Home Hudicial Fiscal ta exigi castigo di 15 aña contra Tilico pa asesinato na...

Fiscal ta exigi castigo di 15 aña contra Tilico pa asesinato na Rooi Bosal

920
0
SHARE
— Discusion riba jacket contra bala a caba den matamento.
- Advertisement -

ORANJESTAD (AAN): Diabierna mainta e homber Tilico a presenta den Corte di Husticia pa tratamento di e caso penal cu Ministerio Publico a cuminsa contra dje.

E homber Igmar “Tilico” L. (29) ta wordo acusa cu riba 23 Februari 2018, na su cas na Santa Cruz, a los varios tiro y a tira Edward “Ponsy” Thiel cu consecuencia cu el a fayece. Tambe Tilico ta wordo acusa cu el a purba mata e ruman di Edward, E.T. (Dito) door di tira riba dje tambe pero ningun bala a herida Dito. Fiscal a exigi 15 aña di prison pa Tilico, kende a bisa Hues cu no tabata su intension di mata sino spanta.

E sospechoso principal.

Den e articulo aki, DIARIO ta publica loke a pasa durante tratamento di e caso y den un otro articulo ta publica e exigencia di Fiscal hunto cu e defensa di abogado di Tilico.

    TIRAMENTO:

Den sala di Corte tabata presente famianan y conocirnan di e difunto Edward. Hues a bisa cu for di investigacion di Polis por compronde cu tabatin un discussion dilanti cas di e sospechoso Tilico.

Tabatin un grupo di persona ta bebe pafor y Tilico a bay bisa nan pa bay cu e vest contra bala otro caminda. A surgi un discusion entre Tilico y Edward net dilanti cas di Tilico na Santa Cruz. Na dado momento nan a cuminsa pusha otro y Tilico a bay paden, sali cu un pistol y los algun tiro. Ora cu Edward a bay riba dje, el a tira Edward den pecho cu consecuencia el a fayece. Despues e ruman Dito a sali for di auto y bay reclama Tilico pakico a tira. Tilico a bringa cun’e y a tira riba dje. Despues Tilico a bay den mondi y scondi e arma den un cadushi. E arma tabata lora den paña.

   DISCUSION A CABA DEN TIRA MATA:

Hues a puntra Tilico si loke el a lesa ta e berdad. Segun Tilico e ta lamenta loke el a haci. El a bisa Hues cu nan tabata bebe y a ofrece pa bebe. El a nenga di bebe. Segun Tilico nan lo a bin cu un vest contra bala y el a bisa nan pa bay for dilanti su cas. Edward a bay riba dje push’e. El a bisa nan riba kico nan ta. Nan a bisa cu nan tabata riba hod… E ora ey el a bay coy e arma cu tabata scondi den mata y a bay paden bisa su amiga pa yama 911 pasobra lo tin problema.

Hues a puntra Tilico pakico el a bay coy arma. Tilico a lanta para y a bisa Hues cu si nan tin vest contra bala, nan mester ta arma. E momento ey e miembro di CEA den Corte a bisa Tilico pa sinta, cual el a haci tambe. Tilico a sigui bisa Hues cu el a bay pafor bolbe puntra riba kico nan ta. Hues a puntra cu ki intension el a bay pafor cu e arma. Segun Tilico su intension tabata pa spanta nan.

Ora Edward a dal’e el a tira na banda di dje. Ora Edward a cana bay riba dje, el a tira den pecho. Hues a puntra pakico a tira. Tilico no por a duna un splicacion concreto. Hues a conclui cu aparentemente Tilico tabata panico.

   TIRA RIBA RUMAN:

Hues a bisa cu Dito a bay riba Tilico y puntra pakico el a tira su ruman homber. Nan a cuminsa bringa y Tilico a los un tiro. Hues a bisa cu na Polis, Tilico a bisa cu e kier a tira Dito tambe pero no a logra.

Fiscal a puntra Tilico pakico ora el a bay paden bisa yama 911 y a bolbe bay pafor. Segun Tilico el a bay pafor pa mira si nan a bay. Fiscal a bisa cu e ta mustra cu Tilico a bay pafor pa busca problema. Fiscal a bisa cu riba un distancia di mas o menos 4 meter, Tilico a tira Edward mata.

Fiscal a puntra Tilico si di berdad Edward a dal’e y despues el a tira. E sospechoso Tilico a puntra Fiscal si e ta den un situacion asina y ta den un shock, si e ta actua asina. Fiscal a remarca ta pesey mes e kier tin un claridad kico a pasa.

Hues a remarca cu Tilico hopi biaha a bay sera caba.

    DEMANDA:

   Dito a bisa cu el a keda 2 luna sin traha y mester a bay psycologo. El a demanda 1.200 florin. El a bisa cu su doño di trabou a mand’e bay psycologo y e doño a paga pero Dito no a bay mas.

Mama di Edward a demanda gastonan di entiero. Hues a mustra cu e funeraria ta mas o menos 9 mil florin. Tambe e mama a pidi gastonan di psycologo. Tambe el a pidi pa alimentacion pa e yiu homber cu e difunto a laga atras y cu e mama ta criando. En total e daño material y inmaterial ta suma 30 mil florin. E mama a bisa cu e mucha a keda afecta.

Hues a puntra Tilico si e ta realisa cuando daño el a causa den “one split second”. Segun Tilico el a wordo lanta sin tata y su mama a fayece tempo e tabata chikito. Ta door di famia el a wordo lanta. Hues a bisa cu e ta compronde. Despues di a scucha Fiscal y abogado, Hues a bisa cu dia 13 Juli 2018 tin sentencia.

 

- Advertisement -

DUNA COMENTARIO

Please enter your comment!
Please enter your name here