Home General Gabinete Wever-Croes ta pone agenda di partidonan central enbes di esun di...

Gabinete Wever-Croes ta pone agenda di partidonan central enbes di esun di e ser humano

15
0
SHARE
- Advertisement -

ORANJESTAD (AAN) — Segun un comunicado di Astrid Vries di Aruba Human Rights For All, Gobierno a anuncia cu dentro di poco lo bay transforma ex-edificio di DTI den bario di Pos Chikito den un localidad di reciclahe. Remarcabel ta e hecho cu e ta un decision mas basa riba cumpli cu cierto compromisonan enbes di ta basa riba un estudio y tambe considerando e punto di bista di e ciudadanonan cu ta biba den e bario.

Realidad ta cu no ta existi ni un estudio haci cu ta midi e impacto di bin cu un lugar asina meymey di e area habita di Pos Chikito. Na di dos lugar e propio minister di infrastructura a indica cu no ta dispone di e papelnan necesario of cu a logra cumpli cu formalidadnan pa haci e cambio di localidad di Serlimar. Esaki ta nifica cu gobierno actual kier djis hisa benta un localidad unda lo bay sortea sushi sin tene cuenta cu aspectonan legal.

Loke ta mas condenabel ta e hecho cu e gobierno aki no ta importa kico ta e interesnan di e ciudadanonan di e bario aki. E molester grandi cu e localidad aki lo trece cune lo afecta e habitantenan directamente. No ignora cu procesamento of sorteamento di sushi lo trece cune molester di bestianan of insectonan, holo desagradabel, contaminacion di e area y riba su mes forma un riesgo pa salud di hende. Esakinan ta sin conta e trafico pisa cu lo wordo crea door di e localidad aki cu tur su riesgonan cu ta bini cune.

E actonan di e gobierno aki relaciona cu e centro di Serlimar aki ta hopi repudiabel. No a tene cuenta cu interes di bario sino solamente interes di gobernantenan. Nos ta lamenta cu un biaha mas cu accionnan ta wordo demostra cu e ser humano no ta central “at all” den e gobernacion aki sino e agenda scondi di partidonan di gobierno.

E peticion ta bay na henter pueblo di Aruba pa coopera cu Pos chikito door di firma contra e proyecto aki pa asina manda un señal cla na e gobierno cu e no por djis hisa benta un lugar di sortea sushi sin tene cuenta cu interesnan di pueblo!

Ban para hunto pa e derecho di cada ser humano cu ta biba den e barrio di Pos Chikito.

Si bo no a firma ainda pasa na oficina di Pos Chikito #69 y tambe firma ora cu e team pasa na bo cas of cu topa team riba caya.

Hunto nos por haci un diferencia y sostene bario Pos Chikito cu ta bisa claramente cu nan no kier un dump den nan bario, e comunicado ta finaliza cune..

 

 

 

 

- Advertisement -

DUNA COMENTARIO

Please enter your comment!
Please enter your name here