Home Gobierno Ministro mustrando cu Gobierno no ta bay cambia ROP pa acomoda proyectonan

Ministro mustrando cu Gobierno no ta bay cambia ROP pa acomoda proyectonan

11
0
SHARE
- Advertisement -

Area di Isla di Oro ta cay bou di proteccion cu lo bay tin den e Parke Marino

ORANJESTAD (AAN): Durante di e conferencia di prensa semanal di Gobierno di Aruba, Minister di infrastructura y medio ambiente Otmar Oduber, a elabora riba e hecho cu no a otorga permiso pa desaroya e area di Isla di Oro den un Resort. E mandatario a splica e motibonan pa cual a tuma e decision aki y tambe e maneho di Gabinete Wever-Croes pa ora cu ta trata proteccion di nos naturalesa y medio ambiente.

‘E proyecto cu ta encera desaroyo di Isla di Oro, ta un proyecto cu pa basta aña tabata topico di combersacion den nos comunidad. Pa locual ta e interes cu a presenta pa desaroya e area aki, Gobierno di Aruba a pidi conseho di diferente departamentonan.

Dia 28 di mei a ricibi conseho di Directie Natuur en Milieu (DNM) y dia 13 di juni a ricibi conseho di departamento Directie Infrastructuur en Planning (DIP). Hunto cu e consehonan aki y a base di documentonan cu a worde manda entre otro MER rapport y documentonan cu a worde entrega door di e desaroyadornan, riba 14 di juni Gobierno di Aruba a notifica Dell Real Estate NV (cu ta e compania cu kier desaroya Isla di Oro den Zoetry Resort), cu a base di e diferente puntonan cu a worde treci dilanti, Gobierno no ta mira cu na e momentonan aki elugar ta adecua pa e tipo di proyecto aki.

Pa cual no ta otorga e permiso pa e area worde desaroya.’ Minister Oduber a indica cu a pesar di no ta otorga e permiso, e proyecto ta keda un proyecto interesante pa Pais Aruba.  Segun Minister Oduber, tempo cu e tabata e mandatario encarga cu Turismo e tabata opina esaki y awo e Minister actual di Turismo Dangui Oduber, tambe a mustra su sosten pa e tipo di resortnan asina cu ta den un ‘niche market’. E tipo di proyectonan aki lo crea un mercado nobo pa nos Pais cual ta algo interesante pa Aruba.

Pa locual cu ta e decision di no otorga e permiso na e desaroyador esaki Minister Oduber a splica cu ta sosteni pa conseho di e diferente departamentonan manera menciona(DIP, DNM) y a base di ROP y MER rapport cu a indica cu elugar no ta adecua pa e proyecto. Adicional Gobierno ta sali for di e punto di bista cu no ta bay cambia ROP pa acomoda proyectonan.  Ademas, e Gobierno aki a compromete su mes cu dentro di poco lo ta entregando e landsbesluit nan necesario pa conseho na Raad van Advies pa loke ta trata e  areanan cu mester worde protegi como tambe e Parke Marino.

‘Mi tin e honor pa por continua cu e plannan pa realisa un Parke Marino. E plannan pa bin cu un Parke Marino ta pendiente ya pa casi 30 aña na Aruba, pero aworaki poco poco ta acelera esaki pa ta sigur cu esaki ta bin na vigor e aña aki. Den bista di e plannan cu tin di areanan cu ta worde protegi den e Parke Marino, e area di Isla di Oro tambe ta cay den dje. E maneho di Gabinete Wever – Croes ta para pa e maneho den e ROP y ta para cu seriedad pa proteccion di e 16 areanan como tambe creaccion di un Parke Marino,’ Minister Oduber a conclui.

- Advertisement -

DUNA COMENTARIO

Please enter your comment!
Please enter your name here