Home Enseñanza Encuentro exitoso cu studiantenan organiza pa minister Besaril y Lampe

Encuentro exitoso cu studiantenan organiza pa minister Besaril y Lampe

16
0
SHARE
- Advertisement -

ORANJESTAD (AAN); Durante su bishita di trabao na Aruba Minister Plenipotenciario señor Guillfred Besaril, hunto cu su colega Minister di Enseñansa señor Rudy Lampe y Departamento di Enseñansa a organiza un encuentro pa hobennan cu tin e intencion di bay studia na Hulanda.

Mas cu 400 studiante hunto cu nan mayornan a presenta den e auditorio di Colegio EPI pa asina ricibi informacion di Arubahuis y di Departamento di Enseñansa tocante e periodo di preparacion prome cu nan estudio. Arubahuis a duna un presentacion extenso riba locual e studiantenan por spera na momento di yega Hulanda pa loke ta trata servicionan di Arubahuis.

Minister Plenipotenciario a habri e anochi informativo cu un saludo cordial na tur studiante y mayornan. E mandatario ta sumamente contento di a mira un cantidad grandi di studiante acompaña pa nan mayornan na e encuento. Señor Besaril a comenta cu Arubahuis ta den e proceso pa haci e cambionan necesario den e organizacion pa por sirbi e studiantenan Arubano residencia na Hulanda mucho mas miho. A fortifica e forma den cual ta duna sosten y guia na e studiantenan door di entre otro amplia e team di mentoren y a facilita e proceso di contacto cu e departamento di studiantenan di Arubahuis.

James van der Linde di Arubahuis a informa e hobennan di e organizacionan pa studiantenan Arubano na schoolnan y universidadnan den e diferente ciudadnan na Hulanda. E organizacionnan aki ta organiza varios actividad pa ricibi e studiantenan pero tambe nan ta hopi activo durante e aña escolar. Sr. Van der Linde a recomenda tur studiante pa comunica cu e “studentenvereniging” di nan school pa ta na altura di nan actividadnan di recepcion.

Departamento di enseñansa durante nan presentacion e anochi aki a recorda e studiantenan tocante e reglanan di Arubalening y e rekesitonan cu e studiantenan mester cumpli cune. Pa mas informacion tocante e deadline pa entrega documentonan di Arubalening of riba e recepcion di studiantenan na Hulanda por bay riba www.arubahuis.nl of www.ea.aw. Tambe por like e pagina di Facebook di Arubahuis y Departemento di Enseñansa pa keda informa di cualkier novedad.

 

- Advertisement -

DUNA COMENTARIO

Please enter your comment!
Please enter your name here