Home Salud Drs. Jerry Staring: “No comments”

Drs. Jerry Staring: “No comments”

125
0
SHARE
- Advertisement -

ORANJESTAD  (AAN): Diahuebs atardi pa casualidad a topa cu Drs. Jerry Staring, actual Director di Directie Volksgezondheid (DVG) saliendo for di Bestuurskantoor. A puntr’e pa un comentario mesora basa riba e declaracionnan haci diahuebs mainta pa Minister Dangui Oduber, relaciona cu e acusacionnan den su contra pa cu su maneho y su nombracion. “No comments”, asina el a bisa.

A purba toch pa logra saca mas informacion y un opinion di e ehecutivo di Gobierno, pero el a bisa cu mañan e tin un reunion mas cu Minister Dangui Oduber y e ora numa e lo tin mas informacion. A puntr’e si a suspende for di su funcion y el a contesta “No comments”.

Di acuerdo cu filenan di noticia, na October 2016 a tuma luga e ceremonia oficial pa anuncia postulacion di Drs. Jerry Staring Bsc como e Director nobo di Directie Volksgezondheid, tambe conoci como Departamento di Salud Publico Aruba (DESPA). E ultimo director di e departamento aki tabata Dr. Jacques van Veen na aña 1991. Despues di esey semper tabatin directornan interino of Management Team.

Jerry Staring a studia pa “verpleegkundige” na nivel HBO, pues a haya su “bachelor in nursing”. El a specialisa den psikiatria y a core “stage” den Dr. Horacio E. Oduber Hospitaal na Aruba. El a caba su estudio na aña 2002 na Hoge School Arnhem-Nijmegen. Mesora despues el a cuminsa su carera como nurse na PAAZ, mientras cu na final di aña 2003 el a bay traha na Psikiatria Ambulatorio bou Directie Volksgezondheid Aruba.

Den un esfuerso pa prepara su mes miho pa un puesto den liderazgo, el a opta pa sigui studia na Universidad di Aruba, den e facultad di “Arts & Science” cu e tema specifico di “Social Work & Development”, brinda den cooperacion cu Universidad di Puerto Rico y Vrije Universiteit van Amsterdam. Na aña 2011 el a caba cu su estudio na nivel “Master” riba maneho di cuido medico. Cu e diploma ey den su man, el a cambia di trabou y for di SPD a opta pa cuminsa un carera nobo como “Beleidsmedewerker” na Directie Volksgezondheid. Na fin di aña 2011 el a traha na FCCA como “Stafmedewerker Integraal Opbouwwerk”. Cu e conocemento, experencia y educacion obteni, entre 2011 pa 2013, Jerry Staring a fungi como “Gastdocent” na Universidad di Aruba, den e facultad di nivel Bachelor den “Social Work Development”. Na October aña 2014 el a cuminsa den e funcion di Presidente di e Management Team di Directie Volksgezondheid y dos aña despues, na october 2016, el a bira e Director nobo di DVG, despues di un proceso transparente y largo, bou auspicio di Departamento di Recursonan Humano (DRH) di Gobierno, pa busca un lider pa sigui maneha e departamento cu ta di vital importancia pa nos pais.

Jerry Staring a nace na Hulanda, su mama ta Arubiano di Socotoro, su tata un Hulandes-Europeo pero cu a traha como docente pa hopi aña na Aruba. E mes ta e unico ruman cu a nace na Hulanda. E tin 2 yiu muhe, un di 10 aña y otro di 11 aña di edad.

Di acuerdo cu nos informacionnan, ta for di aña 2015 cu Departamento di Recursonan Humano (DRH) a encabesa un comision pa recluta un Director nobo pa Directie Volksgezondheid (DVG). Un total di 13 persona a solicita pa e puesto aki. Mester menciona cu mas o menos 5 di e solicitantenan  sali for di DVG mes. E proceso a conoce 3 etapa, e prome tabata un “brievenronde”; e di dos tabata un “gesprekronde” y e di tres etapa tabata un “psychologische test” haci dor di Wever Psychology Serrvices. Despues di e 3 etapanan aki, a keda 2 candidato y di eynan Minister di Salud Publico, Cuido di nos Grandinan y Deporte a scoge Jerry Staring. Henter e proceso aki a dura mas o menos 1 aña y e comision di reclutacion a conta cu 3 miembro, 1 for di DRH (Omaira Lares), 1 for di e mundo di cuido (Gino Goeloe) y 1 tabata di Ministerio di Salud Publico (Roland Tuit RA).

Cu nombracion di Drs. Jerry Staring, Bsc den e funcion di Director di DVG, a inicia un era nobo den e departamento di Gobierno. Un cambio di cultura y introduccion di un vision y mision cu tur empleado ta reconoce y ta dispuesto pa ehecuta. Ta varios cambio y progreso tabatin den e ultimo añanan caba. Documentonan oficial den archivo di Gobierno di Aruba ta mustra cu for di aña 1917 tin un movemento riba un departamento pa maneha asuntonan di salud publico na Aruba, pues DVG of DESPA a celebra 100 aña di existencia aña pasa! Na 1917 a trece un curpa morto for di Corsou pa Aruba y asina a realisa cu mester di un maneho con ta atende cu situacionnan asina. Ta di eynan a crea un “Kinderarts Besluit” pa vacuna muchanan y tambe a nace e “Higienische Dienst” den unda a cuminsa educa comunidad riba labamento di man y cuminsa introduci reglanan pa negoshinan cu tabata bende alimento.

Pa straño cu por zona, e departamento a funciona pa casi 100 aña sin un “instelling besluit”. Comosifuera poco, nunca a traha un “formatieplan” tampoco, den unda ta stipula y ta discribi cada 1 di e 82 funcionnan den e departamento. Tampoco den e casi 100 añanan no a prepara nunca un “Personeelhandboek” den unda ta stipula e reglanan cu trahadonan mester tene nan mes na dje, ni un “Verzuim Reglement”, “Ziekteverzuim Beleid”, “Visiedocument” of tampoco un “Strategisch Plan”. Bisando esaki, ta hopi trabou, hopi investigacion, deliberacion, dialogo y inversion di tempo a bay den preparacion di tur e rapportnan, maneho y vision pa DVG.

Cu e era nobo den Directie Volksgezondheid Aruba, a haci posibel pa cambia e cultura di un “Uitvoerende Dienst” pa un “Beleids Directie”. DVG tin como meta pa fungi como e parti central den cuido na Aruba, conectando tur otro stakeholdernan. E departamento ta demostra profesionalismo, dinamismo y etica halto den tur trabou cu nan ta desplega.

Directie Volksgezondheid ta situa den Caya Ing. Roland Lacle, parti den 6 edificio banda di otro y 2 otro edificio situa na Barcadera, unda tin Servicio Veterinario y GKMB. Na tur e departamento ta conta cu 160 empleado bon prepara y capaz pa sigui desaroya e organisacion pa implementa y ehecuta maneho riba tereno di salud publico na nos isla.

 

- Advertisement -

DUNA COMENTARIO

Please enter your comment!
Please enter your name here