ORANJESTAD (AAN): Pier di Cura Cabay ta un pier di piscado caminda cu hendenan ta subi lama cu boto y pa busca nan pan pa nan cas. Eynan ta mara nan boto. Pero nan tin un problema hopi serio ultimamente. Motibo di e problema aki ta, ta ladronnan cu ta haciendo desaster aki.
Den varios ocasion piscadonan ta perde nan motor di boto y hera perde nan boto. Ta un situacion hopi fastioso cu ta pone nan tuma contacto cu nos, pa manda e mensahe eyfo.
Romeo Janga, diaranson marduga, a perde su motor di boto un biaha mas. El a splica cu nan tin un problema serio cu e luznan y cu hendenan ta bin eynan y haci manera nan ta pisca riba e pier of ta busca cos di horta. Ta hopi facil pa cualkier hende subi eynan y mishi cu e breakes cu a pone na e cashi di coriente. Ta cosnan cu bo no por kere cu bo mes ta yega, paga luz, horta motor y ora caba, bay na final di caya atrobe, bolbe cende coriente.
Mirando cu e tabata tin un canaster den awa for di dialuna, el a bin diaranson atardi pa bin wak y a bin haya falta di motor. Siendo cu tur mainta eynan tin yen di hende Un cos ta strañe, ningun hende por a wak algo. Ta di tres motor cu e ta perdiendo na Cura Cabay.
Luz ta sende den dia y ta paga anochi. Janga a purba di instala e timer, pero nan mester haci algo. Sea cera entrada di beach cu cadena pa ningun auto subi e pier.
Algun dia pasa a coy boto di un amigo di Janga y a pone na subida, cla pa lanta. Pero algo a stroba nan pa los e motornan of kier a bay cu e boto. Janga a splica cu a yama polis. El a duna su declaracion. Pero e ta sinti cu no ta suficiente. E mes lo bay haci su investigacionnan y tuma pasonan su mes.
Janga a perde dos motor caba y awo el a perde su tres. Hopi di e piscadonan ta kehando di e situacion.
Janga ta kere cu e botonan cu nan lo coy mes, no sa kico nan ta haci cu e botonan, pero casi sigur nan ta sink e botonan. Algo sigur tin cu wordo haci pasobra ta hendenan cu ta subi lama, trece pisca fresco pa nos. Ta di spera cu gobierno por duna un man den e caso lamentabel, pa asina evita cu ladronnan bolbe subi pier y horta pertenencia di e piscadonan.
