Home Gobierno Ningun dump lo habri na Pos Chiquito

Ningun dump lo habri na Pos Chiquito

201
0
SHARE
- Advertisement -

Minister Otmar Oduber ta coregi informacion falso

ORANJESTAD   (AAN):  Durante un conferencia di prensa diahuebs atardi na ex edificio di DTI, Minister encarga cu Serlimar Sr. Otmar Oduber kier a mustra tur presente con lo bay transforma e edificio aki pa oficina principal di Serlimar como tambe reciclahe. Motibo pakico a yama e conferencia di prensa pasobra a sali varios informacion eroneo den medionan di comunicacion.

Segun Minister Oduber, specificamente un periodista a dicidi di saca informacion cu na ex edificio di DTI na Pos Chiquito lo bay bira un dump. Debi na e informacion cu el a duna, a trece un panico pa henter vecindario. E mandatario a sigui bisa cu na varios ocasion el a splica cu e intencion ta, pa Serlimar muda y bin na e sitio aki pa ta mas central y mas accesibel pa duna su servicio na e pueblo.

Pa esunnan cu conoce Serlimar na San Nicolas por sa, cu ora yega eynan mester drenta via un porta den un hanchi chikito y via un glas ta papia cu un persona. Pero na ex edificio di DTI, por tin e posibilidad mas extenso na e servicio cu lo bay brinda. Serlimar pa hopi aña a wordo laga como e baby bandona.

Minister Oduber ta kere cu Serlimar mester por drenta den e mundo moderno. Pa loke ta salubridad y e desperdicio di sushi cu mester atende cune, ta mustra cu ta momento pa modernisa Serlimar. Pa e motibo aki kier pone Serlimar na un caminda central y na bista. E forma cu e trahadonan ta haciendo nan trabou actualmente na e edificio na San Nicolas ta un espacio chikito di 10 metro cuadra cu no ta humano. Pero pa un periodista sali bisa cu un dump ta bin na Pos Chiquito e Minister a bisa di lo lage pe si e kier yama e trahadonan un dump of catalogisa Serlimar un dump.

Te unda e minister sa, ta Parkietenbos ta e dump di Aruba y no a bisa cu ta Parkietenbos ta bin Pos Chiquito. Serlimar ta un departamento cu mas di 100 empleado cu ta traha duro tur dia for di marduga te anochi laat pa brinda un miho servicio y nan ta bin na e sitio aki. Na e luga aki no ta bin ningun truck, baki of container di sushi y ni tampoco ta bin tira sushi aki den segun Minister Otmar Oduber.

E trucknan como tambe e barinan mester keda un poco tempo mas na San Nicolas. E mandatario no ta haya corecto tampoco cu e mesun periodista aki y e partido cu e ta sostene cu ta AVP, ta bisa cu na San Nicolas si ta bon pa Serlimar, e truck y baki sushinan keda, pero na Pos Chiquito no, na Oranjestad no of Paradera no.

E plan ta, cu den dos aña Serlimar completo por muda pa Barcadera caminda ta alivia tambe e parti na San Nicolas cu ta un area habita cu casnan tur rond. Unda Serlimar ta actualmente, e departamento aki ta opera sin un hindervergunning. Gobierno kier regla tur caminda ariba Aruba cu no tin un hindervergunning, mientras cu gobierno mes ta operando sin un hindervergunning y esaki no ta corecto segun Minister Oduber.

Henter e plan a largo y medio plaso cu tin pa muda Serlimar pa Barcadera. E intencion ta cu e parti di oficina ta bin den e edificio di ex-DTI hunto cu otro departamentonan manera City Inspector cu ta traha hopi di cerca cu Serlimar.

 

- Advertisement -

DUNA COMENTARIO

Please enter your comment!
Please enter your name here