Home Gobierno Jerry Staring a entabla caso sumario contra gobierno

Jerry Staring a entabla caso sumario contra gobierno

79
0
SHARE
- Advertisement -

ORANJESTAD(AAN): Abogado mr. David Kock a entabla un caso sumario contra Minister Dangui Oduber y Gobierno di Aruba, den nomber di su cliente Drs. Jerry Staring, Director di Directie Volksgezondheid (DVG).

E caso sumario ta pa pidi Hues pa anula e carta di prohibicion di entrada cu e mandatario a emiti contra e Director di DVG, sin duna motibo, sin a papia cune prome, sin bise kico ta e kehonan contra dje y sin duna espacio pa por defende su mes.

Corte a dicidi cu lo trata e caso aki dialuna dia 25 di juni proximo. No ta conoci ainda cua abogado lo defende e mandatario. Den e casonan cu el a perde contra Fundacion Lotto pa Deporte a uza abogado mr. Anthony Ruiz cu na 3 ocasion tras di otro no a logra convence e Magistrado cu su cliente tin rason.

Minister Dangui Oduber a bira e prome Minister di Gabinete Wever pa haya un “dwangsom” di un maximo di 2.5 miyon Florin den su contra, si e no tene su mes na e sentencia. E hecho cu Minister Oduber a ataca e Hues acusand’e di ta “politiek verziekt” obviamente no ta demostra cu e ta un Minister cu ta respeta sentencianan di Corte.

Na October 2016 a tuma luga e ceremonia oficial pa anuncia postulacion di Drs. Jerry Staring Bsc como e Director nobo di Directie Volksgezondheid, tambe conoci como Departamento di Salud Publico Aruba (DESPA). E ultimo director di e departamento aki tabata Dr. Jacques van Veen na aña 1991. Despues di esey semper tabatin directornan interino of Management Team.

Jerry Staring a studia pa “verpleegkundige” na nivel HBO, pues a haya su “bachelor in nursing”. El a specialisa den psikiatria y a core “stage” den Dr. Horacio E. Oduber Hospitaal na Aruba. El a caba su estudio na aña 2002 na Hoge School Arnhem-Nijmegen. Mesora despues el a cuminsa su carera como nurse na PAAZ, mientras cu na final di aña 2003 el a bay traha na Psikiatria Ambulatorio bou Directie Volksgezondheid Aruba.

Den un esfuerso pa prepara su mes miho pa un puesto den liderazgo, el a opta pa sigui studia na Universidad di Aruba, den e facultad di “Arts & Sience” cu e tema specifico di “Social Work & Development”, brinda den cooperacion cu Universidad di Puerto Rico y Vrije Universiteit van Amsterdam. Na aña 2011 el a caba cu su estudio na nivel “Master” riba maneho di cuido medico. Cu e diploma ey den su man, el a cambia di trabao y for di SPD a opta pa cuminsa un carera nobo como “Beleidsmedewerker” na Directie Volksgezondheid. Na fin di aña 2011 el a traha na FCCA como “Stafmedewerker Integraal Opbouwwerk”.

Cu e conocemento, experencia y educacion obteni, entre 2011 pa 2013, Jerry Staring a fungi como “Gastdocent” na Universidad di Aruba, den e facultad di nivel Bachelor den “Social Work Development”. Na October aña 2014 el a cuminsa den e funcion di Presidente di e Management Team di Directie Volksgezondheid y dos aña despues, na october 2016, el a bira e Director nobo di DVG, despues di un proceso transparente y largo, bou auspicio di Departamento di Recursonan Humano (DRH) di Gobierno, pa busca un lider pa sigui maneha e departamento cu ta di vital importancia pa nos pais.

Jerry Staring a nace na Hulanda, su mama ta Arubiano di Socotoro, su tata un Hulandes-Europeo pero cu a traha como docente pa hopi aña na Aruba. E mes ta e unico ruman cu a nace na Hulanda. E tin 2 yiu muhe, un di 10 aña y otro di 11 aña di edad.Di acuerdo cu nos informacionnan, ta for di aña 2015 cu Departamento di Recursonan Humano (DRH) a encabesa un comision pa recluta un Director nobo pa Directie Volksgezondheid (DVG). Un total di 13 persona a solicita pa e puesto aki. Mester menciona cu mas o menos 5 di e solicitantenan sali for di DVG mes.

E proceso a conoce 3 etapa, e prome tabata un “brievenronde”; e di dos tabata un “gesprekronde” y e di tres etapa tabata un “psychologische test” haci door di Wever Psychology Serrvices. Despues di e 3 etapanan aki, a keda 2 candidato y di eynan Minister di Salud Publico, Cuido di nos Grandinan y Deporte a scoge Jerry Staring. Henter e proceso aki a dura mas o menos 1 aña y e comision di reclutacion a conta cu 3 miembro, 1 for di DRH (Omaira Lares), 1 for di e mundo di cuido (Gino Goeloe) y 1 tabata di Ministerio di Salud Publico (Roland Tuit RA).

Ta bon pa agrega, cu despues di su nombracion, pa 1 aña largo, a sigui un trayecto di guia for di ex-Minister di Cuido na Hulanda, Marlies Veldhuizen van Zanten. Cu nombracion di Drs. Jerry Staring, Bsc den e funcion di Director di DVG, a inicia un era nobo den e departamento di Gobierno. Un cambio di cultura y introduccion di un vision y mision cu tur empleado ta reconoce y ta dispuesto pa ehecuta. Ta varios cambio y progreso tabatin den e ultimo añanan caba.

Documentonan oficial den archivo di Gobierno di Aruba ta mustra cu for di aña 1917 tin un movemento riba un departamento pa maneha asuntonan di salud publico na Aruba, pues DVG of DESPA a celebra 100 aña di existencia aña pasa! Na 1917 a trece un curpa morto for di Corsou pa Aruba y asina a realisa cu mester di un maneho con ta atende cu situacionnan asina. Ta di eynan a crea un “Kinderarts Besluit” pa vacuna muchanan y tambe a nace e “Higienische Dienst” den unda a cuminsa educa comunidad riba labamento di man y cuminsa introduci reglanan pa negoshinan cu tabata bende alimento.Pa straño cu por zona, e departamento a funciona pa casi 100 aña sin un “instelling besluit”.

Comosifuera poco, nunca a traha un “formatieplan” tampoco, den unda ta stipula y ta discribi cada 1 di e 82 funcionnan den e departamento. Tampoco den e casi 100 añanan no a prepara nunca un “Personeelhandboek” den unda ta stipula e reglanan cu trahadonan mester tene nan mes na dje, ni un “Verzuim Reglement”, “Ziekteverzuim Beleid”, “Visiedocument” of tampoco un “Strategisch Plan”. Bisando esaki, ta hopi trabao, hopi investigacion, deliberacion, dialogo y inversion di tempo a bay den preparacion di tur e rapportnan, maneho y vision pa DVG.

Cu e era nobo den Directie Volksgezondheid Aruba, a haci posibel pa cambia e cultura di un “Uitvoerende Dienst” pa un “Beleids Directie”. DVG tin como meta pa fungi como e parti central den cuido na Aruba, conectando tur otro stakeholdernan. E departamento ta demostra profesionalismo, dinamismo y etica halto den tur trabao cu nan ta desplega.

- Advertisement -

DUNA COMENTARIO

Please enter your comment!
Please enter your name here