Home Gobierno Minister di Salud a anuncia cu Ruben Goedhoop a keda scogi como...

Minister di Salud a anuncia cu Ruben Goedhoop a keda scogi como director nobo pa AZV

163
0
SHARE
- Advertisement -

Meymey di Augustus lo drenta den funcion:

ORANJESTAD (AAN)— Diahuebs mainta den e conferencia di prensa di Gobierno, Minister di Salubridad Publico, Turismo y Deporte, sr. Dangui Oduber, a hiba palabra y e biaha aki el a introduci e director nobo di AZV, ken tambe tabata presente.

Ta trata aki di sr. Ruben Goedhoop, ken ta un ehecutivo di e compania renombra PriceWaterhouseCoopers, cu hopi experiencia den maneho.

E dignatario, algun siman pasa a anuncia cu gobierno lo a cuminza cu e proceso pa nombra y instala un director nobo pa AZV.

Minister Oduber cu e proceso pa yega asina leu no tabata asina facil, mirando cu nan a pensa cu lo tabata tin hopi interes pa e cargo aki, pero den practica a wordo demostra cu e interes no tabata asina grandi, mirando cu e ta un funcion cu ta encera hopi responsabilidad den dje.

E ta un funcion cu ta capta hopi tension di e comunidad di Aruba, pues e tabata un proceso habri y transparente unda cu tur hende a haya un oportunidad igual pa solicita, ma facil e no tabata.

E proceso a cuminza cu un procedure di solicitud habri unda tur hende cu tabata tin interes pa bira director di AZV a haya e posibilidad y oportunidad pa solicita.

E hunta di comisario di AZV, consecuentemente, a repasa tur esnan cu a solicita pa e funcion aki. Nan a traha un lista largo di tur e personanan cu den nan opinion, tin e capacidad y ta cumpli cu e exigencianan pa por bira director, y di e lista largo a traha un lista cortico y nan a entrevista tur esnan den e lista cu nan ta considera cu ta e candidatonan mas idoneo pa ocupa e posicion di director di AZV, y di e lista a keda tres persona cu a wordo entrevista no solamente door di e hunta di comisario di AZV sino tambe pa un compania cu e instancia aki a contrata pa hunto cu nan encamina e proceso aki. E personanan aki a pasa den tur dos proceso door di ambos instancia, y consecuentemente, e hunta di comisario a presenta un candidato pa bira e proximo director di AZV y e ta carga e aprobacion tambe di Minister di Salubridad y di Prome Minister di Aruba, pasobra e ta cumpli cu tur e exigencianan y e perfil cu nan tabata buscando.

E ta un profesional cu tin e dinamismo y energia cu gobierno ta desea pa e cargo menciona. Gobierno for di campaña a trece dilanti cu nan kier cambio den su totalidad di maneho, kier mehora e cuido y AZV ta un di e partinan mas importante den Salubridad Publico.

E minister a indica cu nan ta sigur cu e director nobo pa AZV lo trece e cambionan aki na bienestar di nos comunidad.

Un di e aspectonan ta revisa e leynan di AZV cu ta hopi anticua, nan kier mehora e cuido cu ta wordo duna, reduci e costonan na unda cu por. E dignatario a indica cu e ta bay traha hopi cerca di e director nobo. Nan tabata varios combersacion caba, y el a wordo indica cual ta e vision di gobierno pa cu salubridad publico, specialmente AZV.

E mandatario y gobierno ta hopi contento cu a yega na un director nobo, cual ta hopi importante pa e continuidad di AZV y logicamente no a keda sin gradici drs. Anko Ringeling pa tur e añanan cu el a dirigi AZV. Lo tin un periodo di transicion pa e director nobo y si tur cos bay bon e lo inicia su tareanan na mitad di Augustus.

E director nobo ta un persona hopi conoci den comunidad y Minister Dangui Oduber ta convenci cu e lo conta cu sosten di pueblo tambe.

- Advertisement -

DUNA COMENTARIO

Please enter your comment!
Please enter your name here