Home Hudicial Gabriel M. a admiti di a tortura y mata e dos muchanan

Gabriel M. a admiti di a tortura y mata e dos muchanan

546
0
SHARE
- Advertisement -

ORANJESTAD (AAN): Diabierna  mainta a tuma lugar tratamento di e lamentable caso di morto di e dos rumannan Rishandroh y Eugene, kendenan a worde mata. E acusacion ta cu tanto e mama di e muchanan Risheila F. y e homber Gabriel M. ta complice.

Ta asina cu Fiscal a exigi 15 aña di prison y na disposicion di Gobierno pa Gabriel M. y 4 aña di prison di cual 1 aña ta condicional pa Risheila F.

E tratamento a dura te den oranan di atardi. Den e articulo aki, DIARIO ta publica loke a pasa den sala di Corte. Den un otro articulo, DIARIO ta publica e exigencia di Fiscal.

    CONFRONTACION DI FAMIA:

Tabatin un confrontacion di famia di e dos muchanan victima cu seguridad di Corte, CEA. Ta asina cu door cu tin un cantidad limita di stulnan den sala di Corte, no por laga tur hende drenta. Esaki a causa basta halsamento di boca na entrada paden di sala di Corte.

Hues a dicidi cu mester duna preferencia na famianan di e victimanan pasobra nan ta realmente envolvi. Hues a pidi esnan den tribuna pa duna espacio na esnan cu realmente ta envolvi den e caso. El a gradici un y tur pa coopera.

E ta lamenta cu no tin suficiente espacio. A tarda practicamente mey ora promer cu por a cuminsa cu e caso.

    ACUSACIONNAN:

E acusacionnan cu Fiscal a presenta Diabierna ta cu Risheila F. y Gabriel M. ta worde acusa cu den e periodo di 21 y 24 November 2017, a dal e mucha Rishandroh Anastacia diferente biaha cu forza na cabez cu consecuencia cu el a fayece. Gabriel M. y Risheila F. tambe ta worde acusa cu diferente biaha a dal mucha Rishandroh causando fractura di heup.

Tambe Fiscal a acusa e pareha cu entre 1 September 2017 y 31 October 2017, a dal Eugence duro na cabez cu consecuencia cu el a dal cabez contra di toilette cu consecuencia cu el a fayece.

Fiscal tambe ta acusa cu entre 1 Augustus 2017 y September 2017 a dal e mucha Eugene diferente biaha y causa fracturanan. A dal cu palo di basora y mokete.

Fiscal ta acusa Risheila F. di ta complice door di a laga Gabriel M. maltrata e muchanan sin defende nan. Considera esaki maltrato severo.

Gabriel M. tambe acusa cu entre 1 Augustus 2014 y 24 November 2017 a maltrata Risheila F. diferente biaha cu mokete, palo di basora. Tambe Fiscal ta acusa Gabriel M. di a dera e mucha Eugene pa sconde e fayecemento. Tambe ta acusa Gabriel M. di entre 1 September 2017 y October 2017, a tira awa cayente riba Rishandroh y tambe kima cu cigaria.

Risheila F. ta worde acusa cu entre 1 Augustus 2017 y 24 November 2017 a laga e muchanan den estado desampara.

Risheila F. su abogado ta mr. v.d.Biezen y Gabriel M. su abogado ta mr. Segbedzi di Hulanda y asisti pa mr. Illes.

   FAMIA KIER HUSTICIA:

Tata biologico di e muchanan Orlando Anastacia, tabata supla di rabia y tabata blo keda mira e sospechoso Gabriel M.   E tabata den sala di Corte hunto cu su mama y famia. Hues a puntra si nan kier exigi daño y per huicio. E ruman muher a bisa cu nan kier husticia.

   HOMBER A ADMITI DI A TORTURA MUCHANAN:

Hues a bisa cu tin un investigacion masha grandi den e caso aki. Ta masha hopi documento tin. E caso hopi tristo a cuminsa dia 21 November 2017 caminda Rishandroh a worde hiba hospital. Dokternan a constata maltrato severo y a cuminsa investigacion cu a conduci na detencion di e mama Risheila F. y e homber Gabriel M. Hues a mustra cu Risheila F. a bisa cu October 2017, Gabriel M. a dal e mucha Eugene y el a muri.

Ta asina cu e mucha Eugene a haci sushi den cushina. Gabriel M. a bay dal Eugene masha duro cu consecuencia el a perde conocimento. Su siguiente dia e mucha a fayece y Gabriel M. a dicidi di dera mucha den mondi na Savaneta.

Parce cu Rishandroh a tira purio den cas y Gabriel M. a bay dale hopi duro canto di wanta na cara. A resulta cu e mucha a perde conocimento. A hib’e hospital y a resulta cu mucha a fayece.

Ademas di e muchanan, Gabriel M. a maltrata Risheila F. diferente biaha. Hues a puntra Gabriel M. ki tempo a cuminsa cu maltrata e muchanan. Gabriel M. a bisa Hues cu el a maltrata e muchanan na September 2017 ora cu e muchanan a bay biba cerca Gabriel M. y Risheila F. den un apartamento. Ta asina cu e muchanan no ta yiu di Gabriel M. sino O.A. Segun Gabriel M. e tabata percura pa e muchanan mas cu O.A.

Por a nota cu O.A. tabata hopi rabia. E tabata supla so di rabia y tabata keda mira Gabriel M. Segun Gabriel M. diariamente e tabata dal e muchanan.

Hues kier sa ki ora Gabriel M. tabata maltrata Risheila F.  Segun Gabriel M. e tabata dal Risheila F. ora e reclama cu e tabata dal e muchanan. Tambe el a dal Risheila F. ora cu Risheila F. tabata busca ayudo. Desde 2014 nan conoce otro. Segun Gabriel M. tabatin temponan bon y temponan malo. Segun Gabriel M., el a stroba Risheila F. pa busca ayudo. A kibra telefoon, a sere den cas pa no bay busca ayudo. Risheila F. tabata kier hiba e muchanan dokter y tabata kier a yama Polis. Gabriel M. riba pregunta di Fiscal a bisa cu e ta reconoce cu su reaccion riba Risheila F. no tabata bon.

   MAMA MENAZA DOOR DI PARTNER:

Fiscal a remarca cu Risheila F. a bisa cu e no por a busca ayudo. Sinembargo den su declaracion el a bisa cu el a bisa cu mama cu Gabriel M. tabata maltrata e muchanan. Segun Risheila F. esey lo ta despues cu Rishandroh tabata na hospital. Fiscal a bisa cu Risheila F. a bisa cu el a conta su mama pero nada no a cambia. Segun Risheila F., su mama tabata sa cu Gabriel M. tabata bati’e pero nada a cambia.

Desde Sepember 2017 te November 2017 e tabata na cas. Dos siman na November 2017 el a traha. Risheila F. a remarca cu si Gabriel M. tabata cu su yiunan, con e por bay Polis. El a bisa Fiscal cu Gabriel M. su cabez no ta bon y ta haci loke e dicidi di haci.

Risheila F. bisa cu ora el a bin for di trabao el a haya Rishandroh cu pianan full blauw y ta yora. El a bay puntra Gabriel M. kico a pasa. Gabriel M. a bati’e formal y a hink’e na su pia.

    GABRIEL CU PROBLEMA MENTAL:

Hues a bisa cu desde Gabriel M. su 13 aña e tin problema di agresion. Psycologo a constata cu Gabriel M. tin problema mental desde mucha. No ta tuma Gabriel M. responsabilidad pa loke el a haci. Psycologo ta mustra cu e chens ta grandi cu lo bolbe haci mesun cos.

Psychiater ta bisa cu Gabriel M. ta leve no responsabel pa su actonan mirando su problema mental. Hues a puntra Gabriel M. kico e ta kere cu lo ta un castigo adecuado. Gabriel M. ta kere cu e mester di ayudo y cu e ta dispuesto pa coopera.

   MAMA CU TRAUMA:

Psycologo a bisa cu Risheila F. ta responsabel pa su actonan. E ta haya cu Risheila F. tin problema cu control di emocion y ta conseha tratamento. Psychiater a constata cu door di maltratonan y menaza, Risheila F. tabata depresivo. Esey ta mustra pakico Risheila F. no kier a haci nada. Psychiater ta haya cu Risheila F. mester di ratamento. Hues a puntra Risheila F. kico e ta kere cu e mester haya como castigo.

Segun Risheila F. e kier ayudo pa e Sali for di e depresividad cu e ta. El a bisa cu el a worde hopi maltrata den su bida. Ta asina cu Risheila F. tin un otro yiu pero e ta na Casa Cuna.

    FAMIA PAPIA:

Hues a bisa cu lo haci un excepcion contra ley, pa laga un representante di famia papia. Ley no ta permiti esey manera ta e caso na Hulanda. Hues a duna e ruman muher oportunidad pa papia. E ruman na yoramente a pidi husticia. Mama di O.A. tabata yora di rabia. Miembronan di CEA a bay atende. E ruman muher di O.A. a pidi Hues pa tuma e decision corecto.

E ruman kier a haci Risheila F. pregunta. E ruman a puntra pakico Risheila F. ora el a top’e y a puntra pa e muchanan el a bisa cu nan ta bon, siendo cu e monster Gabriel M. a mata Eugene caba. Hues a corta e ruman cu no por bay confronta e sospechoso cu cosnan.

Awor Hues ta bay studia e caso y otro luna por spera sentencia.

 

- Advertisement -

DUNA COMENTARIO

Please enter your comment!
Please enter your name here