Home Hudicial Hues a nenga di laga liber homber sospecha di viola un dama

Hues a nenga di laga liber homber sospecha di viola un dama

160
0
SHARE
????????????????????????????????????
- Advertisement -

Abogado ta haya cu no tin ningun prueba drechi

ORANJESTAD (AAN): E homber M. di Republica Dominicana biba na Aruba, despues di practicamente 1 aña a wordo deteni como sospechoso di viola un dama Colombiana. Abogado mr. de Hoogd a cuestiona e hecho cu Fiscal tin su cliente deteni siendo cu no tin ningun prueba drechi. El a pidi Hues pa laga M. liber pendiente di e investigacionnan cu Fiscal kier haci.

Hues, aunke e ta duna abogado mr. de Hoogd razon, toch e ta haya cu tin motibo di peso y ta rechaza e peticion pa laga M. liber. Hues a instrui Fiscal pa percura pa abogado haya tur loke el a pidi Fiscal y te ainda no a haya.

   VIOLA DAMA

E acusacion cu Fiscal a presenta den Corte contra M. ta cu 1 Januari 2017, el a viola un dama. Fiscal a bisa cu M. a viola e dama R. y a laga pasa cu e ta un agente di Recherche. E caso a bin dilanti pro forma. Fiscal a splica Hues cu NFI Instituto Forense na Hulanda ta investiga DNA y cu na Juni 2018 esaki lo por keda cla.

Tambe e procesverbaal no ta cla. E dama victima ta un Colombiano y ta na Colombia. El a pidi asistencia di autoridad Colombiano pa e victima reconoce potretnan. Fiscal a propone pa e tratamento di e caso sosode dia 24 Augustus 2018.

    NO TIN PRUEBA DRECHI:

Abogado mr. de Hoogd a bisa Hues cu R. lo tabata na aeropuerto y un homber delega a identifica su mes y a bis’e pa subi. E homber a hib’e na un lugar y abusa di dje. Mr. de Hoogd a bisa Hues cu e no por compronde cu e dama a mira e homber identifica su mes pero no ta corda su nomber.

El a bisa cu e violador lo a bisa cu e tin famia na Colombia. Na opinion di mr. de Hoogd, e sospechoso M. no tin famia na Colombia. E victima lo a bisa un number di auto y asina a bay detene M. E abogado a reclama Hues cu Fiscal ta bisa cu tin imagennan di video pero cada biaha cu a pidi te ainda no a haya esakinan. E abogado ta haya cu e imagennan lo por trece claridad y laga e sospechoso M. liber. E ta haya straño cu for di comienso 2017 Polis tabatin tur informacion pero no a detene e sospechoso.

Desde 8 Februari 2018, M. ta deteni como sospechoso solamente a base di number di auto. No a haci mas investigacion. E abogado a reclama cu despues di 1 aña awor numa a detene. No tin fingerprint. El a pidi Hues pa suspende detencion di M. pa e por warda riba e caso.

FISCAL TA GAÑA:

Fiscal a bisa cu tin imagen di video di un supermercado caminda por mira number di e auto. Fiscal a duna Hues y abogado un relato riba esaki. Door di esaki a detene M. Na aeropuerto a mira tambe e auto. Esaki segun Fiscal, ta cuadra cu loke e victima a bisa cu el a pidi e homber bah’e bek na aeropuerto.

Fiscal a bisa cu el a pidi Polis pa imagennan di number pero Polis lo a perde e stick cu numbernan di e supermercado.

Fiscal a bisa cu e victima ta traumatiza y no kier bin Aruba. Fiscal ta haya cu M. no por splica pakico su auto tabata riba imagen di video riba 1 Januari 2017. E ta haya cu ainda tin motibo di peso y a pidi Hues pa rechaza peticion di abogado.

Mr. de Hoogd a reacciona cu pa lunas largo Fiscal ta bin cu un storia pa hustifica detencion di su cliente. E no por mira nada di number di auto di e sospechoso. Fiscal ta bisa cu a mira number di auto na aeropuerto pero ora Hues a puntra mas detayes ta resulta cu lo a reconoce e auto pero no number. Abogado a remarca cu ta asina hopi auto ta pasa na aeropuerto. El a bisa cu e no ta kere e storia cu lo tabatin hopi circumstancia cu a pone cu a tarda. Abogado mr. de Hoogd a bisa Hues cu el a keda asombra cu Fiscal ta gaña y awor ta Sali na cla cu a perde imagennan di video. El a insisti cu mester laga su cliente liber.

    DECISION HUES:

Hues a bisa cu e ta pospone e caso pa dia 24 Augustus 2018. El a ordena Fiscal pa facilita abogado mr. de Hoogd cu tur loke a pidi. Hues ta haya cu abogado tin razon cu no a traha eficiente pero tin declaracion di Polis cu a mira number.

Pesey tin peso den caso y ta rechaza e peticion pa laga M. liber. M. ta keda encarcela te dia di e caso.

 

- Advertisement -

DUNA COMENTARIO

Please enter your comment!
Please enter your name here