Home Comentario Hisamento di Passenger Facility Charge ta un abuso completo

Hisamento di Passenger Facility Charge ta un abuso completo

235
0
SHARE
- Advertisement -

drs. Robert Anjie di CURPA

ORANJESTAD (AAN): Segun drs. Robert Anjie di Partido CURPA, nan a nota cu e asina yama “passenger facility charge” a worde subi cu 15 Dollar pa biahenan pa Merca y 13 Dollar pa biahenan pa otro paisnan.

Segun CURPA, esaki ta un abuso di marca mayor. Aeropuerto cu argumento fofo ta bisa cu nan ta cobra e aerolinea y no e pasahero pero nos tur sa cu e aerolinea ta pasa e gasto aki pa e pasahero. Aeropuerto ta kere cu hende ta bobo di kere loke nan ta bisa.

Nos sa cu na aeropuerto  e salarionan ta barbaro cu hendenan cu ta gana como 40 mil pa luna un abuso completo anto awor ta hisa e passenger facility charge cu 15 y 13  Dollar.

“Mi a bay ariba internet pa mira si e aerolineanan ta cobra e hisamento aki den e pasashi y mi a nota pa loke ta trata Merca prome cu 1 di juli aeroliñanan tabata cobra 54.11 Dollar pa cada pasahero na gastonan di salida. Cu e medida nobo  aki bo por mira   cu e gastonan di salida a subi na 69.11 Dollar den  e pasashi. Cu otro palabra e aerolineanan a pasa e medida direct pa e pasahero.”

“Si nos conta e 10 Dollar cu ya caba e turista ta paga pa ATA e total na gastonan di salida pa Merca   ta yega 79.11 Dollar  pa Aruba pa cada turista.”

Esaki ta haci cu aeropuerto di Aruba  ta number 1 den Caribe di gastonan di salida y number 2 den mundo tras di Inglatera na unda  e belasting ta 95 Dollar. Esaki por haci daño na turismo di Aruba y esaki a worde demonstra den varios estudionan na otro paisan cu a subi nan belasting di salida anto cu sumanan mucho menos cu na Aruba.

Na Merca e aeropuertonan solamente ta cobra 5.60 Dollar.

“Partido CURPA durante ultimo eleccion tabata e unico partido cu a pone den su programa cu lo baha e airport tax. Nos a elimina airport tax pa tur ciudadano di Aruba cu nacionalidad Hulandes  ariba 60 aña y esnan vulnerabel y nos a baha e airport tax den reino hulandes pa 20 Dollar pa tur ciudadanonan di Aruba cu nacionalidad Hulandes. Esey tabata den nos programa y si pueblo a vota pa partido CURPA pa ta den gobierno, hamas e aumento aki a tuma lugar pero lamentablemente esaki no ta e caso.”

“Awor e pueblo mester wanta e abuso aki y tur otro abusonan di medida di e gobierno aki cu no mester ta asina. E gobierno aki a   primiti cu nan  no lo bin cu medida pero no a cumpli, algo cu partido CURPA hamas a tribi di haci. Nos semper ta sali for di punto di bista cu nos Si ta un SI y nos NO ta un NO. Goberna un pais  of maneha un compania cu medida cualkier  mucha por haci y ta e easy way out.”

“Gobierno ta shareholder di aeropuerto y facilmente por a preveni e subimento di e passenger facility charge aki pero no a haci esaki pasobra ta parce nan kier haya mas  dividendo di aeropuerto via un triki  indirecto   y  airopuerto no kier perde placa di nan ganashi door di duna mas dividendo na gobierno  pa asina nan por sigue paga e salarionan barbaro na aeropuerto. Si un compania kier expande nan negoshi e prome cos cu nan lo haci ta bay banco y fia  placa, of saca mas shares  y paga esaki back cu nan ganashi. Aeropuerto fasilmente por a usa nan cashflow pa  cualkier proyecto especialmente si nan no tin debe. E manera baho cu aeropuerto cu sostene e gobierno pa subi esaki door di hisa e passenger facility charge ta uno di abuso.”

“Si partido CURPA haya e oportunidad  den e siguente eleccion pa goberna, nos lo draai back e abuso aki hunto cu  e otro abusonan  inhusto di gobierno y companianan estatal.”

Drs. Anjie a finaliza bisando: “Dia 1 di Juli proximo lo ta un dia scur pa Aruba y su economia y esaki ta danki  na e gobierno aki cu falta vision, creatividad y boluntad di bin cu solucionnan cu no ta rekeri  medida pasobra na final di dia esnan cu bin cu medida ta esnan culpabel pasobra semper tin e opcion di no bin cu medida pero a scohe e easy way out. Esey ta un dikke onvoldoende y brevet van onvermogen pa goberna.”

 

- Advertisement -

DUNA COMENTARIO

Please enter your comment!
Please enter your name here