Home Parlamento Minister Presidente no ta contesta preguntanan riba caso contrabanda di oro

Minister Presidente no ta contesta preguntanan riba caso contrabanda di oro

44
0
SHARE
- Advertisement -

Parlamentario Robert Candelaria

ORANJESTAD (AAN): For di luna di februari di e aña aki, diferente publicacion den medionan di comunicacion local, a duna publicidad na e caso di contrabanda di bara di oro for di Venezuela y miembro di fraccion di AVP, sr Robert Candelaria a mustra cu a base di e publicacionnan aki, su persona como representante di pueblo den Parlamento, a dirigi un serie di pregunta na Minister Presidente Evelyne Wever Croes.

Sinembargo e Prome Minister no a contesta e preguntanan aki haci y awor a bolbe presenta informacionnan riba detencion di un persona relaciona cu e caso aki, caminda ta ser mustra cu e persona deteni recientemente lo tabata un ‘guarda espalda’ di e lider di MEP.

“Mi a dirigi un serie di pregunta na Minister Presidente Wever Croes, den e forma cu semper mi a cumpli cu mi deber como miembro di Parlamento,  hopi ‘zakelijk’ y al caso sin e necesidad di lanza insinuacionnan y  ta preguntanan cu cual mi tabata pidi clarificacion.

Riba e preguntanan aki mi no ricibi contesta y mas o menos dos luna despues mi a bolbe dirigi un carta pa ‘rappel’ cu e peticion atrobe pa haya contesta riba e preguntanan cu mi a haci pero atrobe riba e di dos peticion aki tampoco mi a ricibi reaccion of contesta.

Loke nos por a compronde ta cu den fin di siman cu ta tras di lomba e persona cu mi ta menciona den  e carta cu mi a dirigi na Minister President, a worde deteni relaciona cu mesun caso aki.

Awor e asunto ta cu segun publicacionnan e persona deteni aki, ta worde describi di ta hopi  yega na Prome Minister den tempo di su campaña caminda a base di un pregunta haci pa un miembro di prensa local, e mandatario a mustra cu esaki no ta di e ultimo campaña pero di otro campaña y den mi serie di pregunta mi no a insinua algo tocante esaki.

Pero mi ta kere si cu e forma con gobierno actual a pone enfasis riba integridad, riba transparencia y riba respet pa Parlamento, ta bon pa contesta e preguntanan y asina clarifica e asunto aki for di hopi tempo caba tanto pa pueblo como pa gobierno y parlamento.

Pero ora cu no ta contesta e preguntanan y ta laga tur cos ta habri y awor ta yega na detencion di e persona aki, mia haya ta necesario pa bolbe dirigi un biaha mas preguntanan na Minister Presidente pa clarifica tur cos y kita tur duda cu por tin.

Ultimo tempo nos por mira hopi cos, hopi desaroyo manera frontera cu Venezuela ta worde cera y e forma con e ta worde habri back ta hopi straño  y nos fraccion y otro fraccionnan ta haya hopi straño cu e Minister di Asuntonan Exterior Hulandes, Stef Blok ta bula bay Venezuela su so sin cu e ta invita of bay cu ningun miembro di gobierno di Aruba pa atende cu e situacion cu tin.

E ora nos ta bisa cu esaki no ta cuadra pero e ora bo ta puntra bo mes di con, si ta pa e caso di contrabanda di oro esaki a sosode, kende tabata envolvi y lo ta simpel pa un rato splica kico  a pasa, kico tin di berdad y kico no ta basa riba hechonan y e ora mesora tur hende por sigui haci nan trabao manera cu mester ta,” Parlamentario Robert Candelaria a splica.

 

- Advertisement -

DUNA COMENTARIO

Please enter your comment!
Please enter your name here