Home Gobierno Gabinete Mike Eman a priva pueblo di haya un extra reduccion di...

Gabinete Mike Eman a priva pueblo di haya un extra reduccion di prijs di coriente y di awa

36
0
SHARE
Photographer: Robert R Gigliotti
- Advertisement -

MEP ta mustra loke de Meza a lubida conta pueblo:

ORANJESTAD (AAN): Segun MEP, ta increible con e parlamentario Mike de Meza kende durante e periodo cu e tabata Minister di Finanzas (2010-2014) a percura pa crea deficitnan acumula di 1.7 biyon Florin cu un crecemento di nos debe nacional te na 3.9 biyon Florin y kende a converti su mes den e tata spiritual di e KB di 2014, awe kier sigui manipula mente di pueblo bisando cu AVP a percura pa e prijs di awa no a subi desde 2012.

Hecho ta cu enberdad e prijs di awa a baha na 2012, pero esaki no tabata debi na e maneho hiba pa e ex-minister aki y su gobierno di AVP.

Reconocemento pa Gabinete Oduber:

Pa refresca sr. de Meza su memoria, na juni 2012 director di WEB N.V. a emiti un comunicado oficial caminda el a declara cu “entrante Juli 2012 WEB ta baha su tarifa di awa y esaki ta danki na finalisacion di e plantanan di coriente RECIP III, e plantanan di awa SWRO II y bahada di prijs di comustibel”.

Alavez e director di WEB N.V. a bisa cu “e ta contento cu porfin nan esfuerzonan pa haci eficiencia y haci INVERSIONNAN GRANDI for di aña 2006 bay ariba, awor ta duna su fruta”. Sin duda cu e declaracion aki tabata un reconocemento directo na Gabinete Oduber y MEP cu for di 2006 caba a percura pa WEB haci tur e inversionnan necesario, tanto den e plantanan di coriente RECIP como e plantanan di awa SWRO (Seawater Reverse Osmosis). Tambe no mester lubida cu tabata e gobierno di MEP a percura pa bin cu e parke di molina na Vader Piet cu tambe a yuda stabilisa e prijs di utilidadnan. Pero tur esaki, sr. De Meza kier pa pueblo lubida.

Reduccion prijs di crudo:

Sin embargo mester constata cu e reduccion di prijs di awa y coriente cu sr. de Meza ta gaba di dje no a resulta den un reduccion substancial cu awe e kier pretende.

Pa comproba esaki partido MEP a haci un comparacion di e situacion di prijsnan di crudo, coriente y awa laga atras ora cu MEP a bandona gobernacion na November 2009 y e situacion di e prijsnan ora cu AVP a bandona gobernacion na November 2017. Nos por mira cu den 8 aña e prijs di crudo a baha cu 26% mientras cu e prijs di coriente a baha cu solamente 11% y prijs di awa a baha cu 12%.

Pues e gobierno di AVP a priva pueblo di haya un extra reduccion di prijs di coriente cu 15% y un extra reduccion di prijs di awa cu 14%. Un diferencia hopi grandi cu e pueblo consumidor no a disfruta di dje durante tur e añanan aki. Te hasta a yega asina leu cu na februari 2016 e prijs di crudo a baha te na un minimo record di 30 Dollar pa bari y pueblo no a mira nada di esaki den reduccion substancial di e prijs di awa y coriente!

E hedging di Mike de Meza:

Y tur esaki ta hiba nos na e famoso hedging coruptivo di Mike de Meza. Awe de Meza kier laba su man manera Poncio Pilato bisando cu e no tabata di acuerdo cu WEB a bay over na hedge pa 90-95 porciento pa un periodo di dos aña. Ki hilaridad! Pero no tabata e mesun de Meza aki tempo cu e tabata minister a declara den Parlamento cu – debi cu e prijs di crudo lo aumenta drasticamente y yega te na 500 Dollar pa bari – e tabata kier pa WEB N.V. hedge te na 100% mes?

Ta kens de Meza a kere cu e pueblo aki a bira cu pueblo no ta corda mas e declaracion aki? Hecho ta cu tabata danki na e mesun hedging aki di de Meza na oktober 2014 prijs di coriente a aumenta den un solo tiro cu 15%, te cu esaki a conduci na protesta di pueblo dilanti di Bestuurskantoor y cu e gobierno di AVP a laga Riot Comando bati e manifestantenan formalmente.

Finalmente, Mike de Meza mester realiza cu el a fracasa como minister tanto pa loke ta e situacion financiero di pais Aruba cu el a laga den un desaster atras como e desaroyo di e prijsnan di utilidadnan por medio di su famoso hedging cu a ranca y horta mas di 300 miyon Florin for di cartera di nos consumidornan.

- Advertisement -

DUNA COMENTARIO

Please enter your comment!
Please enter your name here