Home Hudicial Ocho aña di prison pa homber cu a tira riba apartamento cu...

Ocho aña di prison pa homber cu a tira riba apartamento cu hende aden

388
0
SHARE
- Advertisement -

Hues ta haya cu tin intento di asesinato pero riba un persona so y no mas

ORANJESTAD (AAN): Mientras cu Fiscal ta haya proba intento di asesinato riba diferente persona, Hues ayera mainta a bisa cu e ta haya proba intento di asesinato riba un persona so cu tabata drumi den un apartamento y no e otro nombernan cu ta menciona. Esey a haci cu e exigencia di Fiscal di 12 aña di prison, Hues a baha esaki na 8 aña di prison pa e homber A.F.

Diabierna mainta A.F. a presenta den Corte pa scucha su sentencia. Algun siman pasa tratamento di e caso a tuma lugar caminda Fiscal ta haya cu A.F. ta culpable di premedita a purba mata, cu ta bira segun ley purba asesina. Fiscal a exigi 12 aña di prison mirando cu segun Fiscal tabatin mas persona cu nan bida tabata na peliger.

   NO DROGA:

Hues a bay hopi detaya den su sentencia pa mustra bon cla pakico el a yega na su decision. Hues a bisa cu, mescos cu Fiscal, e no ta haya proba cu na 2016, A.F. tabatin cocaine.

Hues a bisa cu e ta haya cu Polis no tabatin derecho pa listra A.F. pasobra Polis no tabatin sospechoso riba A.F. Hues a confirma exigencia Fiscal y a declara A.F. liber di posecion di droga.

   BASHA BALA:

Hues a sigui bisa cu e si ta haya proba cu riba 14 Februari 2017, den oranan di marduga hunto cu un otro, a tira riba dos apartamento na Madiki. Den un apartamento e homber K., tabata drumi. Den e otro apartamento no tabatin hende.

Hues ta haya cu A.F. ta culpable di a purba asesina e homber K. pero no e otro nombernan. Hues a mustra cu A.F. tabatin problema cu e hombernan A. y K. Nan lo a tira riba A.F. na un bar den Madiki.

Den cel di A.F. a haya mensahenan whatsapp caminda A.F. a bisa cu e tabata hopi rabia cu nan a tira riba dje. For di e mensahenan por compronde cu A.F. tabata cla pa bay basha bala. E otro a bis’e pa no haci cos pa e bay sera y pa haci e cos bon. A.F. a bisa e otro persona cu el a core riba brommer varios biaha eybanda y tur cos ta scur. Despues el a bisa cu a sefta cas, auto y nan tabata sconde mescos manera m… E otro a bisa pa trapa bay.

    NO KERE SOSPECHOSO:

Hues a bisa cu no ta kere declaracion di A.F. cu ta Pinocho lo a tira. Hues a bisa cu A.F. hunto cu e otro a tira 11 biaha riba e apartamentonan, auto. Bala a pasa door di porta di e apartamento unda K. tabata. Tambe tabatin bala cu a pasa riba K. su cabez bay den contra muraya.

Na opinion di Hues, si mira e mensahenan ta mustra cu e tiramento tabata planea. No por saca afor si A.F. a tira. Den e caso aki ta papia di complice. A tira cu dos arma y a constata cu ta dos arma a usa. A haya diferente huls di bala cu ta mustra cu ta dos arma a wordo usa.

    CASTIGO:

Hues ta haya cu no a keda proba cu A.F. a purba mata tur e otro nombernan cu ta wordo menciona den e relato di Polis. Hues a bisa cu Fiscal a exigi 12 aña di prison pasobra a haya intento di asesinato proba pa tur.

Hues ta haya cu ta un hende so a purba di asesina y pesey e castigo mester baha. El a condena A.F. na 8 aña di prison, kitando e tempo cu e ta sera den KIA.

Hues a bisa tambe cu e demanda di daño ta wordo declara no admisibel. Ta mucho complica.

- Advertisement -

DUNA COMENTARIO

Please enter your comment!
Please enter your name here