita e number di serie. Exigi 4 aña di prison.

Fiscal a splica cu e 3 Autonan, scooternan y placanan cu a worde confisca, a cuminsa un investigacion financiero y no por tuma un decision riba esakinan.

SENTENCIA:

Diabierna mainta Hues a bisa cu e ta haya legalmente proba e acusacionnan contra e acusado G.d F. Hues a bisa cu a base di peticion di autoridad Hulandes, a tene un razia dia 7 Februari 2018 na e cas unda G.d F. tabata kedando, cual cas realmente ta di e ruman homber. E ruman homber a worde deteni na Hulanda relacion cu caso di labamento di placa. Hues a bisa cu durante razia a haya 4 arma, 114 bala cayente, 1.2 kilo di hash.

Hues bisa cu no ta relevante di kende esakinan ta. G.d F. tabata cuida e cas. Hues a bisa cu e no ta kere e declaracion di G.d F. cu ta e ruman a sconde e armanan y cu e sa di un arma so. Hues a mustra cu investigacion a mustra cu den G.d F. su cel a haya potretnan di armanan. Esakinan a worde saca for camber di e ruman homber. Esaki na opinion di Hues, ta indica cu e acusado G.d F. tabata sa di e armanan.

Hues a remarca cu si G.d F. a mira un arma den su cashi, pakico e no a yama e ruman y reclama.

Tocante e droga, Hues a mustra cu segun G.d F. ta e ruman a sconde den su camber pa e droga no seca. 1.2 kilo di hash tabata scondi den camber. Hues a bisa cu den cel di G.d F. tambe a mira potret di paki seya di hash.

Hues a bisa cu e no ta kere e declaracion di G.d F. cu e no tabata sa di e armanan y droga.

CASTIGO:

Pa cu e castigo, Hues a bisa cu e ta tene cuenta cu e armanan tabata warda den e cas y cu e acusado no tabata cana riba caya cu esakinan. Tambe Hues a tene cuenta cu e cantidad di droga. Hues a sigui bisa cu ta promer biaha cu G.d F. ta cay sera. Teniendo cuenta cu sentencianan cu Corte den Promer Instancia y Corte Superior ta duna, Hues a condena G.d F. na 2 aña y 6 luna di prison, kitando e tempo cu e ta sera den KIA.

Hues a duna orden pa destrui e armanan, e balanan y e droga. Hues a bisa cu e no por dicidi riba e placanan y otro cosnan cu a keda confisca, pasobra autoridad na Hulanda tin investigacion andando.

Manera ta conoci, tanto e acusado como Fiscal tin chens pa apela e sentencia di Hues. Esaki lo mester sosode den 2 siman di tempo. Si sea Fiscal of abogado mr. Lejuez apela e sentencia, e ora ey ta Corte Superior lo bay trata e caso di nobo. Tres Hues lo bay evalua henter e caso y despues dicidi si e sentencia ta na su lugar of no.

E chens ta existi cu e castigo por keda mesun cos, e por baha of e por subi tambe. Ta conoci cu Hof di Corte Superior ta baha cu tur peso di ley riba tipo di casonan asina. Pero tur cos ta depende con Hof ta mira e caso. Tempo lo mustra si e caso aki ta bay Corte Superior of no.

 

- Advertisement -

DUNA COMENTARIO

Please enter your comment!
Please enter your name here