Home Labor Gobierno di Curacao ta inverti 100 mil florin den sindicalismo pa eleva...

Gobierno di Curacao ta inverti 100 mil florin den sindicalismo pa eleva su nivel

16
0
SHARE
- Advertisement -

Adrie Willems lider di APVO:

ORANJESTAD (AAN)— Diahuebs, na Noord Club Don Bosco a tuma lugar un dia di estudio organiza pa Sindicato Topa, den cual tabata tin como invitado e lider sindical di APVO (Sindicato di Empleadonan Publico di Curacao, sr. Adrie Williams.

Den entrevista cu redaccion di Matutino DIARIO, sr. Williams a duna di conoce cu APVO tin un relacion di cooperacion cu Sindicato TOPA, cu ta consisti di cursonan di motivacion, cu ta wordo duna anualmente, pa e sindicalistanan por funciona mihor den nan sistema.

Den e ocasion aki nan a trata e temanan: “Importancia di sindicato den e proceso di e situacion cu Aruba ta, aworaki”, “Liderazgo y ki tipo di liderazgo mester pa draai e situacion aworaki” y “Statuto y reglamentonan domestico di e sindicato TOPA”.

Esaki pa motibo cu e situacion cu tin actualmente ta rekeri pa TOPA y tur e sindicatonan na Aruba, bay cambia nan statutonan y nan enfoke pa atrae mas hende pa mantene nan mes den e organizacion.

Pa medio di un test chikito cu a wordo haci, sr. Williams a bin ripara cu 75% cu e personanan cu ta forma parti di TOPA cu ta biba for di añanan 60 bin ariba, y e no tin duda cu e test aki ta conta pa tur sindicato local.

El a subraya cu mester haci algo pa recluta hendenan nobo, hendenan hoben, cu ta cuadra cu e pensamento actual den cual mundo ta bay, manera digitalizacion y automatizacion pa evita cu lo topa un dia cu un bashi den e mundo sindical.

Williams a indica cu locual nan a haci na Curacao y cu tin diferencia cu Aruba, ta cu aya tin dos central sindical. Aruba no tin esey.

E dos centralnan sindical apesar cu nan cultura y pensamento ta diferente, nan por traha hunto. Nan a yega asina leu cu Gobierno di Curacao ta inverti, anualmente, cien mil florin den sindicalismo na nivel central pa educacion y formacion di lidernan, pa nan ta na un nivel eleva y riba nivel internacional cu nan por tin dialogo.

Pesey na Curacao nan ta den un proceso di dialogo nacional cu ta dunando un fruto masha grandi mes y aworaki nan ta papia riba otro nivel.

“Mester distingui si, cu ora bo ta den central bo ta papia na nivel di pais y ora bo ta den sindicato bo ta papia di posicion laboral di e trahadornan”, sr. Williams a splica.

E ta haya cu na Aruba no a yega ainda na nivel unda por distingui e dos areanan ey for di otro, y pesey nunca lo por yega na un consenso riba e tema aki, pasobra hendenan cu ta sinta den e stul cu por atende cosnan na nivel di pais ta comporta nan mes comosifuera nan ta atendiendo algo cu tin ta sosode riba “wet floor”. Den otro articulo por lesa un parti interesante tocante e impacto di digitalizacion y automatizacion den nos mundo di awendia, pa locual sindicatonan tin cu prepara nan mes.

 

- Advertisement -

DUNA COMENTARIO

Please enter your comment!
Please enter your name here