Home Politica MONEY

MONEY

12
0
SHARE
image description
- Advertisement -

Di biaha despues di a asumi e responsabilidad di gobernashon, e gobierno nobo a pidi CAft/Hulanda pa dun’e mas tempo pa asina haya miho bista riba e situashon financiero. Un petishon logico, tumando na cuenta e enbergadura y seriedad di e problematica financiero. Asina mes e petishon aki no ta na interes di comunidad di Aruba.

Fayo presupuestal = crecemento di debe = aumento di interes = crecemento di debe

Na e momento aki e pago di interes pa aña ta suma na Afl. 220 miyon,  o sea Afl. 600.000,- pa dia. Pa un periodo di gobernashon di 4 aña, esaki ta nifica na interes so Afl. 880 miyon. Tanten cu Aruba tin fayo presupuestal, tur (of parti di) e gasto di interes aki ta bin riba e montaña di debe cu ya caba ta impagable. Dependiendo di seriedad di e fayo presupuestal, por resulta facilmente cu despues di 5 aña, djis pa motibo di interes so, en principio e debe por a aumenta cu mas o menos Afl. 1 biyon florin.

Te cu awor, Aruba a mantene su mes punctualmente na pago di su obligashonnan di interes. E pago aki ta tuma luga a base di tanto propio capital of prestamo. Tanten cu tin fayo presupuestal (es decir cu e gastonan ta supera e entradanan), mester financia e gastonan, entre nan interes, cu placa presta. Na 2018 e interes cu mester paga, ta suma na Afl. 220 miyon.

E fayo presupuestal ta Afl 150 miyon. Pues ta cubri solamente Afl 70 miyon di e interes for di e propio medionan (entrada di impuesto). Mester presta Afl. 150 miyon (locual ta aumenta e debe) pa paga e interes. Mas halto e fayo presupuestal,, mas hopi e interes aki ta aporta na crecemento di nos debe nashonal. Solamente si ta trata di un surplus den presupuesto (esta cu tin mas entrada cu gasto), lo tin suficiente placa pa paga e interes for di e ‘propio medionan’. Asta por cuminsa paga parti chikito di e debe.

A plunder sparpot

Hopi aña pasa, Conseho di Consulta (Raad van Advies) y Hulanda a conseha Aruba seriamente pa traha un sparpot special (Sinking Fund). Tur aña mester pone placa aden pa paga e debenan y interes creciente. Esey a dura masha tiki so. Masha lihe mes a plunder e sparpot completamente cu e tiki placa cu a hinca aden. Consecuencia di esaki ta cu tur aña atrobe Aruba ta para dilanti reto financiero hopi grandi pa cual e no tin ningun reserva (mira e tabel).

 

Pago di debe di Aruba 2017-2039

# AÑA PAGO AFL. # AÑA PAGO AFL.
1 2017 414,252,156.25 13 2029 77,514,337.58
2 2018 337,910,454.58 14 2030 38,083,257.94
3 2019 376,420,867.87 15 2031 9,410,691.49
4 2020 322,149,704.59 16 2032 10,049,304.08
5 2021 391,051,687.28 17 2033 10,731,207.89
6 2022 295,253,115.05 18 2034 11,390,522.33
7 2023 253,740,614.49 19 2035 31,703,321.92
8 2024 271,006,765.44 20 2036 12,930,672.48
9 2025 300,428,006.96 21 2037 13,820,535.34
10 2026 340,222,814.04 22 2038 14,771,884.37
11 2027 82,973,297.83 23 2039 15,789,321.70
12 2028 208,210,650.37   TOTAL 4.161.152.514,50

Fuente: Directie Financiën, januari 2017

Te cu awor nunca realmente a caba di paga debe, pero semper a financia nan di nobo, esta a pusha nan mas pa futuro cu prestamo nobo. Cu otro palabra, tanten cu no tin un surplus di presupuesto, e posishon di debe di Aruba lo sigui empeora den futuro. Asina gobierno di Aruba mester presta mas di Afl. 700 miyon na 2018 pa cubri tur e obligashonnan di solamente e aña aki. E debe nobo aki ta bin riba e otro debenan den futuro.

Sin berguensa

E gobernashon anterior (di AVP) a scohe pa e ruta atractivo di gastamento di placa di pueblo sin limite y sin misericordia bou di e pretexto di ‘crece prome y despues corta’. Riba termino cortico esaki ta traha excelente pa lolia e ciudadano inocente y pues tambe ta excelente pa popularidad di e partido responsabel.

En realidad ta maluza cantidad enorme di placa di comunidad pa un campaña di elecshon cu ta dura 4 aña. Riba termino medio y largo esaki ta (y a resulta!) fatal pa prosperidad di comunidad. Ora ya no por desmenti ni carga e consecuencianan di su mal maneho, e partido di Sinterklaas aki a perde elecshon despues di 8 aña di gobernashon.

For di e bankinan safe di oposishon e ta critica sin ningun berguensa tur intento di corta gasto di e partido(nan) nobo di gobernashon pa purba saca e pais for di e miseria cu e mes a crea. Cu e mesun sinberguensa, e partido ey ta pone tur culpa di e ‘medidanan contra pueblo’ completamente den scochi di e gobierno nobo.

Caminda sin salida

Nos democracia hoben y sin experencia semper ta busca ‘solushon’ pa tipo di situashon asina den aumento di entrada di gobierno. P’ esey, aumento di impuesto ta e instrumento mas uza. Pa motibo politico-partidista ta evita miedosamente medida mas impopular pero mas efectivo cu por baha e gastonan di gobierno cu ya no por maneha mas, manera reducshon di e gastonan di personal cu ta mucho halto. Esey no ta un ruta sabi…

Aumento di impuesto ta nifica un aumento di e ‘gasto pa haci negoshi’, cu ya caba ta hopi halto na Aruba. Consecuentemente, e gastonan di invershon ta bira mas halto. Ta bira mas dificil pa cuminsa cu iniciativa nobo. Den combinashon cu e reducshon di e forsa di compra di ciudadano, esaki ta conduci na reducshon di e Producto Nashonal Interno (GDP). Hopi biaha esaki ta conduci na prijs mas halto. Esey ta hiba na inflashon y reducshon di empleo. Hende lo tin menos disponibel pa gasta y lo desea un compensashon pa medio di indexering di nan salario.

Pero…e economia mas lento no ta permiti esey (mas). Tur esaki tin consecuencia directo negativo pa e producshon economico y pues pa e GDP. Consecuentemente, gobierno ta haya menos entrada, locual ta aumenta su problemanan cu un finansas publico totalmente for di control. Pues, e camindo cu a scohe no tin salida y ta nifica solamente postponemento di ehecushon. Esey ta haci e solushon final mas caro, cu consecuencia -specialmente social- mas serio pa comunidad.

- Advertisement -

DUNA COMENTARIO

Please enter your comment!
Please enter your name here