Home Comercio DVG tin cu percura cu productonan cu no ta apto pa consumo...

DVG tin cu percura cu productonan cu no ta apto pa consumo humano subi mercado

80
0
SHARE
- Advertisement -

Segun Yvette Geerman di Departamento di Higiena

ORANJESTAD    (AAN):   Control di productonan ta un tarea di Departamento di Salubridad Publico, nan t’ey pa proteha e comunidad a base di cualkier producto of cuminda cu no ta apto pa consumo humano. Sra. Yvette Geerman, di Departamento di Higiena di DVG, ta splica.

Ultimo temponan tabata tin hopi recall. Es decir cu ora cu haya yamada for di instancianan internacional, unda nan ta bisa cu cierto producto produci na Europa of Merca, di un of otro forma no ta apto pa consumo humano. Tabata tin esun di cerbes a constata cu tabata tin glas chikito den dje. Tambe tabata tin esun di SPAM cu tambe tabata tin cierto bacteria den dje. Ultimo tambe tabata tin e cornflakes cu tin cierto bacterianan cu ta malo pa consumo humano.

E productonan aki ta wordo controla di parti di autoridadnan di p’afo. Pero despues ora cu e productonan ta ariba mercado, ta bin constata cu tin cosnan cu no ta bon. Na momento cu nan ta constata cu e no ta bon pa consumo humano, di un of otro forma, e instancia internacional ta tuma contacto cu e instancia na Aruba (DVG). Nan ta avisa DVG y e ora como autoridad, Salubridad Publico ta tuma contacto cu e agencia. Y di biaha ta avisa pueblo, cu cierto producto cu a bin for di cierto paisnan, no ta apto pa consumo humano.

DVG ta traha cu instancianan internacional. For di parti di Europa y di Merca, cada momento cu tin un recall, nan ta yama DVG cu tin cierto producto, unda cu Aruba ta un destinacion di e producto. Mester tene cuenta cu ta hopi producto ta wordo produci pa dia. Cada producto tin su batchnummer (p.e. di e cerbes). Y a base di esey, tin recall ariba nan. Asina departamento di Salud Publico ta traha conhuntamente cu instancianan internacional.

Pa Salubridad Publico por proteha e comunidad di Aruba, e producto no ta bon door cu pafo caba a wordo constata cu tin cierto algo den nan, cu por haci hende malo, si nan come of bebe di dje. Mester corda cu e productonan aki ta wordo produci pafo di Aruba.

Mesun momento cu drenta un aviso, Aruba tambe ta ariba e lista. Nan ta ariba e mesun momento, e mesun nivel. Si tin algo cu no ta bon, mesora un ‘redflag’ ta lanta na Salubridad Publico, pa avisa comunidad. E ora conhuntamente cu e agencia, DVG tambe ta haci su inspeccion pa wak si cierto producto ariba mercado y tin biaha e producto no a bin pa Aruba.

Importacion no ta den man di DVG. Esaki ta den man di agencia y DVG ta depende di nan. Ora un supermercado ta busca un producto via un otro canal, esey no ta den nan man.

Loke ta den nan man, ta ora nan wordo avisa cu tin cierto productonan cu ta ariba mercado y cu no ta apto pa consumo humano. E ora nan ta tuma nan rol, pa avisa e comunidad. Ta tuma contacto cu e agencia, si nan tin un agencia aki na Aruba, tambe ta tuma contacto cu otronan cu ta busca productonan di containernan grandi. Asina nan tin un miho control.

Aruba su economia ta uno habri. Den nan man ta pa evita cu cosnan cu no ta apto pa consumo humano, subi mercado y pueblo core e risico di bira malo, segun Sra. Ivette Geerman, di Departamento di Higiena, di DVG.

 

- Advertisement -

DUNA COMENTARIO

Please enter your comment!
Please enter your name here