Home Economia Minister di Finanzas ta admiti cu CAft ta stroba autonomia di nos...

Minister di Finanzas ta admiti cu CAft ta stroba autonomia di nos Parlamento

55
0
SHARE
- Advertisement -

ORANJESTAD (AAN) – Minister di Finanzas a expresa den conferencia di prensa, cu hopi hende na Aruba ta puntra si CAft tin mas poder cu nos Parlamento of no.

Minister Ruiz-Maduro a splica cu den nos constelacion cu un Parlamento na cabes, nan tin e poder di mas halto, pero no lubida cu den e ley di CAft na momento cu esaki a wordo pasa den gobernacion anterior, tin puntonan cu mester revisa cu ta stroba nos autonomia di Parlamento.

E mandatario a indica cu ta importante pa remarca, cordando riba e palabranan di señor Wong cu awe atrobe ta bin dilanti, y cu a bisa cu “Ora abo como organo no haci bo trabao, otro lo hacie pa bo”. E dama a subraya cu esaki ta locual CAft a haci den su trabao di supervision.

“Na momento cu Parlamento cu mayoria di AVP no a haci su trabao, a pone nos den e situacion cu awe nos tin e supervision financiero aki. Pesey awe, nos tin cu deal cu e realidad cu e supervision financiero aki, pafo di Reino, ta duna nos cierto credibilidad y pesey nos tin cu tolera cierto cosnan.

“ Pa esnan cu ta bisa cu si, cu CAft ta manda, cu ta nan decision ta esun cu ta traha e presupuesto, e no ta asina. Nos tin cu realiza cu nos tin nos propio responsabilidad pa carga. Nos ta esnan cu ta propone kico ta e normanan, nos ta esnan cu por drecha e situacion financiero den cual nos ta, ta e esfuerzo di nos pa haci esaki”, e dignatario a remarca.

El a agrega cu mas cu claro gobierno kier mira un supervision financiero bin for di un organo di nos propio pais, y pesey den e negociacionnan tambe tin poni cu Aruba ta bin cu su propio Begrotingskamer, pa evita e tipo di situacionnan asina cu ta mishi cu autonomia di Parlamento y cu nos mes no tin un organo propio cu ta haci e supervision y cu ta duna nos inversionistanan e seguridad cu na Pais Aruba e presupuesto ta wordo sigui, y ta traha den un direccion pa e por bay den un sistema di finanzanan publico manehable y sostenible.

Esey ta locual e supervision financiero ta dunando nos pais awor: credibilidad financiero pasobra sin esaki, pa pueblo e lo ta hopi peor, segun Minister Ruiz-Maduro.

No obstante e mandatario ta duna razon na esnan cu ta bisa cu for di 2015 cu hopi hende a pone speranza den e supervision financiero mas bien esaki a empeora, y Secretario di Estado sr. Knops mes a admiti esaki.

Locual ta diferente ta cu awor Aruba a conoce un gobierno nobo, cu a mustra no solamente palabra bunita pero a bin cu hecho, cu no ta facil pero a tuma decision. Decision ta trece cune trankilidad.

- Advertisement -

DUNA COMENTARIO

Please enter your comment!
Please enter your name here