ORANJESTAD (AAN) – Diahuebs mainta a tuma lugar e conferencia di prensa di Gobierno, den cual Minister Presidente mr. Evelyn Wever-Croes, Minister di Finanzas y Economia, mr. Xiomara Ruiz-Maduro y Minister di Salubridad sr. Dangui Oduber a elabora riba nan puntonan di agenda.
Minister Presidente sra. Wever-Croes a toca e temanan di Finanzas y su bishita na Hulanda riba esaki, Venezuela y Proyecto Urirama.
E mandatario a referi, na prome lugar, na e situacion financiero di nos pais, expresando cu no ta un secreto cu nos ta bao presion den un situacion hopi delicado y malo. Esaki ta e motibo cu el a bay Hulanda pa delibera riba e aspecto aki, mirando cu gobierno no ta saliendo afo di dje.
E mandatario a indica cu tabata tin menaza di un KV y un aanwijzing y di esey a leak informacion poco tempo pasa den prensa. Den cuadro aki a hiba combersacion na Hulanda y manera e dignatario a splica algun biaha, e no a bay pidi placa pero solamente tempo y espacio.
Na Hulanda, nos prome mandatario a papia cu varios persona riba e tema aki, incluso cu Prome Minister Rutte, y a splike cu Gobierno di Aruba ta kere den relacion di Reino. Esaki a base di un relacion mutuo di respet y madurez. Madurez kiermen cu Aruba mes ta atende su problemanan, y busca solucion pa nan.
Solamente si Aruba haya su mes den un problema extremadamente grandi, por ehemplo si e situacion di Venezuela mester sali for di man, Aruba por bati na porta y indudablemente, nos por conta cu nan asistencia. Pero demas problemanan cu ta situacionnan interno di Aruba, nos asuntonan financiero, nos mes ta atende cune.
E dignatario a splica cu el a purba di negocia cu Secretario do Estado sr. Knops riba e tema aki, y na final di e siman nan a haya otro den lineanan grandi, entre otro, tocante e suma di deficit riba presupuesto.
E mandatario a splica cu a base di e plan financiero cu gobierno a entrega, den dos aña por yega na un surplus y esey ta nifica cu pa otro aña e deficit lo mester bira un 30 miyon ey, y su siguiente aña 25 miyon y despues di esey mantene como un surplus di minimo 50 miyon cada aña.
Esaki ta un punto riba cual a yega na un convenio caba, y esey ta hopi importante.
E di dos punto ta e rebaho di debe. E debe di Aruba ta yegando 90% di nos DGP cual ta un situacion cu no ta saludable ni faborable. A yega na e palabracion cu pa 2027, pues aki casi diez aña lo mester baha e debe na 70% locual ta realizable, y diez aña despues lo baha na 50%.
Hulanda tabata kier pa haci esaki prome, pero e mandatario a splica cu esaki no ta con Hulanda ta sinti su mes confortable pero con nos pueblo por cargue, y nos pueblo no por cargue si hacie den un periodo mas lihe. Despues di hopi deliberacion a yega na otro.
Tambe a yega na otro riba e tema di supervision. Manera nos tur sa Aruba tin un CAFT pa supervisa Aruba su situacion financiero, cual a wordo incorpora na momento cu e ley a pasa den Parlamento, y tabata pa cana hunto cu e periodo cu Aruba lo a bay yega na un surplus.
Aruba lo a yega na un surplus e aña aki segun e ley di gobierno anterior. Pero no a yega ainda sino aki dos aña. Hulanda como prome indicacion, a bisa cu nan kier pa e CAFT keda hasta nos tin un surplus. E mandatario a splica nan cu esey Aruba no por defende politicamente, pa Aruba no ta aceptable pa CAFT keda pa mucho tempo, pasobra e supervision di CAFT a faya y e pueblo di Aruba no tin confianza den dje manera mester ta.
Minister Presidente a reitera cu gobierno kier cuminza cu su propio begrontingskamer, cu lo tin reglanan estricto con pa haci supervision riba e finanzanan publico di nos pais. No ta pensando riba pone hende cu Gobierno por influencia, pero un institucion cu ta haci trabao di supervision, pa asina controla cu cosnan robes lo no sosode, pasobra pueblo tin derecho di haya bon finanzanan publico. Despues di hopi palabracion a yega na e decision cu CAFT ta keda tres aña mas, te ora Aruba yega na un situacion di surplus, un aña di transicion, y despues CAFT ta stop di existi. Esaki ta un logro cu Gobierno ta considera hopi importante pa Aruba, cu ta duna e tempo suficiente pa e Begrotingskamer funciona bon, y gana e confianza cu esaki mester tin vooral door di e agencianan di rating manera IMF, Fitch, Standard & Poors. Riba e tema aki tambe a yega na un consenso.
E tema riba cual no tin consenso ainda cu Hulanda ta esun di gastonan di personal. Den otro articulo DIARIO ta elabora riba e aspecto aki.
