Home Hudicial Fiscal a exigi 15 aña di prison pa padrastro y 4 aña...

Fiscal a exigi 15 aña di prison pa padrastro y 4 aña pa e mama

441
0
SHARE
- Advertisement -

RELATO EXTENSO SEMPER DEN DIARIO
Lesa con e Padrastro a admiti di mata >> AKI <<
Lesa con pueblo a reacciona furioso >> AKI <<
Lesa con no tabatin suficiente stul den Corte >> AKI <<

ORANJESTAD (AAN): Manera DIARIO a publica, Diabierna mainta tratamento di e caso penal contra e pareha, muher Risheila F. y homber Gabriel M. a tuma lugar.

E muher Risheila F. ta worde acusa di ta complice di e morto di Rishandroh (5) y Eugene (3) mientras cu e homber ta worde acusa di a mata Rishandroh y Eugene y tambe di e maltrata severo Risheila F. Tratamento di e caso tabata hopi largo. Den e articulo aki DIARIO ta publica e exigencia di Fiscal mientras cu den otro articulonan ta publica riba tratamento di e caso. Ta asina cu dos Fiscal a atende e caso aki. Den sala di Corte tabata presente e tata biologico di e muchanan y famianan. E tribunanan di sala di Corte tabata yen yen.

   EXIGENCIA DI FISCAL:

Fiscal a bisa Hues cu e caso ta hiba e nomber Speeltuin cu a cuminsa 22 November 2017 ora cu e mucha Rishandroh a yega hospital y dokternan a constata cu e mucha ta victima di maltrato severo. Polis y Voogdijraad a worde notifica y nan a bay papia cu e mama Risheila F.

E mama a bisa cu Rishandroh a cay for di glijbaan pero Polis no a kere esaki. Ta asina cu Rishandroh a keda interna den cuido intensivo. Kier a manda e pacient Rishandroh pa Colombia pero su situacion a empeora y na dado momento dokter a pidi famianan bay hospital urgente. No por a haci nada mas pa Rishandroh y na dado momento docter a kita e aparatonan y Rishandroh a fayece.

    DAL MUCHANAN MATA:

A constata cu e otro ruman Eugene ningun hende sa di dje. Autopcia riba Rishandroh a mustra cu e mucha tin diferente fractura bieu y kima na su curpa.

Fiscal a bisa cu Gabriel M. a bisa cu el a dal Rishandroh diferente biaha cu forza. Tambe el a bisa cu el a dal Eugene cu forza na cabez y Eugene a dal su cabez na toilette y a fayece.

El a mustra Polis unda Eugene tabata dera. Dia 28 November 2017 a haya Eugene dera bao di un mata di kwihi den un mondi na Savaneta. Patologo a constata cu Eugene tabatin fractura na ribchi y na cabez. Fiscal ta haya cu Gabriel M. a dal mata tur dos mucha.

    MALTRATO SEVERO:

Fiscal a sigui bisa cu Gabriel M. tambe a causa maltrato severo riba Rishandroh. A constata cu Rishandroh tabatin fractura di heup. Investigacion a mustra cu Gabriel M. tabata maltrata e mucha cu man, palo di basora y slof. E mucha a conta su mama y su oma con Gabriel M. tabata dal’e.

Fiscal a sigui bisa cu tambe a constata cu Rishandroh tabatin kima na su curpa. Segun Fiscal, Gabriel M. ta para riba cu e no a tira awa cayente riba Rishandroh . Sinembargo e mama Risheila F. y omonan a declara cu Rishandroh a bisa nan cu Gabriel M. a benta awa cayente riba dje y kim’e. Tambe a mira kima di cigaria tambe riba curpa di e mucha. Gabriel M. a nenga di a haci esaki pero durante interogacion den Corte el a admiti di tabata huma marihuana pero no kier a bisa nada.

Por conclui cu e lo tabata kima e mucha cu e cigaria di marihuana. Fiscal a bisa cu ta entre Augustus 2017 y November 2017 e maltratonan a sosode ora cu e muchanan a bay biba cerca Gabriel M. hunto cu nan mama den un apartamento.

   MALTRATA MAMA:

Fiscal a mustra cu e mama di e muchanan, e sospechoso Risheila F., a bisa di tabata worde maltrata formal door di Gabriel M. Den Corte Gabriel M. a admiti di tabata bati Risheila F. pa no busca ayudo.

Na opinion di Fiscal e batimento tabata sosode entre Augustus 2014 y November 2017.

   MAMA TA COMPLICE:

Fiscal ta haya e mama Risheila F. complice di a mata Rishandroh y Eugene. Fiscal ta haya cu Risheila F. no a actua contra Gabriel M. pa stop di maltrata su yiunan. Fiscal a bisa cu mester saca afor di Risheila F. tata sa di e maltratonan. E a mustra cu Risheila F. a declara cu Gabriel M. tabata hopi agresivo y ora e yega for di trabao e muchanan tabata keha di dolor door di maltrato di Gabriel M. Risheila F. a bisa cu Gabriel M. na comienso di September 2017 tabata bati e muchanan formal.

Fiscal ta haya cu tur esaki ta mustra cu Risheila F. tabata sa cu Gabriel M. por bati e muchanan formal. Na opinion di Fiscal, intencional Risheila F. a duna Gabriel M. e chens pa bati e muchanan formal. Esaki ta cambia dia 26 September 2017 ora cu Gabriel M. a mata Eugene. E dia ey Risheila F. a haya Eugene maltrata. Ora el a bay reclama Gabriel M., Gabriel M. a batie y hinke cu cuchiu.

Su siguiente dia, Risheila F. a ripara cu Eugene a muri. Gabriel M. a bay dera Eugene. El a menaza Risheila F. cu si e bay Polis e lo mata nan. Fiscal ta haya Gabriel M. ta responsabel pa e morto di Eugene. Fiscal a remarca cu Risheila F., sabiendo kico Gabriel M. ta capaz di dje, no a busca manera pa kita Rishandroh for di Gabriel M. Na opinion di Fiscal, Risheila F. a crea e oportunidad pa Gabriel M. por a mata Rishandroh. Esey ta haci cu Risheila F. ta culpable di complice di a mata Eugene y Rishandroh. Fiscal a sigui bisa cu tambe e ta haya Risheila F. culpable di a laga e muchanan desampara.

Fiscal a mustra cu Risheila F. a bisa cu door di angustia pa Gabriel M. e no a bay Polis. Fiscal ta haya cu no por bay bisa cu esaki ta hustifica cu Risheila F. no a actua. Ta berdad cu Risheila F. a worde maltrata y presiona door di Gabriel M. Sinembargo na opinion di Fiscal, tanto psycologo y psychiater no ta duna imagen cu Risheila F. ta angustia. E mes a declara cu nunca Gabriel M. a maltrata e muchanan su dilanti. Sino e lo defende su yiunan. Fiscal ta haya cu Risheila F. no ta duna e impresion di ta un persona den angustia sino cu e ta bira alterna. El a keda sin busca seguridad pa su yiunan.

   HOMBER A MATA E MUCHANAN:

Pa loke ta Gabriel M., Fiscal a menciona un sentencia caminda Hof a subi e castigo na 10 aña pa un tata cu a mata su yiu baby aki na Aruba. Den caso di Gabriel M. no ta un sino dos mucha.
Fiscal a mustra cu pa tempo largo Gabriel M. a bati e muchanan formal y finalmente a mata nan. Gabriel M. tabata mas bien tortura e muchanan. Gabriel M. a worde condena caba pa a hinca Risheila F. El a mata Eugene y dos luna despues a mata Rishandroh.

    NO RESPONSABEL PA MATAMENTO:

Na opinion di Fiscal, tanto psycologo como psychiater ta bisa cu Gabriel M. no ta completo responsabel pa su actonan. Fiscal a bisa cu el a keda sorprendi cu e conclusion di psychiater cu ta bisa cu Gabriel M. ta leve no responsabel. Fiscal a mustra cu for di su chikito, Gabriel M. tabatin problema mental.

E por papia hopi bon y ta duna e impresion cu e ta inteligente pero en realidad no ta asina. E tin problema mental caminda e no por responsabiliza su mes. Psychiater ta bisa leve mientras cu psycologo ta haya cu Gabriel M. no ta responsabel. Fiscal a enclima pa e conclusion di psycologo.

   PONE NA DISPOSICION DI GOBIERNO:

Fiscal a bay splica esnan presente den sala di Corte cu su trabao no ta pa laga hende sera pa hopi tempo. Mester evalua tur cos y e ta haya cu e opinion di psycologo ta mas na su lugar.

El a bisa cu desde 2014 den ley ta stipula cu por pone un persona cu tin problema mental na disposicion di Gobierno. Un persona cu tin problema mental, ta worde poni na disposicion y te ora cu experto determina cu e persona ta sigur, lo determina cu lo laga e persona sali liber di un institucion. Fiscal a bisa cu e sistema aki no ta conoci pa Aruba y Curacao. E ta kere cu mester haci e promer movecion. El a bisa cu Gabriel M. ta bisa cu e kier bay Hulanda. Ta ultimo 5 aña e ta bibando na Aruba. Fiscal ta kere cu tin chens cu Gabriel M. lo por bay Hulanda.

Por a nota cu famia di victima tabata sacudi cabez di no ta di acuerdo cu e pensamento di Fiscal. Fiscal a splica cu pone na disposicion, Gabriel M. lo mester keda 10 aña sera bou tratamento. Si bay duna castigo di 20 aña, despues di 14 aña e lo sali liber y despues kico! Un persona peligroso ta den comunidad atrobe. Segun Fiscal, pueblo lo pensa cu dun’e castigo y durante 14 aña pueblo ta sigur. Pero den caso di disposicion, si e no recupera, e lo no worde laga liber.

   CASTIGO:

Fiscal a exigi 15 aña di prison pa Gabriel M. cu TBS, esta cu e lo ta na disposicion di Gobierno.

Pa Risheila F. el a exigi 4 aña di prison di cual 1 aña ta condicional cu un tempo di prueba di 3 aña. Esaki bou guia di Reclasering. Tambe Fiscal a pidi pa prohibit Risheila F. pa tin contacto cu Gabriel M.

Hues awor ta bay evalua e caso y otro luna lo tin sentencia.

© 2018 – DIARIO NV

 

- Advertisement -

DUNA COMENTARIO

Please enter your comment!
Please enter your name here