Home Comercio Medidanan impopular ta sumamente necesario

Medidanan impopular ta sumamente necesario

411
0
SHARE
- Advertisement -

Minister Ruiz-Maduro a reitera y enfatiza:

ORANJESTAD (AAN) – Den conferencia di prensa di gobierno, Minister di Economia y Finanzanan sra. Xiomara Ruiz- Maduro, a reitera un bez mas cu gobierno a tuma paso y tambe decisionnan y no tur ta popular, pero sigur ta sumamente necesario na nos pais.

E mandatario a expresa cu nan lo no hacie “mañan nos lo mata nos propio yiunan pa falta di responsabilidad di nos”.

Pesey, awor mester puntra esnan cu ta critica y cu a redobla e debe di nos pais, cu a hinca Aruba caminda cu e ta awor, unda cu 90 cent di cada florin ta tapa pa debe.

E dignatario a puntra si den e situacion cu nos pais ta aworaki ta kico gobierno ta bay haci? Cera wowo pa e realidad, hinca cabes den tera, pretende di bay muri bebe ensure?
“No! Nos no a scoge pa esey, y esey ta brinda nos tambe e credibilidad financiero, cu asina mes cu nos ta yega y nos no por cumpli cu loke a wordo prescribi na 2017 y tampoco den 2018, tog por mira awe cu CAft, e parti di supervision financiero cu Aruba ta bao di dje, danki na e mal maneho financiero cu Aruba a conoce e ocho añanan ey, awe por mira cu e presupuesto cu nos a presenta, ta realistico”, e dignatario a expresa.

Minister Ruiz-Maduro ta sigui bisa cu CAft tabata tin den e proceso tres pregunta riba aspectonan cu nan tabata kier mas claridad:

Uno, e deficit. Nan tabata tin problema cu locual ta e entrada di RDA, e 17.5 miyon. E mandatario a bisa cu no mester lubida cu e buraco na 2017 a wordo ocasiona tambe pa e parti di placa di RDA cu no a drenta y a forma parti di e 30 miyon florin di extra deficit di 2017.

“Pues pesey, nan tabata kier asegura nan mes cu e 17,5 miyon aki di RDA lo drenta caha di gobierno. Esaki CAft a keda convenci di e parti aki. Mester bisa den e parti aki di e deficit, den e corespondencia cu tabata tin, tin tambe e situacion di ATA, unda cu nan a indica cu nan ta wak e entrada aki como debe, y nos a convence nan cu no ta asina y cu ta hopi prematuro pa yega na e conclusion aki”, e mandatario a indica.

Pa locual ta gastonan di personal, CAft tabata kier mira cu na termino largo e gastonan aki ta baha. Tin henter un plan tambe pa e parti aki, kico ta e pasonan cu lo wordo tuma na 2018 y kico tin cu haci riba termino medio tambe, pa asina por controla e gastonan di personal, cual ta esnan di mas halto di gobierno, aworaki.

E di tres y ultimo pregunta cu CAft tabata tin, ta e parti di e debe pa e no sigui crece mas cu 90%. CAft na comienzo tabata tin preocupacion pasobra nan a pensa cu esaki lo subi na 2018 na 93%, pero aki gobierno a convence e organo di supervision cu nan a sali for di un punto di bista eroneo, na unda cu e informacion cu nan a uza pa calcula e informacion aki no tabata corecto. CAft a acepta tambe cu e tabata asina.

E tres puntonan aki tabata e preocupacion di CAft, e dignatario a reitera. E preguntanan cu ta base di nan preocupacion a keda contesta, despues di un bay bin di corespondencia, y e ora ey mas cu claro, e mandatario a indica, nan a duna nan seyo realistico na e presupuesto di 2018.

E mandatario a agrega cu esaki no kiermen cu gobierno a keda cla. No por lubida cu nos pais a redobla su debe externo den un periodo hopi chikito y esaki ta trece nos pais den problema. Pasobra na 90% di nos DGP no por yega asina sin mas y convence un banco den exterior pa fia nos placa, cu ta locual gobierno a bay haci na New York dos siman pasa.

“E hecho so cu nos ta bao e supervision financiero aki, ta trece hunto cu cune cu nan ta duna bo credibilidad pasobra pa nan tin un organo cu ta tirando un bista riba e trabaonan cu nos ta haciendo pa yega na un finanzanan publico manehable y sostenible”, e mandatario a señala.

- Advertisement -

DUNA COMENTARIO

Please enter your comment!
Please enter your name here