Home Hudicial Homber Venezolano/Arubiano 4 luna sera inhusto pa supuesto transportacion ilegal di...

Homber Venezolano/Arubiano 4 luna sera inhusto pa supuesto transportacion ilegal di baranan di oro

335
0
SHARE
????????????????????????????????????
- Advertisement -

Abogado mr. Sulvaran ta señala

ORANJESTAD (AAN): –Diabierna mainta pa algun ora tabatin discusion hopi interesante entre abogado mr. Sulvaran di Curacao y Fiscal, relaciona cu e caso di baranan di oro.  Riba pag. 3 por a lesa di nanlibertad, pero aki ta sigui con e caso a bay.

E homber Venezolano/Arubiano R.A.G.Z. biba na Aruba, ta wordo acusa di falsificacion di documentonan y labamento di placa relaciona cu 50 kilo di oro. Dia 9 Februari 2018 el a wordo deteni na aeropuerto ora cu e kier a viaha cu e cargamento aki di oro pa Hulanda. Ayera mainta e caso a bin dilanti pro forma pero abogado mr. Sulvaran a cuestiona e forma con Fiscal ta atende cu e caso aki, caminda su cliente tin 4 luna sera inhusto ya cu tur documentonan ta ilegal.

Den e articulo aki, DIARIO ta concentra riba e punto di bista di mr. Sulvaran y den un otro articulo, DIARIO ta publica e punto di bista di Fiscal.

A DETENE DOÑO DI BARANAN DI ORO

Ayera mainta Fiscal a informa Hues cu e caso contra R.A.G.Z. ta pro forma pasobra ainda investigacion no ta cla. El a bisa Hues cu recien a detene e doño di e baranan di oro, T.R., kende por cierto ta wordo representa pa mr. Sulvaran tambe.

TUR DOCUMENTO TA CORECTO

Mr. Sulvaran a bisa Hues cu for di 11 Februari 2018, R.A.G.Z. no a mira ningun Polis mas o sea cu no tabatin ningun interogacion mas.

Pa loke ta T.R., cu recien a detene, mr. Sulvaran a bisa Hues cu for di 9 Februari 2018 cu a detene R.A.G.Z., T.R. a ofrece cu e kier bin splica tur cos pero Polis a bisa cu no ta necesario. Awor nan a detene. E compania Oro Azul tin consecion di Gobierno Venezolano pa negosha den oro. Tin decreto ministerial Venezolano cu a autoriza esaki. Mr. Sulvaran a mustra cu a papia cu Douane y el a bisa cu tur e documentonan ta corecto. Fiscal awor ta pinta Venezolano y Arubiano como corupto. A duna tur documento cu tur cos ta legal na Douane y ta 7 aña caba ta haciendo e exportacion di oro pa Hulanda di e forma aki, sin ningun problema.

Na opinion di mr. Sulvaran, e problema ta cu a publica e noticia cu a detene 2 Venezolano cu contrabando di oro. Esaki a haya atencion internacional y awor Fiscal ta pretende cu tin falsificacion di documento y labamento di placa.

DETENCION TA UN ABUSO

Mr. Sulvaran a bisa Hues cu e pregunta den e asunto aki ta, si R.A.G.Z. mester keda deteni. E abogado ta haya cu R.A.G.Z. no mester keda pasobra no tin ningun prueba di delito contra R.A.G.Z. Tin asina hopi documento cu ta mustra cu R.A.G.Z. a actua corecto cu no tin motibo cu e mester keda deteni. E abogado a remarca cu por cierto R.A.G.Z. no ta Venezolano sino Arubiano cu pasaporte Hulandes bibando 27 aña na Aruba cu su famia. El a reclama cu aki Ministerio Publico ta priva un hende di su libertad inhustamente. Mr. Sulvaran a bisa cu el a keda sorprendi cu ningun hende a actua riba e detencion inhusto aki.

Na opinion di mr. Sulvaran, segun ley no ta prohibi transporta, exporta oro. Dia 9 Februari 2018 R.A.G.Z. a yega Aruba cu e cargamento di oro y a informa Douane di esaki. E “broker” a entrega e documentonan pa exportacion di oro.

Mr. Sulvaran a bisa Hues cu e no por compronde con Fiscal ta acusa R.A.G.Z. di a duna documentonan falso siendo cu ta e “broker” a entrega tur e documentonan. R.A.G.Z. a haya documentonan for di Douane pa cu e transporte di oro.

No tin ningun delito di labamento di placa tampoco.

Remarca cu Fiscal ta basa su mes riba informacion di internet cu no ta cuadra cu e realidad. Segun mr. Sulvaran, e experto cu Fiscal a usa ta basa su mes riba sistema Europeo. E experto ta puntra pakico no ta cumpra baranan di oro na Europa. Mr. Sulvaran a bisa Hues cu e doño di e oro ta transporta oro pa Europa, Merca, Dubai. Loke a pasa aki ta un abuso grandi.

NO TIN FALSIFICACION

Despues di 4 luna Fiscal no tin ningun prueba pa demostra su acusacion di labamento di placa di oro. No tin ningun prueba di origen di e oro. Ta e broker a skirbi robez mil kilo. Con un persona lo por transporta asina hopi oro. Un hefe Douanero ta bisa cu riba e documento pa exporta mester pone cu e procedencia di e oro ta Aruba pa sigui bay Hulanda.

Segun Fiscal no. Fiscal ta pretende cu e procedencia mester ta Venezuela y pesey ta considera falsificacion di documento. Mr. Sulvaran a mustra cu 7 aña largo ta haciendo e negoshi aki y awor Fiscal ta bisa cu ta falsificacion. E broker a splica cu ta riba instruccion di Douane a pone cu e procedencia ta Aruba. No tin nada di falsificacion. E broker no a wordo deteni sino R.A.G.Z. Na opinion di mr. Sulvaran, e caso aki ta un berguenza.

Mr. Sulvaran a menciona articulo di ley di EVRM (Derecho Humano) pa mustra cu no tin motibo di peso pa sigui detene R.A.G.Z. No por papia aki cu a sacudi comunidad. E ta haya cu loke ta sacudi comunidad ta loke Fiscal ta haciendo cu su cliente. Fiscal sin motibo ta detene su cliente kende no a haci nada contra ley.

 

- Advertisement -

DUNA COMENTARIO

Please enter your comment!
Please enter your name here