Home Economia LMA mester wordo revisa y adapta!

LMA mester wordo revisa y adapta!

102
0
SHARE
- Advertisement -

Lider  di POR drs. Marisol Lopez-Tromp:

ORANJESTAD (AAN) – Durante e ronda di pregunta den conferencia di prensa di Partido POR, Diamars mainta, e tema di reduccion di gastonan di Gobierno, y un parte substancia ta e gastonan di personal, a bin dilanti y cu ta un tema cu tambe Prome Minister a trece durante su conferencianan di prensa, encuanto CAFT.

E lider di Fraccion di POR, drs. Marisol Lopez-Tromp a expresa cu gasto di personal ta un di e pasonan cu Conseho di Minister ta tuma siguiendo conseho cu CAFT y cu no ta di awor pero pa basta aña caba y cu ademas tin e meta di mehora e efectividad di aparato publico.

Parlamentario Lopez-Tromp a señala cu locual ta importante relaciona cu e tema aki ta e ley di LMA, (Landsverordening Materieel Ambtenarenrecht), cu ta e curazon cu ta toca e trabao y derechonan di tur ambtenaar na Aruba. “Esaki ta e prome aspecto cu mester traha riba dje pa trece e cambionan y logra e meta pa tin un aparato gubernamental efectivo unda cu e ambtenaarnan ta wordo evalua. Es decir, mester adapta e LMA na e demandanan y exigencianan di actualidad”, drs. Lopez Tromp a indica.

Refiriendo na un observacion di un miembro di prensa, cu ta wordo papia personeel stop pero ketobay e aparato ta sigui yena di hende nobo den diferente departamento, e lider di POR a acentua cu Parlamento a aproba un crisisplan social pa cual Parlamento a aproba 17 miyon pa wordo ehecuta durante e aña aki, pa por yuda criaturanan cu ta den dolor, cu ta wordo maltrata, abusa y neglisha y mester di personal specializa den e areanan aki, cu ta abarca mucha, famia y sociedad, y cu logicamente no por restringi e personal necesario.

“Loke por a wak ultimo añanan, durante gobernacion anterior, ta un cantidad di coordinador nombra na bestuurskantoor y mas bien pa haci cierto trabaonan politico, pero e departamento mes, cu ta e curazon no a haya esaki. Ta netamente e departamento aki ta rekeri di tuma personal y pesey mes gobierno actual ta haciendo esaki. E ta un escogencia conciente pa por cura un herida grandi cu tin den nos comunidad y cu a wordo neglisha durante ultimo añanan, unda a yega asina leu cu esnan di e departamento mes no tabata wak e minister, nan tabata tende di dje na radio ora decisionnan tabata wordo tuma pa nan”, drs. Lopez- Tromp a señala.

E dama a expresa tambe cu awor a bin un re-enfoke riba kico ta importante pa nos comunidad y si ta rekeri di tuma personal pa cura esaki y preveni e dolornan cu tin den comunidad, lo tuma e pasonan ey pasobra Parlamento a aproba e presupuesto pe.

Tambe el a referi na e asina yama “overtollingheidspool” unda tin hendenan cobrando por nada na cas, sea nan ta wordo reubica of ta termina esaki y tampoco lo yena funcionnan cu no ta necesario.

Parlamentario Lopez-Tromp a enfatiza cu cada minister tin un responsabilidad y e no por nombra un persona si no tin vacatura pe y no tin un conseho positivo for di Departamento di Recursonan Humano y si no tin placa pa e vacatura for di Finanzas. Den añanan cu a pasa hendenan tabata wordo nombra sin tene cuenta cu esaki y gobierno actual, si e nombra hende mes, ta pasobra tin necesidad y mester tin un conseho positivo.

Asina aki, Drs. Marisol Lopez-Tromp a mustra e diferencia grandi entre gobierno anterior y actual pa loke ta trata maneho di personal, reiterando cu locual ta hopi importante den esaki ta e ley di LMA cu mester wordo revisa y adapta na nos situacion actual.

- Advertisement -

DUNA COMENTARIO

Please enter your comment!
Please enter your name here